1992 азы 27 азы размæ 27 май Хуссар Ирыстоны бæстæйы сæргълæууæджы официалон барамындæй фидар æрцыд юстицийы органты кусæджы бонæй. Уый цытæн киноконцертон зал «Чермен»-ы уагъд æрцыд цытджын æмбырд, цыран хайад райстой республикæйы къухдариуæгад Хуссар Ирыстоны Президент Бибылты Анатолийы сæргълæудæй, Цæгат Ирыстон æмæ Донецкы Адæмон Республикæйы делегацийы минæвæрттæ, министрады кусджытæ æмæ ветерантæ, министрадтæ æмæ уагдæтты кусджытæ, республикæйы æхсæнады минæвæрттæ.

Цытджын æмбырды райдиан мадзалы хайадисджыты размæ хаст æрцыд Юстицийы министрады сырæзты истори æмæ æнтыстыты фæдыл документалон æрмæг.

Хуссар Ирыстоны юстицийы министр Лалыты Залинæ йæ дæлбар министрады кусджытæн сæ профессионалон бæрæгбоны цытæн раарфæ кæныны фæстæ банысан кодта, зæгъ-гæ, Президенты Барамынд афтæ нысан кæны æмæ нæ уагдоны архайдæн аккаг аргъ кæй ис бæстæйы уæлдæр къухдариуæгады ‘рдыгæй. Йæ ныхæстæм гæсгæ министрад йæ сырæзтæй абоны бонмæ цыд гуыргъахъ фæндæгтыл. Æмæ нын, зæгъгæ, ныртæккæ хорз фадат ис æрмæст нæ куысты æхсæнадон нысаниуæг зæрдыл æрлæууын кæнынæн нæ, фæлæ куысты æдзух бæрндзинад æнкъарынæн дæр.

«Республикæйы цы ивындзинæдтæ цæуы, уыдонимæ æдзухæй баст сты министрады рæзты процесстæ.  Ног историон реалитæм гæсгæ рацарæзт цыд юстицийы системæ, бæрæг æрцыд йæ райрæзты здæхт. Иумиагæй сисгæйæ, юстицийы органты куыст æмæ архайд у алыварсон.

Ныртæккæ юстици ссис æхсæнадон ахастыты барадон ифтонгады механизм, уый ссис паддзахаддзинады, æх-сæнадон арæзтады ахæм сегмент, кæцы бæстон кæны фæтк, стабилондзинад æмæ рæстдзинад»,- дзырдта министр.

Уый ма банысан кодта юстицийы органты куыст æнæаскъуыйгæйæ баст кæй у æхсæнады цардимæ, зæгъгæ, нæ бæстæйы царды æппæт нысаниуæгджын цаутæ, æнæмæнгдæр, регистраци цæуынц юстицийы органты. Фæлæ уый æмрæнхъ сæ куысты ис вазыгджын хæстæ дæр – фыдракæнд-тæ чи саразы æмæ сæрибардзинадæй иппæрд кæныны тæрхон хаст кæмæн æрцæуы, ахæм адæмы рараст кæнын æмæ тæрхондон цы уынаффæтæ рахæссы, уыдон æвæндонæй æххæст кæнын. Æмæ уым дæр Юстицийы министрад хынцы демократи, гуманондзинад æмæ адæймаджы барты принциптæ. Ууыл дзурæг сты уголовон – æххæстгæнæн системæйы цы ивындзинæдтæ æрцыд, уыдон. Уым бирæбæрцæй фæхуыздæр сты уавæртæ, кæцытæ ныридæгæн дзуапп дæттынц нырыккон домæнтæн.

«Уголовон-æххæстгæнæн политикæ сæрмагонд фарст у, уым фæстаг азты бирæ арæзт æрцыд. Фæлæ куыд æндæр системæты, афтæ уым дæр нырма ис проблемæтæ æмæ  бæстонкæнинаг фарстатæ», – дзырдта Лалыты чызг.

