ЦÆМÆЙ ХЪÆУТЫ ЦАРД ÆХСИДА…
Æппынфæстаг, республикæйы кусын райдыдта, ныхас рагæй кæуыл цæуы, уыцы закъоны проект “Устойчивое развитие сельских территорий на 2014 – 2020 годы”. Уый фæдыл, сæ царды уавæртæ фæхуыздæр кæныны тыххæй, республикæйы Сæргълæууæг Битарты Вячеслав кадджын уавæры цæрæнуæтты сертификатæ радта 26 бинонтæн. Програм-мæйы домæнтæм гæсгæ, сертификаттæ лæвæрд æрцыдысты, æрмæстдæр хъæуты чи цæры æмæ кусы, уыдонæн: дохтыртæн, ахуыргæнджытæн, хъæууон хæдзарады кусджытæн… Цæрæнуат дæр балхæнæн ис æрмæстдæр хъæуты.
Битарты Вячеслав куыд бафиппайдта, афтæмæй йын æхсызгон у, сертификатты хицæуттæн сæ фылдæр æрыгæттæ кæй сты æмæ хъæуты кæй кусынц, уый: “Мах дарддæр æппæт фадæттæ араздзыстæм, цæмæй адæм сæ хъæутæй макуыдæм лидзой. Ныридæгæн арæзт æрцыдысты бирæ рæтты фæндæгтæ, спортивон комплекстæ, культурæйы хæдзæрттæ, уыдонимæ фæзынд куысты бынæттæ. Ноджыдæр бацархайдзыс-тæм, цæмæй хъæутæ ма федзæрæг уой”,- банысан кодта республикæйы Сæргълæууæг.
Сертификаттæн æхца радих кодтой 18 милуанмæ хæстæг федералон бюджетæй, уыдонмæ ма бафтыдтой республикæйы, стæй районты бюджеттæй. Хæдзары аргъæн йæ 30 проценты бинонтæ хъуамæ бафидой сæхæдæг, йæ æвдай проценты та – паддзахад. Республикæйы разамынад ма куыд фехъусын кодтой, афтæмæй фидæн аз сæ зæрды ис ахæм сертификаттæ, æппынкъаддæр, 45 раттын, стæй уый фæстæ азты дæр – ноджы фылдæр. Уый у æхсызгон хъуыддаг. Фæстаг азты хицауад æрмæстдæр сур ныхæстæй сидтис адæммæ, цæмæй хъæутыл сæ къух ма сисой æмæ ма федзæрæг уой. Ныр та ныхæсты бæсты – хъуыддаг. Афтæ куы ахæсса, уæд хъæутæ специалисттæй дæр никуы сцух уыдзысты æмæ сæ цард æхсиддзæн…
Нæ уацх.
Comments are closed, but trackbacks and pingbacks are open.