БИГЪУЫЛАТЫ РУДОЛЬФЫ ДУНЕ – АХОРÆНТЫ ÆВЗАГÆЙ

Ивгъуыд къуырийы кæрон киноконцертон зал «Чермен»-ы фойейы цытджын æгъдауæй баконд æрцыдис Республикæ Хуссар Ирыстоны сгуыхт нывгæнæг, Уæрæсейы Федераци æмæ Хуссар Ирыстоны Нывгæнджыты цæдисы уæнг Бигъуылаты Рудольфы куыстыты персоналон равдыст «Встреча с самим собой», зæгъгæ, ахæм номимæ. Равдыст организацигонд æрцыдис нывгæнæджы 60 азы юбилейы цытæн æмæ йыл адæм æмбæлдысты арфæтæ æмæ уæлдай хъарм ахастимæ. Мадзал организацигонд æрцыдис РХИ-йы Нывгæнджыты цæдис æмæ РХИ-йы Культурæйы министрады къухдариуæгадæй. Курдиатджын нывгæнæджы цымыдисон сфæлдыстадимæ базонгæ кæнынæн фадат уыдзæнис 25-æм апрелмæ.

Бигъуылаты Рудольфы персоналон равдыстмæ æрбацыдысты нæ республикæйы æмбæстæгтæ, аивадæн табугæнджытæ, хуссарирыстойнаг нывгæнджытæ, студенттæ æмæ скъоладзаутæ. Нывгæнæджы равдысты адæмы рæгъмæ хаст æрцыдысты нæ республикæйы цардыл дзурæг алыгъуызон цымыдисон куыстытæ. Экспозици цы хъæздыг æмæ мидисджын нывтæй конд у, уыдон сты 60 куысты бæрц æндæр æмæ æндæр жанрты æмæ тематикæйыл. Адæймаг йæ цæст нывгæнæджы сфæлдыстадыл куы ахæсса, уæд дзы æнæмæнгдæр фендзæнис æртæ сфæлдыстадон периоды. Фыццаг период, кæцыйы скондмæ бацыдысты, Рудольф йæ райгуырæн Ирыстоны цы куыстытæ сфæлдыста, уыдон. Дыккаджы та, Петербурджы ма куы цардис æмæ пленэрты куы куыста, уыцы нывтæ æмæ æртыккаг та – философон. Кæй зæгъын æй хъæуы, равдысты арæхæй зынынц Ирыстоны кæмттæ, йæ алæмæттаг æрдз, ирон хæдзар. Бæрзонд æмæ рæсугъд сты уацмысты идейон хъуыдытæ. Хъæздыг у ахорæнтæй экспозици æмæ йыл адæм стыр цымыдисимæ æрзылдысты æмæ йын аргъ кодтой. Равдысты ис ахæм нывтæ, куыд: «Нар», «Покинутые места», «Горный пейзаж», «Полет», «Художница с цветами», «Вятская провинция», «Ночь, посыпающая голубя» æмæ æндæртæ.

Персоналон равдыст бацæуæн ныхасæй байгом кодта Республикæ Хуссар Ирыстоны Нывгæнджыты цæдисы сæрдар Битеты Алан. Уый, фыццаджыдæр, арфæ ракодта Бигъуылаты Рудольфæн йæ персоналон равдысты цытæн æмæ ма бузныджы ныхæстæ загъта æппæт æрæмбырдуæвджытæн, мадзалмæ кæй саккаг кодтой, уый сæраппонд. Битеты Алан цыбыртæй радзырдта нывгæнæджы сфæлдыстады тыххæй, Хуссар Ирыстоны кæддæриддæр кæй ис курдиатджын нывгæнджытæ æмæ дарддæр кæй кæндзысты ирон аивад уæрæх фæндæгтæм, уый. «Мах абон цин кæнæм, нæ коллегæйы сфæлдыстады иу хай адæмы рæгъмæ кæй рахастам æмæ йын персоналон равдыст кæй сорганизаци кодтам, уый тыххæй. Ацы равдыст хъуамæ уагъд æрцыдаид ивгъуыд аз, фæлæ нын пандемийы аххосæй нæ бантыст. Бигъуылаты Рудольф ахæм адæймаг у, кæцы размæ кæны нæ культурæйы, нæ аивады æмæ йæ хъæздыг кæны йæхи куыст æмæ тыхты руаджы. Нывгæнæгæн мæ зæрдæ зæгъы фидар æнæниздзинад, хæрзиуджытæ, сфæлдыстадон уæлтæмæнад, æвидигæ энерги æмæ ног æнтыстытæ», – загъта Битеты Алан.

Бигъуылаты Рудольфы куыстытæн аккаг аргъ скодта Республикæ Хуссар Ирыстоны Культурæйы министр Зассеты Жаннæ дæр. Уый фыццаджыдæр нывгæнæгæн арфæ ракодта йæ персоналон равдысты байгомы сæраппонд æмæ банысан кодта, Рудольфы сфæлдыстадон бынтæ хаст кæй æрцæу-дзысты РХИ-йы Культурæйы министрады цур ирон культурæйы хæзнадонмæ. «Мæ-нæн тынг æхсызгон у, абон махæн Рудольф ахæм аив æмæ цымыдисон уацмыстæ кæй фенын кодта, уый. Йæ куыстытæ хæссынц позитив, ахæмæй йæ зонын æз дæр. Бигъуылаты Рудольфы мах зонæм, куыд курдиатджын нывгæнæг, афтæ. Уый дуне æвдисы йæ ахорæнты руаджы æмæ афтæмæй ныхас кæны немæ. Хуыцау ын ноджыдæр радтæт сфæлдыстадон хъарутæ, цæмæй республикæ æмæ йæ адæмы хæр-зиуæгæн фæлдиса, нацийы кад бæрзонддæр чи иса, ахæм уацмыстæй», – йæ арфæйы ныхасы банысан кодта министр.

Зæрдæбын арфæйы ныхæстæ ма нывгæнæгæн дзырдтой æрæмбырдуæвджытæй æндæртæ дæр, кæцытæ-иу банысан кодтой Рудольфы стыр курдиат.

Бигъуылаты Рудольф Республикæ Хуссар Ирыстоны аивад бæркадджындæр кæй кæны æмæ йæ сфæлдыстадон хайбавæрд ацы хъуыддаджы æнтыстджын кæй у, афтæ ма йæ йе 60 азы юбилейы цытæн схорзæхджын кодтой РХИ-йы Нывгæнджыты цæдисы Кады грамотæйæ.

Бигъуылаты Рудольф Харитоны фырт райгуырд æмæ схъомыл Хуссар Ирыстоны Къостайыхъæуы. Скъолайы фæстæ ахуыр кæнынмæ бацыдис Цхинвалы нывгæнæн ахуыргæнæндонмæ æмæ йæ каст фæцис 1980 азы. Уый фæстæ йæ ахуыр адарддæр кодта Петербурджы В. М. Мухинайы номыл уæлдæр нывгæнæн ахуыргæнæндоны. У Республикæ Хуссар Ирыстоны сгуыхт нывгæнæг æмæ йæм ис бирæ фæндтæ сфæлдыстадон куысты. Нывгæнæгæн йæ куыстытæй фенæн ис куыд Ирыстоны, афтæ Уæрæсейы Федерацийы æндæр æмæ æндæр музейты.

Цхуырбаты Лариса