Йæ хъуыдымæ гæсгæ Юстицийы министрады сæрмагонд нысаниуæг ис тæрхондоны уынаффæтæ æххæст кæнынæн, уымæн æмæ уый æхсæнады биноныг кæны барвæтк æмæ барад хъахъхъæнын, фыдракæндон архæйдтытæ ма æруадзын.

Юстицийы ахсджиагдæр миссийыл йæ къухдариуæггæнæг банымадта паддзахады сæйраг закъон – Конституцийы бындурыл закъондæттынад хуыздæр кæнын.

РХИ-йы Президент Бибылты Анатоли Юстицийы министрады органты кусджытæн сæ бæрæгбоны цытæн зæрдиаг арфæ ракæныны фæстæ банысан кодта, ныфс æй кæй ис хуыздæр профессионалон традицитæ кæй исдзысты æмæ нырæй фæстæмæ дæр закъон, адæм æмæ паддзахадæн цæс-гомджынæй кæй службæ кæндзысты.

«Уый бирæ азты дæргъы сбæлвырд кодтой, Юстицийы министрады кусджытæ  закъоны тыххæй кæй службæ кæнынц, закъондæттынадон æмæ тæрхондонон уынаффæтæ æххæст кæныныл иузæрдион кæй сты, æмæ барадон культурæ рæзын кæнын æмæ фидар кæныныл кæй фæллой кæнынц. Министрад йæ рæзт æмæ уæвынады азты дæргъы ссис уагдæттæ æмæ органты иунæг системæ, кæцы бæстон кæны закъондзинад æмæ фæтк хъахъ-хъæныны фæдыл æвæджиаг хæстæ», – банысан кодта бæстæйы сæргълæууæг.

Йæ ныхæстæм гæсгæ юстицийы органтæ сты паддзахадон управленийы иунæг системæйы ахсджиаг элемент, кæцы бæстон кæны бæстæйы барадон фæтк. Уымæйдæр, ацы органты архайд конд у дыууæ ахсджиаг æмбарынадæй  паддзахаддзинад æмæ закъондзинадæй. Уыцы æргъадтæ кæцыфæнды паддзахадæн дæр сты сæйраг. Дарддæр куыд банысан кодта, уымæ гæсгæ паддзахад цас барадон у, уымæн аргъ кæнынц æмбæстæгтæ –  тæрхондонмæ, адвокатмæ, нотариусы кæнæ паддзахадон службæгæнæгмæ химæрайсты цахæм ахастыл æмбæлынц æмæ цас рæстæгыл æмæ эффективонæй бæстон цæуынц сæ фарстатæ,  цас лæмбынæг æмæ раст ахаст сæм ис юстицийы системæйы кусджыты ‘рдыгæй, уымæ гæсгæ.

Бæстæйы сæргълæууæг ноджыдæр бузныг загъта юстицийы органты кусджытæн, бæстæ æмæ закъондзинадæн сæ службæйы фæдыл, сæ куыстмæ цæсгомджын ахаст æмæ сæ хъуыддагыл æнувыддзинады тыххæй. Уый фæстæ Юстицийы министрады сырæзтыл 27 азы сæххæсты бæрæгбоны цытæн йæ Барамындæй паддзахадон хорзæхтæй схорзæхджын кодта министрады къорд кусæджы.

Бæрæгбонон арфæтæ ма сæ коллегæтæн ракодтой Донецкы Адæмон Республикæйы юстицийы министры хæстæ æххæстгæнæг Яков Ходос æмæ Цæгат Ирыстон -Аланийы Тæрхондонон приставты федералон службæйы управленийы къухдариуæггæнæджы хæдивæг Козаты Илья. Æфсымæрон Цæгат Ирыстоны делегацийы минæвар грамотæйæ схорзæхджын кодта РХИ-йы юстицийы министр Лалыты Залинæйы æмæ уагдоны къорд кусæджы.

Бæрæгбоны цытæн цытджын мадзал адарддæр концертон программæйæ.

КЪÆБУЛТЫ Маринæ

Comments are closed, but trackbacks and pingbacks are open.