Æрæджы нæ республикæйы Фæсивæдон политикæ, спорт æмæ туризмы фæдыл комитеты хъæппæрисмæ гæсгæ, фæсивæды ‘хсæн расидтысты социалон нысаниуæджы республикон грантон конкурс, цæмæй уыдон культурæ, аивад, ахуырад æмæ æнæниздзинад хъахъхъæныны фадыджы æрбавдыстаиккой проекттæ. Конкурс уагъд цыдис нæ республикæйы фæсивæдон æхсæнадон организациты минæвæрттæ æмæ студентты ‘хсæн. Фæсивæд бацымыдис кодтой конкурсмæ æмæ чи куыд сарæхст, уымæ гæсгæ æрбавдыстой сæ проекттæ. Сæрæй уыдон уыдысты бирæ æмæ дзы жюрийы тæрхонмæ гæсгæ æрлæууыдысты фондз проектыл. Конкурсы нысан та уыд, цæмæй уыцы фондзæй равзæрстаиккой сæ иуы. Иууыл хуыздæр проекты авторæн хъуамæ рахицæн æрцыдаид грант йæ среализаци кæныны нысанæн. Уымæ гæсгæ 4-æм июлы киноконцертон зал «Чермен»-ы уагъд æрцыдис проекттæн презентацитæ, цыран æвзæрст æрцыдис иууыл аккагдæр проект.
Жюрийы тæрхонмæ гæсгæ уыцы фондз проектæй иууыл хуыздæрыл нымад æрцыдис Габатты Альберт, Плиты Андрей æмæ Мамиты Григори цы проект презентаци кодтой, уый «Доступный двор», зæгъгæ. Уыдон æнæмæнгхъæуæгыл банымадтой нæ горæты Гафезы уынджы №16 æмæ №16а хæдзæртты раз сывæллæттæн хъазæн фæзуат саразын æмæ йæ рахастой рæгъмæ дæр.
Проекты автортæ сæхæдæг куыд банысан кодтой, уымæ гæсгæ сæ хъуыддаг среализаци кæнынæн бахъæудзæнис 500 мин сомы бæрц æмæ цы грант рамбылдтой, уым та ис, æрмæстдæр, 300 мин сомы. Цæрджытæ хъуыддаг æмбаргæйæ, ныфс бавæрдтой проекты автортæн, иннæ æхцайы фæрæзтæ та иумиагæй кæй æртымбыл кæндзысты, уымæй.
Презентацийы гранты хицæуттæ бæстонæй æрдзырдтой, куыд хуыздæр бакусдзысты сæ проектыл, цæмæй схæрзарæзт кæной сывæллæтты хъазæн фæзуат. «Мах фæнд кæнæм, цæмæй дыууæ мæйы æмгъуыдмæ схæрзарæзт кæнæм, сывæллæттæ кæм хъазой, уыцы фæзуат. Мах ацы хъуыддаг саразын банымадтам ахсджиагыл, уымæн æмæ ацы корпусты цæрынц бирæ сывæллæттæ. Уыдонæн нæй зæрдæйы фæндиаг кæм ахъазой æмæ баулæфой, ахæм хъазæн фæзуат, уымæ гæсгæ сæхи æппарынц гаджеттæм, сты интернеты æндæвдады бын. Ныййарджытæн уый æвзарын кæны стыр тыхстдзинад, уымæн æмæ æмбарынц сæ сывæллæттæн пайда кæй нæ хæссы ацы хъуыддаг, уый. Хъæуы сæ, фылдæр сæхи кæм ирхæфсой æмæ хъазой, ахæм хъазæн фæзуат», – банысан кодта Мамиты Григори. Уый ма куыд банысан кодта, афтæмæй сæ зæрды ис сывæллæтты хъазæн фæзуатмæ дон æмæ рухс æрбауадзын, афтæ ма талатæ ныссадзын дæр.
Цымыдисон уыдысты конкурсы иннæ презентацигонд проекттæ дæр. Уыдон та уыдысты: «Разработка технологичной схемы по очистке воды городского озера», «Улучшение безопасности условий движений с северной стороны города Цхинвал», «Гончарная мастерская «Аланфарн», «Дорога любви и добра».
Мадзалы кæрон РХИ-йы Фæсивæдон политикæ, спорт æмæ туризмы фæдыл комитеты сæрдары хæдивæг Гатыгкоты Валентинæ конкурсы æппæт хайадисджытæн дæр загъта бузныг æмæ арфæйы ныхæстæ æмæ банысан кодта проекттæй алкæцыдæр кæй уыд цымыдисон. «Мæнæн тынг æхсызгон у, ахæм æмбаргæ фæсивæд нæм кæй ис æмæ адæмы рæгъмæ кæй хæссынц ахсджиаг æмæ царды æнæмæнгхъæуæг фарстытæ. Махæн нæ ведомство æппæт дæр сараздзæнис, цæмæй уын баххуыс кæнæм уæ проекттæ среализаци кæнынæн. Мах æрдыгæй иу проект дæр æнæхъусдардæй нæ аирвæздзæнис», – загъта Валентинæ.
Конкурсы фæуæлахизуæвджытæ сæхæдæг куыд загътой, уымæ гæсгæ сæ проект среализаци кæнынмæ æрæвналдзысты ног къуыри. Сæ дарддæры фæндиæгтæм та сын æнæрхъæцæй æнхъæлмæ кæсынц сывæллæттæ.
Нæ уацх.
Comments are closed, but trackbacks and pingbacks are open.