Студентон азтæ адæймаджы царды сты иууыл цымыдисондæр

Уæлдæр ахуырад райсынæн кæддæриддæр уыд стыр нысаниуæг. Адæймагæн уый бандавы йæ фидæныл, уымæ гæсгæ саразы йæ цард дæр. Нæ республикæйы цы иунæг уæлдæр ахуыргæнæндон ис, уый къæсæрæй дæр рахизы бирæ цæттæ кадртæ, æмæ сæ профессионалон архайды руаджы фæархайынц нæ республикæйы хæрзиуæгæн. Хуссар Ирыстоны паддзахадон университеты къухдариуæгады руаджы арæзт цæуыуа æппæт дæр, цæмæй дзы цы фæсивæд ахуыр кæны, уыдонæн æмбæлон уавæртæ уа. Уый та бæрæг у, сæ ахуырæй дарддæр ма практикон æмæ теоретикон зонындзинæдтæ куы райсынц, уымæй дæр.

Куыд æй зонæм, уымæ гæсгæ ныртæккæ университеты сæйраг бæстыхайы бынаты арæзт цæуы ног комплекс æмæ уый дзуапп дæтдзæн нырыккон домæнтæн. ХИПУ-йы коллектив æмæ студенттæ сæ куыст кæнынц къуындæг уавæрты  университеты æмдзæрæндоны, фæлæ куыд уынæм, афтæмæй уый дæр нæ бандæвта сæ ахуыры процесс æмæ гъæдыл.

Ацы ахуыры аз иннæ азтæм абаргæйæ нæ университетмæ ахуыр кæнынмæ æрбацыд   25 % фылдæр студенты. Уыдоныл цины æнкъарæнтимæ сæмбæлдысты сæ равзаргæ професситы сусæгдзинæдтæ сын чи бацамондзæнис, уыцы ахуыргæнджытæ. Ныр дыккаг мæй ахуыр кæнынц университеты æмæ зонгæ кæнынц æрвылбонон цардуаг æмæ куысты уавæртимæ.

Фыццагкъурсонты уæлдай хатт сбуц кæныны тыххæй сын 11-æм октябры нæ горæты киноконцертон зал «Чермен»-ы ауагътой мадзал «Посвящение в студенты», зæгъгæ.

Цытджын мадзалмæ æрбацыдысты нæ республикæйы Президент Тыбылты Леонид, Хицауады Сæрдар Хъуылымбегты Доменти, Парламенты Сæрдар Бибылты Анатоли, Ахуырад æмæ зонады министр Гасситы Натали æмæ нæ республикæйы иннæ разамонджытæ. Студентты бæрæгбонмæ ма æрбацыдысты скъолаты æмæ университеты ахуыргæнджытæ, се ‘ввахс адæм æмæ æхсæнады минæвæрттæ.

Мадзал райдыдта университеты студенттæн сæхи бацæттæгонд видеоæрмæгæй. Уым дзырд цыд университеты æрвылбонон цардыл. Уый фæстæ та экраныл æвдыстой видеоæрмæджытæ уæрæсейаг иуæй-иу университетты ректорты арфæтимæ. Сæ иу, Уæрæсейы стратегион иртасынæдты институты ректор Леонид Решетников арфæ ракодта Президент Тыбылты Леонид æмæ ХИПУ-йы ректор Тедеты Вадимæн. Студенттæн та йæ бафæндыдис, цæмæй сæ Райгуырæн бæстæйыл уой æнувыд.

Фæсивæдæн сæ царды сæйрагдæр сты æнувыддзинад, кад æмæ ахуырдзинад, – загъта Леонид Решетников. Уый ма банысан кодта, зæгъгæ, Уæрæсейы стратегион иртасынæдты институт дарддæр дæр ХИПУ-имæ æмгуыстад кæй кæндзæн.

Бæрæгбонон мадзалы ма бакастысты М. В. Ломоносовы номыл Мæскуыйы Паддзахадон университеты ректор Виктор Садовничийы арфæ дæр. Йæ арфæйы зæгъы, зæгъгæ, Хуссар Ирыстоны паддзахадон университет зындгонд у йæ цымыдисон историйæ, цыран ис бæрзонд квалификациджын коллектив, ис ын стыр æнтыстытæ алыгъуызон æнæмæнгхъæуæг кадртæ цæттæ кæныны хъуыддаджы. Нæ университеты студенттæн та бафæ-дзæхста, зæгъгæ, сымах кæддæриддæр хъуамæ сæрыстыр уат уæ университеты хорз тради-цитæй, ахуыргæнджытæй æмæ ацы уæлдæрахуыргæнæндоны бафæзминаг рауагъдонтæй.

