Ивгъуыд къуырийы кæрон Хуссар Ирыстоны Паддзахадон университеты равдыстыты залы байгом РХИ-йы адæмон нывгæнæг, Уæрæсейы Федерацийы нывгæнджыты цæдисы уæнг, Гæбæраты Барисы персоналон равдыст «Цвети, Осетия моя!», зæгъгæ, ахæм номимæ.
Курдиатджын нывгæнæджы персоналон равдыст, сæйраджыдæр, организаци æрцыд йæ 70 азы юбилейы цытæн, афтæ ма ацы аз 20-æм сентябры нæ республикæ расидыны боныл 32 азы кæй æххæст кæны, уыцы стыр бæрæгбоны сæраппонд дæр. Равдысты экспозици цы хъæздыг æмæ мидисджын нывтæй конд у, уыдон сты 120 бæрц æндæр æмæ æндæр тематикæйыл графикæ æмæ хуызфыссынады жанры.
Гæбæраты Барис у ахæм хæдæфсарм æмæ курдиатджын нывгæнæг, кæцы ирон нывкæнынадæн лæггад кæны æмæ ног æмæ ног хуынтæ хæссы адæмы рæгъмæ. Стыр хайбавæрд ын ис нæ адæмы удварн æмæ культурæйы рæзты дæр. Барис кæддæриддæр тырны йæ дуджы цард равдисынмæ æмæ йын æнтысгæ дæр кæны. Нывгæнæджы экспрессивон нывтæ æвдисынц йæ радтæг адæмы ирд дуне, йæ уарзон Ирыстоны алæмæттаг æрдз, ирон хъæууон адæмы цард, традицитæ æмæ бæрæгбонтæ. Йæ нывтæ сты мидисджын æмæ йын арæх æвæрд æрцæуынц алыгъуызон равдыстыты, куыд нæхимæ, афтæ фæсарæнты дæр. Гæбæрайы фырты куыстытимæ зонгæ кодтой Бельги, Люксембург, Итали, Турк, Голланди æмæ æндæр бæстæты адæмтæ. Йæ нывтæ конд сты нæ бæстæйы национ музейы, Цæгат Ирыстон-Аланийы, Мæскуыйы æмæ æндæр горæтты.
Курдиатджын нывгæнæджы равдысты экспозицитæн аргъгæнджытæ уыдысты Президент Гаглойты Алан, Хицауады сæрдар Джуссойты Константин, раздæры Президент Тыбылты Леонид, университеты ректор Тедеты Вадим æмæ æндæр бæрнон адæймæгтæ.
Нæ бæстæйы сæргълæууæг йæ раныхасы банысан кодта Гæбæраты Барисы стыр æнтыстытæ нывкæнынады, афтæ ма Хуссар Ирыстоны аивадмæ уæзгæ хуынтæ кæй хæссы æмæ йæ кæй хъæздыг кæны, уый. «Гæбæраты Барис йæ цард снывонд кодта ирон аивадæн. Уымæй дарддæр ма кусы рæзгæ фæлтæримæ дæр, рæдауæй сын амоны нывкæнынады сусæгдзинæдтæ æмæ сын афтæмæй уарзын кæны аивад. Нывгæнæгæн ис йæхи æрмдзæф, йæ диссаджы куыстытæ кæддæриддæр адæймаджы сæхимæ æлвасынц, фыццаджыдæр, уымæй æмæ сæ ирдæй кæй зыны нæ бæстæйы рæсугъддзинад. Йæ ахорæнты руаджы уый афтæ радæтты йæ уацмыстæ æмæ сæ адæймаг райсы æхцондзинад. Уырны мæ, ацы равдыстмæ чи æрбацæуа æмæ нывтæ чи фена, уый фæсмон кæй нæ фæкæндзæн. Зæгъын мæ фæнды уый, æмæ махæн нæ хæс у ахæм сфæлдыстадон гоймæгтæн кад кæнын æмæ сын сæ куыстæн уавæртæ аразын. Мæхи æмæ нæ адæмы номæй мæ фæнды Гæбæрайы фыртæн бузныджы ныхæстæ зæгъын йе сфæлдыстадон æмæ фæрнджын куысты тыххæй. Мæ зæрдæ дын зæгъы фидар æнæниздзинад æмæ ног æнтыстытæ аивады», – загъта нæ бæстæйы сæргълæууæг.
Равдысты рæстæджы Президент Гаглойты Алан нывгæнæджы схорзæхджын кодта Кады орденæй.
Юбилярæн раарфæ кодта Тедеты Вадим дæр. Уый нывгæнæджы рахуыдта йæ радтæг адæмы патриот, æцæг ирон лæг æмæ курдиатджын нывгæнæг æмæ банысан кодта мадзалы нысаниуæг. «Гæбæраты Барисы хуызæн кадджын æмæ æгъдауджын адæймæгтæ нæм куы вæййы, не ‘хсæнад дæр уæд æрбангом вæййы. Абон цы бирæ нывтæ равæрдтам, уый дзурæг у ууыл æмæ нæ равдыстыты зал уæрæх кæй у æмæ, кæддæриддæр, зæрдиагæй æнхъæлмæ кæсæм æндæр нывгæнджытæм дæр», – банысан кодта университеты ректор.
Республикæ Хуссар Ирыстоны Культурæйы министр Зæгъойты Рада дæр раарфæ кодта нывгæнæгæн 70 азы юбилейы цытæн. Министры къухтæй ма нывгæнæг райста бузныджы фыстæг æмæ зæрдылдарæн æвзист монетæ Хетæгкаты Къостайы нывимæ.
Юбилярæн цы бирæ адæм раарфæ кодтой, уыдон æхсæн уыдис Республикæ Хуссар Ирыстоны Нывгæнджыты цæдисы сæрдар Битеты Алан дæр. Уый адæмы зæрдыл æрлæууын кодта Гæбæрайы фырты царды æфсæддон рæстæг, знагæй куыд хъахъхъæдта йæ райгуырæн бæстæ æмæ уыцы уæззау рæстæджытæ кæй равдыста йе сфæлдыстады. Уыдонæй цалдæр сты равдысты. Битеты Алан, арфæтимæ, йæ коллегæйы схорзæхджын кодта Кады грамотæйæ.
Юбиляры сбуц кæныны сæраппонд Хуссар Ирыстоны Президенты цур лæппуты хор, Къæбысты Сæрмæты къухдариуæгадæй, сæххæст кодтой цалдæр ирон зарæджы. Уый фæстæ адæм азылдысты æмæ аргъ кодтой нывгæнæджы куыстытæн.
Гæбæраты Барисы цымыдисон сфæлдыстадимæ базонгæ уæвынæн фадат уыдзæн 9-æм октябрмæ.
ЦХУЫРБАТЫ Лариса
Comments are closed, but trackbacks and pingbacks are open.