Æмгары мысгæйæ

2020 азы 8-æм январы 70 аздзыдæй йæ цардæй ахицæн  уарзон æмгар, историон зонæдты кандидат, æхсæнадон архайæг Харебаты Владимир Иваны фырт.

Уый райгуырд 1949 азы 18-æм апрелы Ленингоры поселочы. Астæуккаг ахуырад райсыны фæстæ, 1971- азы каст фæцис Хуссар Ирыстоны педагогон институты историон-филологон факультет. Каст ма фæцис ЦИПУ-йы юридикон факультет дæр æмæ райста юрист-бараддзонынады дæсныйад. Зыдта фондз æвзаджы. 2006 азæй уыд ЛДПР-ы уæнг.

Харебаты Владимир куыста Хуссар Ирыстоны Мидхъуыддæгты областон управленийы хистæр инспекторæй. Йæ ном зындгонд у куыд шашкæтæй дæсны хъазæг, аф-тæ. Уыд шашкæтæй Советон Цæдисы æмæ Уæрæсейы Федерацийы спорты мастер, ФИДЕ-йы уырыссаг æмæ сæдæчырæгон шашкæты мастер. Афтæ ма уыд РЦИ-Аланийы бирæ хæттыты чемпион, Советон Цæдисы æмæ Советон Гуырдзыстоны чемпионатты хайадисæг æмæ призер, Уæрæсейы Федерацийы кубок рамбулыны сæраппонд ерысты уæлахиздзау, дунеон чемпионатты æмæ ерысты призер æмæ активон архайæг. Уыд Уæрæсейы Хуссар Федералон зылды дыууæ хатты чемпион, Уæрæсейы Цæгат Кавказы зылды цыппар хатты чемпион, шашкæты композийы фæдыл дунеон турнирты хайадисæг. Уыимæ ма уыд шашкæтæй Хуссар Ирыстоны гроссмейстер. Нымад цыд Кавказы удæгас легендæтæй сæ иуыл. Йæ ном сыгъзæрин дамгъæтæй фыст æрцыд  уырыссаг шашкæы историйы. Уый уыд иунæг спортсмен, кæцы райста «Мастер ФИДЕ»-йы титул. Йе стыр æнтыстыты, фæсивæды æмæ рæзгæ фæлтæры ‘хсæн æнæниз цардуаг пропагандæ æмæ агитаци кæныны, афтæ ма шашкæты рæзт популярон кæныны тыххæй хорзæхджын æрцыд Кады дипломты серийæ. Йæ уацхъуыдтæ арæх мыхуыр цыдысты журналтæ «Новости шашек», «Шашечный вестник России», «Шашки ЮФО России» æмæ æндæр рæтты.

Харебаты Владимир архайдта эпиграфикæйæ, рагон тексттæ расшифровкæ кæнынæй. Аргъ-уаногуырдзиаг синаксарийæ ратæлмац кодта Руставелийы автобиографи. У чиныг «Грузинская академия наук на суде истории»-йы автор. Ацы чиныг у ивгъуыдмæ историкты цæстæнгасы фæфæлдæхт, кæцы ивы Централон Кавказы Хуссар фахсы ирæтты æрæгмæйы фæзынды тыххæй хъуыды.

Владимиры амæлæты тыххæй йæ бинонтæ æмæ æввахс хиуæттæн мæсæллæйы ныхæстæ загъта Уæрæсейы шашкæты федераци.

Харебаты Владимир йæ фæстæ ныууагъта йæ рухс ном æмæ рох никуы уыдзæн, чи йæ зыдта, уыдонæй.

Рухсаг у!

Æмгæртты къорд