НАНИТЫ ВИТАЛИ

Уæззау рынчыны фæстæ æнæрæстæджы йæ цардæй ахицæн РХИ-йы адæмон артист, Хуссар Ирыстоны паддзахадон драмон театры актер Наниты Витали.

Наниты Витали 1983 азы каст фæцис Цхинвалы музыкалон ахуыргæнæндоны актерон дæсныйады факультет æмæ уæдæй йæ амæлæты бонмæ удуæлдай лæггад кодта ирон театралон аивадæн. Бирæ ролтæ сæххæст кодта сценæйыл, куыд дунеон, афтæ ирон классикты пьесæтæм гæсгæ æвæрд спектаклты. Ахæмтæ сты Уырыймæгты Езетханы «Сæниат»-ы Дзодзæбе, Гаглойты Владимиры «Тугæйдзаг чындзæхсæв»-ы Дотти, Шекспиры «Юлий Цезарь»-ы Касси, Мольеры «Бынатмæбырæг»-ы хуыйæджы роль, Остъаты Аланы «Фæстаг æвдисæн»-ы  Уалыты Никъала, Роман Габриа «Къоста»-йы – дохтыр Потоцкий, Гаглойты Владимиры «Ныййарæджы кадæг»-ы Тæга, Джусойты Нафийы «Азау æмæ Таймураз»-ы Бардзин æмæ æндæртæ.  Наниты Виталийы ирон сценæмæкæсæг зæрдæбынæй айста комедион ролтæ æххæст кæнгæйæ дæр.  Цæвиттон, Уанеты Владимиры «Шахматтæ»-йы Дудар, Хуыгаты Геор æмæ Хуыбецты Раяйы «Софийы зарæг»-ы – Майрæм, «Ды мæ куы уарзай» – Салам, Хаситы Вильгельмы «Расыггæнджытæ»-йы Созыр, Айларты Асæхы «Робинзон-тæ»-йы – Андруш æмæ бирæ æндæртæ.

Наниты Витали хорзæхджын уыд дзæвгар паддзахадон æмæ ведомствæйон  хорзæхтæй. Фæлæ йæ царды иууыл бæрзонддæр хорзæхыл нымадта адæмы хорзæх, сценæмæкæсджыты, ирон аивадæн аргъгæнджыты мидбылхудт æмæ къухæмдзæгъд.

Аивад у фыдæбон, кусын дзы фæхъæуы æмæ ахæм уыд нæхи Виталий. Царды нæ агуырдта æнцонвæндæгтæ. Курдиат æмæ адæймагдзинад дæр æрдзæй лæвæрд æрцæуынц адæймагæн. Уыдонæй хайджын уыдис Витали. Хистæртимæ хистæр уыд, кæстæртимæ – кæстæр. Йæ дзыхæй йын гуымир, тызмæг ныхас ничи фехъуыстаид. Алчи дæр æм каст хион, удæн æввахс адæймаджы  цæстæй, йæ фæлмæн ныхас, йæ худгæ цæстæнгас – ахæмæй баззайдзæн нæхи Нани, чи йæ зыдта, кæй æхсæн цард, кæимæ куыста, уыдоны зæрдæты.

Хуссар Ирыстоны 

Паддзахадон драмон 

театры коллектив