Уæрæсейы Федераци Республикæ Хуссар Ирыстоны паддзахадон хæдбардзинад куы банымадта, ууыл дыууадæс азы сæххæсты цытæн уыд хуссарирыстойнаг нывгæнджыты бæрæгбонон равдыст. Алы бæрæгбон дæр хъæлдзæгдзинадæй фæхайджын вæййы, аивады цæрдхъом тых, арфæтæ йæм куы фæхæццæ вæййынц, уæд.
Афтæ уыд ацы равдысты дæр, кæцы байгом 25-æм августы нæ горæты киноконцертон зал «Чермен»-ы фойейы. Нывгæнджыты цæдисæн нывты экспозици организацигонд æрцыдис РХИ-йы Культурæйы министрадимæ иумæ. Равдысты адæмы рæгъмæ хаст æрцыдысты нæ бæстæйы цардыл дзурæг алыгъуызон цымыдисон нывтæ, афтæ ма хъæдæрмæгæй арæзт куыстытæ дæр. Экспозицийы уыдис 50 куысты бæрц æндæр æмæ æндæр тематикæйыл. Уыдонæн сæ автортæ уыдысты нæ республикæйы дыууын нывгæнæджы, кæцытæ сæ аивады руаджы Хуссар Ирыстоны зонгæ кæнынц дунейæн.
Бæрæгбонон равдыстмæ æрбацыдысты нæ республикæйы æмбæстæгтæ, аивадæн табугæнджытæ, студенттæ æмæ скъоладзаутæ, уыдонимæ экспозицийæн аргъгæнæг уыдысты Республикæ Хуссар Ирыстоны Президент Бибылты Анатоли, Хуссар Ирыс-тоны Уæрæсейы Федерацийы æххæстбарджын минæвар Марат Кулахметов æмæ Хицауады æндæр бæрнон кусджытæ.
Нæ бæстæйы сæргълæууæг Бибылты Анатоли 26-æм августы бæрæгбоны сæраппонд арфæйы ныхæстæ загъта алкæмæн дæр æмæ банысан кодта Стыр Уæрæсе нын нæ хæдбардзинад куыд банымадта æмæ йын Ирыстоны та цы егъау нысаниуæг дæттынц, куыд ын аргъ кæнынц, уый. «Зынаргъ æмбæстæгтæ! Абон мах æрбамбырд стæм Уæрæсейы къухдариуæгады политикон фæндондзинады ирд æвдисæнæй чи баззад, уыцы 26-æм августы бæрæгбоны цытæн. Уый у, Уæрæсейы Федераци йæхиуæтты зындзинады кæй нæ ныууадзы, уыцы факт. Ацы бæрæгбон хуымæтæджы бæрæгбон нæу, уыцы бонæй ирон адæм фидар æмæ уæндонæй райдыдтой кæсын сæ сомбоны цардмæ. Уый у æцæг æппæтадæмон бæрæгбон, кæцыйæн мах хъуамæ кæнæм егъау аргъ æмæ нæ рох макуы уа», – загъта Республикæ Хуссар Ирыстоны Прези-дент Бибылты Анатоли. Уый ма йæ раныхасы рæстæджы стыр аргъ скодта хуссарирыстойнаг нывгæнджыты куыстытæн æмæ сын загъта бузныг æмæ арфæйы ныхæстæ сæ аивады тыххæй.
Республикæ Хуссар Ирыстоны нывгæн-джыты цæдисы сæрдар Битеты Алан дæр бæрæгбоны цытæн арфæйы ныхæстæ загъта æрæмбырдуæвджытæн æмæ цыбыртæй банысан кодта равдысты цы куыстытæ ис, уыдон кæй сты адæймагæн йæ зæрдæ чи барухс кæна, ахæм позитивон æмæ цымыдисон нывтæ. «Нæ нывгæнджытæ абоны бæрæгбоны цытæн адæмы рæгъмæ кæй рахастой, уыдон сты сæ ног куыстытæ æмæ адæймаджы цымыдисдзинад здахынц сæхимæ. Равдысты тематикæ у алыгъуызон, фæлæ фылдæр дзурæг сты райгуырæн бæстæмæ уарзондзинадыл, æххæст сты националон колоритæй», – загъта Битеты Алан.
Равдысты ма хицæнæй фенæн уыдис хъæдæрмæгæй конд куыстытæ, кæцыты автор та у РХИ-йы сгуыхт журналист, газет «Хурзæрин»-ы культурæйы хайады сæргълæууæг Гæззаты Иван. Уый ацы куыст кæны 2012-æм азæй. Уый хъæдæрмæгæй аразы Ирыстоны цы аргъуантæ, дзуæрттæ æмæ фенддагдæр арæзтæдтæ ис, уыдон халдихтæ, афтæ ма хæдзарон мигæнæнтæ дæр. Ацы аз ирон адæмы геноцидыл сæдæ азы кæй сæххæст ис, уый тыххæй дæр сæрмагондæй бацæттæ кодта æрмæг, кæцыйы рахуыдта «Геноцид». Йæ уыцы куысты автор æвдисы ирон хъæуы, кæцыйы кæддæрау цард цæдджинагау нал фыцы, фæлæ æрцыдис сыгъд гуырдзиæгты къухæй æмæ дзы змæлæг дæр нал ис. Уым зынынц сыгъд хæдзæрттæ, уæлмæрд, аргъуан, мæсыг. Автор дзы равдыста гуырдзиаг фашисттæ нын цас зиæнттæ æмæ æбуалгъ фыдæбæттæ бавзарын кодтой, уый æмæ ахæм хъæутæ та уæд Хуссар Ирыстоны уыд тынг бирæ, кæцыты абон змæлæг дæр нал ис.
Цхуырбатыы Ларисæ
Comments are closed, but trackbacks and pingbacks are open.