Уæззау рынчын ахæссыны фæстæ цардæй ахицæн æхсæнадон архайæг, хуссарирыстойнаг зынгæ актрисæ, æфсæддон уацхæссæг, видеоазфыссæг, Паддзахадон æдасдзинады комитеты дæлбулкъон Беппиты Изольдæ Владимиры чызг.
Райгуырд Карелы районы. 1984 азы каст фæцис Ставрополы педагогон институт. Райста уырыссаг æвзаг æмæ литературæйы ахуыргæнæджы дæсныйад. Райгуырæн къуым адджын у, æмæ 1972 азы æрцыд Цхинвалмæ, кусын райдыдта Хетæгкаты Къостайы номыл Хуссар Ирыстоны паддзахадон драмон театры гуырдзиаг труппæйы, цыран сæххæст кодта ахсджиаг ролтæ æмæ йæ курдиатæй цæстæвæрæн фæцис гуырдзиаг театрдзаутæн. Фæлæ Советон Цæдисы ныппырхимæ цард схæлæттаг, гуырдзиаг труппæйы артисттæ дæр ирæтты ахасты равдыстой се ‘цæг цæсгом æмæ сусæгæй ацыдысты Хуссар Ирыстонæй. 1992 азы Изольдæ кусын райдыдта РХИ-йы Фæсарæйнаг хъуыддæгты министрады, уый фæстæ та куыста Фидауынгæнæг тыхты мыхуыры хъуыддæгты фæдыл хайады, паддзахадон æдасдзинады комитеты.
Театры куысты æмрæнхъ ма уый уыд зынгæ видеооператор, кæцы сарæзта республикæйы ногдæр историйы цымыдисон хроникæ. Æндæр æмæ æндæр азты куыста РХИ-йы информаци æмæ мыхуыры паддзахадон комитеты, уыд республикæйы фыццаг президенты пресс-секретарь, афтæ ма куыста Хъахъхъæнынады министрады пресс-службæйы дæр. Уыцы рæстæджы йын бантыст Хуссар Ирыстоны цæуæг ахсджиагдæр цауты архив саразын. Йæ архивты æфснайд сты, гуырдзиаг-ирон хæсты рæстæджы фæмардуæвæг хæстон лæппуты фæстаг фæндагыл куыд фæндараст кодтой, уыцы кадртæ, Зары æмæ Ереды трагедиты цауты тыххæй видеокадртæ æмæ бирæ æндæр хъæуæг цауты фæдыл æрмæджытæ. Йæ ахсджиаг архайды тыххæй хорзæхджын æрцыд бирæ пад-дзахадон хорзæхтæй, уыцы нымæцы Хæлардзинады орденæй дæр.
Дæргъвæтин гуырдзиаг-ирон хæсты рæстæджы уый алыхатт дæр уыд йæ хæстæфхæрд адæмы цур. Æвдисæн уыд 2008 азы августы хъысмæтскъуынæн цаутæн. Йæхиуыл бавзæрста Хуссар Ирыстоны ныхмæ Гуырдзыстоны агрессийы æппæт рæстæджытæ. 20 азæй фылдæр бæллыд йæ уарзон Ирыстоны сæрибар æмæ хæдбарæй фенынмæ. Æмæ йын хæдбар Ирыстоны кæд 14 азы рацæрын йедтæмæ нæ бантыст, уæддæр йе ‘нусон бæстæм цæугæйæ, фæстæмæ йæ радтæг, йæ хæстæфхæрд Ирыстонмæ йæ зæрдæ нал æхсайдзæн.
Беппиты Изольдæйы чи зыдта, уыдон æй иууылдæр бахъуыды кодтой куыд йæ радтæг адæмы æцæг патриот æмæ ирон уæздан сылгоймаг, афтæмæй. Гуырдзиаг-ирон хæсты рæстæджы уый хайад иста алыгъуызон мадзæлтты, уыцы нымæцы нейтралон территоритыл гуырдзиаг-ирон делегациты фембæлдтыты, цыран активон хайад иста карз дискусситы æмæ афтæмæй хъахъхъæдта йæ уарзон Ирыстоны интерестæ. Егъау хайбавæрд бахаста республикæйæн уæззау рæстæджыты информацион блокадæ атонынмæ, Хуссар Ирыстоны паддзахадон телерадиокомпани «ИР»-ы гуырдзиаг æвзагыл сæрмагонд алæвæрд уадзгæйæ. Йæ алæвæрды фæрцы уый рæстдзинад хъусын кодта гуырдзиаг аудиторийæн, кæцы, кæй зæгъæн æй хъæуы, нæ цыд Гуырдзыстоны фашистон къухдариуæгады зæрдæмæ. Æгæрыстæмæй, уыдон архайдтой, цæмæй сæ къухтæм бахаудаид, дунейæн рæстдзинад чи дзырдта, уыцы ирон сылгоймаг.
2018 азы Изольдæ кусынмæ фæстæмæ æрбацыд драмон театры видеоархивты сæргълæууæгæй æмæ йæ царды фæстаг бонтæм дæр куыста уым. Беппиты Изольдæйы рухс ном никуы ферох уыдзæн Ирыстоны адæмæй. Мæрдты дын хай уыдзæн дзæнæтæй, уæлæуыл баззайдзæн дæ ном!
Рухсаг у!
Хетæгкаты Къостайы номыл Хуссар Ирыстоны паддзахадон драмон театры æмæ газет «Хурзæрин»-ы редакцийы коллективтæ
Comments are closed, but trackbacks and pingbacks are open.