Цæгат Ирыстоны

ХУЫЗДÆР СТУДЕНТТÆ – ИРЫСТОНÆЙ

Раппæлинаг хъуыддаг у советон дугæй нырмæ норильскаг металлургион компанитæ сæхимæ кусынмæ, сæйраджыдæр, Цæгат Кавказы хæххон металлургион институты студентты кæй хонынц, уый. Уый нысан кæны æмæ ирыстойнаг фæсивæд сæхи хорз æмæ куыстуарзагæй кæй æвдисынц. Æрвылаз дæр каникулты рæстæг дæсгай лæппутæ æмæ чызджытæй саразынц арæзтадон къордтæ æмæ  кусынмæ ацæуынц Норильск, стæй Красноярскмæ. Уым сын цæрын æмæ кусынæн саразынц æппæт уавæртæ хорз мыздимæ.  Æртæ мæйы фæстæ сæ ахуырмæ æрбаздæхынц.  Уый сын у практикæ дæр. Йæ ахуыр кæронмæ кæмæн ахæццæ, уыдонæй кæй бафæнда уым баззайын, уыдоны райсынц тынг зæрдиагæй. Куысты бынæттæ æмæ хорз мыздæй уæлдай сын цыбыр рæстæгмæ раттынц фатертæ дæр. Абоны онг Норильскы кусгæйæ чи баззад, уыдон сты дæсгай минтæ æмæ сын стыр аргъ ис сæ куысты.

Ныр дæр та ахæм æмгуыстады бадзырд бафыссынмæ æрбацыдысты компани “Норильскаг никель”-ы вице-президент Сергей Дяченко æмæ “НорильскНикелРемонт”-ы генералон директор Олег Вейде. Республикæйы Сæргълæууæг Битарты Вячеслав æмæ институты зонадон советы уæнгтимæ сæ фембæлды рæстæг уазджытæ арфæ ракодтой Ирыстоны цæрджытæн, уæлдайдæр институты коллективæн, ахæм фæсивæд кæй хъомыл кæнынц, уый тыххæй.

“Нæ куыстуат йæ зæрдæ дары хæххон-металлургион институты рауагъдонтыл. Уыдонæй мах бирæ азты райгонд стæм. Æрвылаз бадзырд бафыссынмæ дæр уый тыххæй æрцæуæм. Ныфс нæ ис, дарддæр дæр æмгуыст кæй кæндзыстæм æмæ нын иумæйаг æнтыстытæ ноджы фылдæр кæй уыдзæн”, – загъта Сергей Дяченко.

Битарты Вячеслав фæсидт институты коллективмæ, цæмæй ахуыры хæрзхъæддзинад ноджы фæхуыздæр кæной æмæ не студенттыл алы ран дæр афтæ æхсызгонæй æмбæлой металлургион куыстуæттæ.

Институты ректор Юрий Дмитрак радзырдта ахуыры процессы тыххæй, куыд цæттæ кæнынц фидæны специалистты, дарддæр сæм цавæр фæндтæ ис æмæ афтæ дарддæр.

 Уыцы бон æмбырды æвзæрст æрцыд студенттимæ кусыны фæдыл хæрзаудæн совет æмæ, фысымты фæндонмæ гæсгæ, кадджын уавæры йæ уæнгтæ систы Сергей Дяченко æмæ Олег Вейде. Æмбырды рæстæг ма къухтæ æрфыстой æмгуыстады бадзырдыл дæр. Уыцы бон ма уазджытæн фембæлд уыд студенттимæ, стæй бабæрæг кодтой институты музей æмæ металлургион куыстуæтты.

СКУЫСТА  НЫМÆЦОН  ТЕЛЕУЫНЫНАД

Къуырисæры, 3 июны, æрцыд, республикæйы цæрджытæ рагæй цæмæ бæллыдысты, уыцы цау: æппынфæстаг, скуыста нымæцон телеуынынад.

 Нымæцон телеуынынад, кæй зæгъын æй хъæуы, Ирыстоны рагæй ис, фæлæ уыцы бастдзинад æрмæстдæр уыд, зынаргъ, нырыккон телевизортæ кæмæн ис, уыдонæн. Хуымæтæгдæр телевизортæ, стæй хæххон хъæуты цæрджытæ канд хорз бастдзинадæй цух нæ уыдысты, фæлæ ма сæ фылдæрæн æвдисгæ дæр нал кодтой, кæмæн та дыууæ-æртæ каналы. Уымæн æмæ аналогон телеуынынады техникæ базæронд, ныры домæнтæн дзуапп нал лæвæрдта.

Нымæцон телеуынынады хорздзинæдтæ бирæ сты. Фыццаджыдæр, кæцыфæнды хуы-мæтæг телевизор дæр ныр æв-дисы лæвар ссæдз каналы æнæ спутникон антеннæйæ, уыимæ æппæт хæххон территориты дæр. Стæй дæр у хæрзхъæд æмæ хуызджын, ахсы цалдæр радиостанцæйы.

 Цæгат Ирыстонимæ нымæцон телеуынынадмæ рахызтысты Уæрæсейы 36 регионы, фæлæ Цæгат Кавказы Ирыстон у фыццаг, ног бастдзинады фæрæзмæ чи рахызт.

  Нæ   уацх.