Гуырдзиаг лӕгсырдтӕ ирон адӕмӕн хӕсты рӕстӕджы цы хъизӕмӕрттӕ бавзарын кодтой, цы ӕвирхъау цаутӕ уыдтой ӕрвылбон дӕр, уыдон зӕрдӕйӕ нӕ рох кӕнынц, кинонывтау сыстынц нӕ цӕстыты раз. Ӕниу, уыдонӕн нӕй ферохгӕнӕн, уымӕн ӕмӕ нӕ знаг милмӕ систа, ӕдзух нын нӕ адӕмы мӕлӕты дзыхмӕ ӕппӕрста.
2008-ӕм азы 8 августы ӕхсӕвы нӕ горӕты Интернационалон уынджы 14-ӕм хӕдзары бинонтӕ нырма бадгӕ кодтой, кӕд сын баулӕфыны афон уыд, уӕддӕр. Ӕхстытӕ-иу куы фӕсабыр сты, куы та тыхджын срӕмыгъдтытӕ хъустӕ къуырма кодтой. Фӕлӕ фӕстагмӕ ӕхстытӕ бынтон банцадысты, адӕмы ныфс бацыд, уымӕн ӕмӕ М. Саакъашвили телеуынынады ныфсӕвӕрӕн ныхӕстӕ загъта, ирон адӕм, тыхсгӕ мауал кӕнут, дарддӕр хӕст кӕй нал уыдзӕн, уый тыххӕй. Фӕлӕ знагыл ӕууӕнк кӕд уыд ӕмӕ та иурӕстӕджы скусын кодтой сӕ хотыхтӕ. Уыдаид ӕхсӕвы 12 сахаты, афтӕ хӕлӕн ӕрмӕг куы ӕрхауид Галуанты Иналы цӕхӕрадоны, хӕдзар нынкъуыст, рудзгуытӕ нызгъӕлӕнтӕ сты. Инал уайтагъд балыгъд йӕ ныййарӕг мадмӕ, кӕд ыл хуысгӕ уатмӕ скъапп рафӕлдӕхт, уӕддӕр дзы рисгӕ ницы фӕкодта. Хуыссӕнтӕмӕбӕрзӕны йӕ атыхта ӕмӕ йӕ ныскъӕфта ныккӕндмӕ. Сылгоймаг уыд Стыр Фыдыбӕстӕйон хӕсты хайадисӕг, немыцаг тыхӕйисджыты ныхмӕ тох кæнгæйæ, йæ бæллиц уыд, цæмæй советон адӕм сабыр арвы бын цӕрой…
Уыцы ӕхстыты фӕстиуӕгӕн дыккаг ӕхсӕв йӕхи мӕгуыраудӕр райдыдта хатын. Фӕлӕ уӕддӕр Иналы ӕмкъай Хъуылымбегты Катя ӕвыдӕй нӕ баззад, сӕмбӕлд ыл фыдгулы нӕмыг. Йӕ галиу цонг тынг бахъыгдард. Куыддӕрты йӕ фӕхӕццӕ кодтой дохтыртӕм, уый фӕстӕ йӕ аластой Дзӕуджыхъӕумӕ ӕндӕр рынчынтимӕ. Фӕлӕ бынтон мӕгуырау уыд йӕ уавӕр ӕмӕ йын Мӕскуыйы дохтыртӕ цасдӕр рӕстӕг бакодтой ӕнӕмӕнгхъӕуӕг ӕххуыс. Фыдбылызы фӕцӕйхауд Инал йӕхӕдӕг дӕр.
Уӕрӕсейы Фидауынгӕнӕг тыхтӕ ӕрцӕуынц, зӕгъгӕ, уый куы фехъуыстой Хуссар Ирыстоны цӕрджытӕ, уӕд ма сӕ цинӕн кӕрон кӕм уыд, ӕхсызгондзинады уылӕнтӕ хъазыд сӕ цӕсгӕмттыл. Знаг уыцы хабар куы фехъуыста, уӕд дæр йæ хæстон архайдтытæ нæ ныууагъта. Иу ахæмы Галуанты бинонтæм бацыд сæ сыхаг Тыджыты Гаврил, акувӕм нӕ хӕрзгӕнджытӕн, зӕгъгӕ. Уыцы рæстæджы фӕцыд тыхджын гуыпп сӕ тӕккӕ раз. Цыдæр амондæн æвыдæй аивæрзтысты. Иналы цӕрӕн хӕдзар ӕхстыты фӕстиуӕгӕн тынг бахъыгдард ӕмӕ бинонтӕ цасдӕр рӕстӕг сӕ бонтӕ ӕрвыстой зын уавӕрты.
Хуыбиаты Никъала
Comments are closed, but trackbacks and pingbacks are open.