Нæ республикæйы иунæг уæлдæр ахуыргæнæндон йæ бакондæй абоны онг цы алыхуызон кадртæ цæттæ кæны, уыдон кæддæриддæр уыдысты æмæ сты нæ ныфс. Скъола каст фæуыны фæстæ алы æвзонг адæймагæн дæр йæ сæйраг мæт вæййы дæсныйад равзарын. Стæй йæ зæрдæмæ æввахс дæсныйад куы равзара, уæд ын ахуыры хъуыддаджы та стыр ахъаз фæвæййынц Хуссар Ирыстоны паддзахадон университеты фæлтæрд ахуыргæнджытæ. Уыдон кæддæриддæр сæ зонындзинæдтæ æнæауæрдонæй лæвар кæнынц студенттæн.
Нæ кадрты куырдадзмæ ацы аз цы фыццагкъурсонтæ æрбацыдысты ахуыр кæнынмæ, уыдоны цытæн университеты актон залы уагъд æрцыд хъæлдзæг студентон изæр. Хуынд æм æрцыдысты нæ республикæйы Президент Бибылты Анатоли, Хицауады Сæрдар Пухаты Эрик, Парламенты Сæрдар Гасситы Петр, Ахуырад æмæ зонады министр Гасситы Натали, Культурæйы министр Зассеты Жаннæ, горæты администрацийы сæргълæууæг Коцты Алан, æхсæнады минæвæрттæ. Мадзалы уазджытæ ма уыдысты Уæрæсейы Федерацийы Музыкæ, кино æмæ телеуынынады архайджыты цæдисы сæрдар Луис Христиан Торрес æмæ ацы Цæдисы уæнг, æппæтуæрæсейаг кинофестивал «Сезон любви»-йы продюсер Сергей Переверзев.
Мадзаламонджытæ студентон изæр байгом кодтой арфæйаг ныхæстæй æмæ цыбыртæй æрдзырдтой университеты сырæзты историйыл, йæ абоны æмæ раздæры куысты уавæрты тыххæй, студенттæ се ‘рвылбонон цард куыд æрвитынц, æппæт уыдæттыл. Уый фæстæ æрæмбырд-уæвджыты раз бузныджы æмæ арфæйы ныхæстæ загъта ХИПУ-йы ректор Тедеты Вадим. Уый сæрмагондæй арфæ ракодта фыццагкъурсонты традицион бæрæгбоны цытæн. Фыццагкъурсонтæ уæлдæр ахуырад райсынмæ кæй æрбацыдысты æмæ университеты цардæй кæй цæрынц, стæй сын æппæт уавæртæ дæр арæзт кæй цæуы сæ ахуыры хъуыддаджы, уый фæдыл йæ ныхас уыд Тедеты Вадимæн. «Бузныг уын, нæ зы-наргъ фыццагкъурсонтæ, уæлдæр ахуырад райсыны тыххæй Хуссар Ирыстоны паддзахадон университет кæй равзæрстат, уый тых-хæй. Æз уын дзырд дæттын, мах æппæт дæр кæй араздзыстæм, цæмæй райсат хорз, гъæдджын ахуырад, цæмæй уæ фондзазон студентон цард уа цымыдисон», – загъта университеты ректор. Уый фæстæ Тедейы фырт фыццагкъурсонтæн радта ахуыры нысæнтты чингуытæ.
Мадзалы фыццагкъурсонтæ цытджын æгъдауæй дзырд радтой Хуссар Ирыстоны паддзахадон университеты студентты рæнхъытæм бахизгæйæ хорз зонындзинæдтæ кæй райсдзысты, æмæ республикæйæн фидæны аккаг æмбæстæгтæй кæй басгуыхдзысты, уый сæраппонд.
Фыццагкъурсонтæн сæ бæрæгбоны тыххæй раарфæ кодта Президент Бибылты Анатоли дæр. Уый, фыццаджыдæр, æрсидт студенттæм, цæмæй сын цы зынаргъ рæстæг ис, уый æнæхъуаджы ма æрвитой æмæ ахуыр кæной хорз. «Кæддæриддæр æй дзырдтон æмæ дзурын, зынаргъ фыццагкъурсонтæ, тырнут фылдæр зонындзинæдтæ райсынмæ. Зонын æй, уый зын у, фæлæ у æнæмæнг хъуыддаг нæ республикæйы хорз фидæны хæрзиуæгæн æмæ уæхицæн дæр», – банысан кодта Президент Бибылты Анатоли.
Дарддæр бæрæгбонон мадзалы нæ бæстæйы сæргълæууæг университеты хуыздæр студентты скодта президентон стипендиты аккаг, кæцы ныртæккæ у авд мин сомы бæрц.
Бæрæгбонон изæры фыццагкъурсонтæн загъд æрцыдысты бирæ арфæйаг æмæ зондамонæн ныхæстæ. Уыдонæн бацæттæгонд æрцыд хиирхæфсæн концертон программæ, цыран сæ аивадон арæхстдзинад æвдыстой студенттæ сæхæдæг.
Кæронбæттæны студенттæ зæрдылдарынæн сæ къамтæ истой Президент Бибылты Анатолиимæ.
Цхуырбаты Ларисæ
Comments are closed, but trackbacks and pingbacks are open.