УÆЗЗАУ АТЛЕТИКÆ

Спорты сæрдыгон хуызтæй æппæтуæрæсеон спартакиадæйы фæлгæтты 25-28 августы Мæскуыйы уагъд æрцæудзысты ерыстæ уæззау атлетикæйæ. Уым хайад райсдзысты ирон спортсментæ дæр. Сæ цæттæдзинад фæлвардзысты Наниты Тимур, Хъесаты Георги, Наниты Арсен, Рæмонты Сæрмæт, Соттиты Яна, Чилæхсаты Мадинæ æмæ Гуссалты Заринæ.

Æппæтуæрæсеон спартакиадæ уагъд æрцæудзæн 10-æм августæй 2-æм октябрмæ. Ерыстæ уагъд цæудзысты Уæрæсейы 11 субъекты спорты 40 хуызæй. Хайад дзы райсдзысты бæстæйы тыхджындæр спортсментæ.

Спартакиадæ уагъд цæуы, уæрæсейаг спортсментæн дунеон ерысты хайад райсыны фадат кæй нæй, уый тыххæй.

 

БОКС

Зындгонд ирон боксер Гасситы Мурат 26 августы Белграды фембæлдзæн америкæйаг боксер Карлоус Уэлчимæ. Ныридæгæн Мурат ис Сербийы. Уый тыххæй фехъусын кодта «Спорт-Экспресс»-æн.  «Ныртæккæ мæхи цæттæ кæнын Сербийы. Тох ауадзынæн ацы бынат æвзæрст хуымæтæджы не ‘рцыд. Ныртæккæ у уæззау рæстæг. Фæлæ махæн хорз æмгæрттæ ис Сербийы боксы федерацийы. Стæй ардæм Уæрæсейæ бирæ адæм æрцæудзæн. Уымæн æмæ ардæм æнцон у æрцæуын. Мæхæдæг ацы бæстæмæ куы æрцыдтæн, уæд мæхи  банкъардтон,  цыма мæхи хæдзары дæн, ома,  Уæрæсейы дæн. Ам бирæ хæларзæрдæ адæм ис, мæхи уазæгæй нæ хатын», – загъта Гасситы Мурат.

Боксер ма йæ хъуыдытæ загъта йæ ныхмæлæууæджы тыххæй.

«Мæ дебютон тохæй райдайгæйæ  мын алкæцы ныхмæлæууæгмæ дæр  ис серьезон ахаст. Алкæимæ дæр сæ мæхи цæттæ кæнын æмхуызонæй. Ныр иу тохæй иннæмæ мæ ныхмæлæуджытæ кæндзысты тыхджындæрæй тыхджындæр. Æз æй зонын мæ бон куыд у бокс кæнын. Ныртæккæ мæ хæс у мæхимæ, ме ‘нæниздзинадмæ мæ хъус дарын,  тренировкæтæм серьезон ахаст дарын æмæ алкæ-цы ныхмæлæууæджы дæр æмбулын», – банысан кодта Мурат.

***

 

Екатеринбурджы футболон клуб «Урал» йæ командæмæ фæхуыдта зындгонд ирон футболист Зæгъойты Аланы. Командæ Аланимæ баныхæстæ уагъта контрактыл къухтæ æрфыссыны тыххæй, фæлæ дыууæ фарс дæр финансон фарстыл не сразы сты.

Зæгъойты Алан ныртæккæ ис сæрибар агенты статусы. Ацы аз йæ контракт фæцис ÆЦСК-имæ, кæцыйы хъазыд 2008-æм азæй фæстæмæ.

Хуриты Батрадз