Цæгат Ирыстон сси Уæрæсейы регионтæй иу, кæцыран кусын райдыдта федералон программæ «По предоставлению подарочного набора товаров в связи с рождением ребенка». Федералон разамынд програм-мæйыл бакуыстой 2018 азы æмæ аххæсдзæн 2024 азмæ. Ныридæгæн æй æххæст кæнынц Уæрæсейы ссæдз регионы. Ныр уыдоны нымæцы бахауд Цæгат Ирыстон дæр. Программæ нæ республикæйы кусдзæн 2022 азы райдайæнæй йæ кæронмæ.
Республикæйы Сæргълæууæг Сергей Меняйло куыд бафæдзæхста, афтæмæй, программæйы фæлгæтты, 2022 азы 1-æм январæй 31 декабрмæ ноггуырд сывæллæтты мадæлтæ рынчындонæй сæ рафыссыны рæстæг исдзысты лæвæрттæ. Уыцы нысанæн фидæн азы бюджеты æвæрд æрцыд фаг фæрæзтæ. Алы ноггуырд дæр хъуамæ райса æмбæлон лæвар. Уыдон уыдзысты комплекттæ сывæллæтты уæлæдарæсимæ, найæн, тухæн æмæ медицинон дзаумæттимæ, стæй хъазæнтæ, сывæдæг æмæ æндæр лыстæг, фæлæ æнæмæнгхъæуæг дзаумæттæ.
Уымæй дарддæр Республикæйы Сæргълæууæджы указæй ма ног азæй царды уагъд æрцæудзысты цалдæр ахæм хæрзаудæн проекты. Уыдонмæ хауы скъолайы агъоммæйы сывæллæттæн рæвдауæндæттæм путевкæтæ радтын, 1-æм сентябрæй та фыццаг къласмæ чи цæуа, уыдоны скъолайы æнæмæнгхъæуæг ахуыргæнæн дзаумæттæй сифтонг кæнын.
Нæ ферох сты республикæйы разамындæй бирæсывæллонджын, æвæрæз бинонтæ, стæй – сидзæр сывæллæттæ. Уыдон Ног бонмæ Митын дадайæ райсдзысты лæвæрттæ.
ÆНАМОНД ЦАУ
Сывæллон дунейы рухсмæ куы фæзына, уый стыр цау у. Паддзахад алы мадзæлттæ аразы, цæмæй демографи фæхуыздæр уа. Уымæн æвдисæн, уæле кæй кой ракодтам, уыцы ног проект. Фæлæ, хъыгагæн, æнкъард цаутæ къаддæр не сты.
Ацы ног низæй цас адæм амард æмæ мæлы, уый кой нал кæнын, фæлæ ацы мæйы райдайæнæй Рахисфарсы районы рынчындоны амардысты фондз æрыгон арæг сылгоймаджы. Раздæр гуыбыны амардысты сæ сывæллæттæ, стæй – сæхæдæг. Ахæм æнамонд цау Ирыстоны медицинæйы историйы нæма уыд. Куыд зæгъынц, афтæмæй фондзæй дæр уыдысты хроникон низтæй рынчын, фæлæ специалистты хъуыдымæ гæсгæ, рæстæгыл сын хорз, æмбæлон медицинон æххуыс бакæнгæйæ, аирвæзын гæнæн уыд. Стыр хъыгагæн, канд ацы цау нæ, фæлæ фæстаг рæстæджы республикæйы сарæх сты арæг сылгоймæгтæ æмæ ноггуырд сабиты мæлыны цаутæ. Уый æхсæнады æвзæрын кæны тæссаг уавæр. Уæдæ медицинæйы къабазы бюджетмæ милуантæ нæ, миллиардтæ цæуы, фæлæ адæммæ нæ хæццæ кæнынц. Адæм хос кæнынц сæхи къапеччытæй. Цæй аххосæй фесæфтысты ахæм æрыгон сылгоймæгтæ æд сывæллæттæ, æхцайы æви кусджыты æнæпрофессионалон архайды аххосæй? Стæй æнамонд цаутæ уыцы-иу рæстæджы куыд рауадысты? Ам аххосджын у Æнæниздзинад хъахъхъæныны министрад дæр, йæ дæлбар куыстуæтты кæй нæ бæрæг кæны, уымæй.
Ныртæккæ Рахисфарсы рынчындоны кусынц мæскуыйаг дохтыртæ æмæ эксперттæ, агурынц ацы æнамонд цауты аххосджынты. Фæлæ та сæ ссардзысты…
Нæ уацх.
Comments are closed, but trackbacks and pingbacks are open.