Республикæ Хуссар Ирыстоны Президент Бибылты Анатоли хайад райста Тыбылты Алыксандры номыл Хуссар Ирыстоны паддзахадон университеты студентты рæнхъытæм фыццагкъурсонты райсыны цытджын церемонийы.
Уæлдæр ахуыргæнæндоны сфæлдыстадон коллективтæ бацæттæ кодтой концертон программæ, кæцыйы хайад райстой фыццагкъурсонтæ. Уæлдайдæр зæрдæ барухс ис актерон факультеты студенттæй, кæцыты артистизм, музыкалон-хореографион зонындзинæдтæ, сценикон зæрдæскъæфдзинад дзурæг сты фидæны стыр потенциалыл.
Студентты раз раныхас кодта ХИПУ-йы ректор Тедеты Вадим.
«Æппæт нæ ахуыргæнджытæ æмæ кусджыты номæй уын ныфс æвæрын, мах алцы дæр кæй сараздзыстæм, цæмæй фондз азы фæстæ сымах университетæй рахизат профессионалтæй», – загъта уый.
Тедеты Вадим стыр аргъ скодта фыццагкъурсонты сфæлдыстадон курдиатæн, уæлдайдæр актерон факультеты куыстæн.
«Мæ зæрдæмæ тынг фæцыдысты нæ актертæ. Æз афтæ хъуыды кæнын, æмæ уыдзæн ахæм бон, æмæ нын сымах нæ зæрдæтæ рухс кæндзыстут Хуссарирыстойнаг драмон театры сценæйæ», – загъта уый.
Уымæй уæлдай ма Тедеты Вадим бузныджы ныхæстæ загъта Национ банчы Сæрдар Джио-ты Жаннæйæн инженерон-экономикон факультетæн æртæ стипенди сфидар кæныны тых-хæй.
Уый фæстæ ныхасы бар лæвæрд æрцыд паддзахады сæргълæууæгæн.
«Студентты рæнхъытæм райсыны бæрæгбон æрмæст фыццагкъурсонты нæу, фæлæ æппæт университеты. Алчи дæр рацыд уыцы цинхæссæг уысмтæ, куы йæ æмбарай, ныр ды кæй дæ фыццагкъурсон, стыр студентон бинонтæй сæ иу. Нæ уæлдæр ахуыргæнæндоны студентты æрттиваг цæстытæ, циндзинад, æнæмæтдзинад уынгæйæ, адæймаджы фæнды цыдæр рæстæг студент суæвын.
Сымахæй алчи дæр, цытджын студенттæ, уыдзæн уыйбæрц амондджын æмæ æнтыстджын, цасбæрцæй йæ сбæрæг кæнат уæхицæн, уымæй. Сымах æй хъуамæ æмбарат, уæ фидæны æнтыстытæ баст сты уæ ахуыргæнджытыл. Фæлæ уæ цард, уæ фидæн ис уæхи къухты», – загъта Бибылты Анатоли.
Президент банысан кодта, зæгъгæ, ХИПУ-йы рауагъдонтæ кусынц республикæйы бæрнон бынæтты. Фыццагкурсонтæн арфæйы ныхæстæ дзургæйæ, Бибылты Анатоли загъта, цæмæй ахуырмæ æмбаргæ ахаст дарой æмæ исой фылдæр зонындзинæдтæ.
«Иууыл сæйрагдæр у теоретикон зонæнтæ райсын, кæцытæ сымах спайда кæндзыстут практикæйы. Иууылдæр æй хъуамæ бахъуыды кæнат, университеты престиж баст кæй у йæ студентты ахуырады æмвæзадыл. Æмæ сымах уый куы æмбарат, уæд стыр тырнындзинадимæ ахуыр кæндзыстут зонады, стыр фæстиуджытæ исдзыстут, æмæ уыцы фæстиуджытæ та сты нæ ахуыргæнджыты куысты æвдисæн.
Ныфс мæ ис, ахуыргæнджытимæ æнгомдзинад уæлдæр кæндзæн университеты престиж æмæ нæ адæмы ахуырады æмвæзад. Равзарут уæ фæндаг æмæ аккаг ут ХИПУ-йы студенты ном хæссынæн, аккаг ут нæ паддзахадæн», – загъта уый.
Бибылты Анатоли ма банысан кодта, фыццаг-къурсонты æнтыстытæ, сæйраджыдæр, акте-рон факультеты студентты.
«Бæдæйнаг стут. Сымах мæ дисы бафтыдтат. Зæрдиагæй мын æхсызгон у, цыбыр æмгъуыдмæ ахæм æнтыстытæ кæй райстат.
Зынаргъ фыццагкурсонтæ, арфæ уын кæнын студентты рæнхъытæм райсыны тыххæй æмæ мæ ныфс ис, сымах алцы дæр кæй сараздзыстут, цæмæй уæ разы цы нысæнттæ æвæрут, уыдоны уын уа æнтыстытæ», – загъта уый.
Comments are closed, but trackbacks and pingbacks are open.