ХИПУ-йæн куыд нæ университетимæ, афтæ бирæ æндæр уæрæсейаг раззагон университеттимæ ис æнгом æмæ хæларадон ахастытæ. Уый та ахъаз кæны Ирыстон æмæ уæрæсейаг адæмты ‘хсæн хæлардзинад фидардæр кæнынæн.

Фыццагкъурсонтæн ма арфæйы ныхæстæ загътой уæрæсейаг уазджытæ дæр: Патриотты цæдис æмæ æфсæддон-патриотикон организаци «Звезда»-йы президент, экономикон зонæдты кандидат Алексей Моргунов, социалон зонæдты доктор, эксперт æмæ æмбæстагон рæзты зонадон-аналитикон æмæ иртасæн центры къухдариуæггæнæг Максим Васьков æмæ Патриоттæ æмæ патриотикон организаци «Звезда»-йы цæдисы ростоваг хайады къухдариуæггæнæг Александр Иванча.

Бæрæгбонон мадзалы фыццагкъурсонтæн раарфæ кодта Хуссар Ирыстоны паддзахадон университеты ректор Тедеты Вадим. Уый ма бузныджы ныхæстæ загъта мадзалмæ æрбацæуæг цытджын уазджытæн. Фыццагкъурсонтæн Тедеты Вадим загъта, зæгъгæ, нæ республикæйы разамонджытæ се ‘ппæт дæр кæй æрбацыдысты. Уый нысан кæны, сымахæн кæй кæнынц стыр аргъ, Уæрæсейæ нæм кæй æрцыдысты уазджытæ, уый та нысан кæны, нæ университетæн кæй ис бирæ хæлæрттæ.

Уый ма йæ раныхасы банысан кодта, зæгъгæ, нæ университеты стыр æнтыст баст у, 90-æм уæззау азты йæ куыст чи нæ ныууагъта, уыцы æнувыд ахуыргæнджытимæ. Бузныг ма загъта, ивгъуыд азты университетæн чи къухдариуæг кодта, уыдонæн, афтæ ма абоны университеты коллективæн.

Университеты ректор Тедеты Вадим ма банысан кодта, зæгъгæ, нæ республикæйæ æддæмæ ацæугæйæ, æз сæрыстыр вæййын нæ уæлдæр ахуыргæнæндонæй æмæ ныфсджынæй фæтох кæнын йæ интерестыл.

Бирæ бузныджы ныхæстæ ма загъта, цы университеттимæ æмгуыст кæнынц, уыцы уæлдæр ахуыргæнæндæтты къухдариуæггæнджытæн.

Уый фæстæ фыццагкъурсонтæн цытджын æгъдауæй радта студентон билеттæ.

Зæрдиаг арфæйы ныхæстæ ма фыццагкъурсонтæн æмæ æппæт университеты коллективæн загъта Республикæ Хуссар Ирыстоны Президент Тыбылты Леонид:

– Нæ фыццагкъурсонтæн царды сæххæст ис сæ бæллицтæй иу, нæ университеты студенттæ кæй систы, уый тыххæй, уыдонимæ кусынц фæлтæрд ахуыргæнджытæ æмæ зонадон архайджытæ. Æз мæхæдæг дæр уæлдæр ахуырад райстон ацы ахуыргæнæндоны, раздæры институты.

Нæ университеты коллектив кæддæриддæр фæсивæды хъомыл æмæ ахуыр кæныны хъуыддагыл куыста зæрдиагæй. ХИПУ-йы ахуыр кæнгæйæ, не студенттæ райсынц хъæуæг зонындзинæдтæ æмæ æмбæлон дæсныйæдтæ, уыдон та сын бабæззынц сæ фидæны царды.

Президент Тыбылты Леонид ма банысан кодта, зæгъгæ, адæймаджы царды студентон азтæ сты иууыл цымыдисондæр. Уæлдæр ахуыргæнæндоны ахуыр кæнгæ-йæ, адæймаг ссары æцæг æмбæлтты. Не студенттæ ацы университеты æмбæлон зонындзинæдтæ райсынæй уæлдай ма ахуыр кæнынц нæ культурæйы бындурыл, традицитыл æмæ æгъдæуттыл. Нæ республикæйы сæргълæууæг ма стыр бузныджы ныхæстæ загъта Уæрæсейæ æрцæуæг уазджытæн дæр.

Бирæ арфæйы ныхæсты фæстæ Президент Тыбылты Леонид университеты хуыздæр студентты схорзæхджын кодта президентон стипендитæй.

Бæрæгбонон мадзалы ХИПУ-йы студенттæ, нæ республикæйы уæвæг 4-æм æфсæддон базæйы службæгæнджыты сфæлдыстадон къорд æмæ уæрæсейаг уазджытимæ равдыстой цымыдисон концерт.

ТУАТЫ Ларисæ