Спорт

ШТАНГÆ

Иууыл тыхджындæр ирон штангисттæ сæхи цæттæ кæнынц Уæрæсейы чемпионатмæ. Цæттæгæнæн сбортæ цæуынц УФ-йы Спорты министрады командæтæ цæттæгæнæн центр «Юг Спорт»-ы. Ам тренировкæ кæнынц Æлбегаты Руслан, Тъуриты Тима, Хъайтыхъты Аллæ æмæ Мстиаты Дианæ сæ тренертæ Золойты Хъазбег æмæ Гасситы Русланы сæргълæудæй.

Ацы аз Æлбегаты Руслан абсолютон уæзы категорийы ссис Цæцæны республикæйы фыццаг президент Ахмат Кадыровы номыл турниры уæлахиздзау. Уый фенын кодта 435 кг (190+245) бæрæггæнæн. Ацы турниры сылгоймæгты ‘хсæн  абсолютон уæзы категорийы та æвзист майдан рамбылдта Тъуриты Тима 222 кг  (100+122) .

Уæрæсейы чемпионат уагъд цæудзæн 3-10 сентябры Ростовы.

Уыцы рæстæджы хорз информаци фехъусын кодта УФ-йы уæззау атлетикæйы федерацийы президент Максим Агапитов. Уый куыд загъта, афтæмæй æнæуæлæмхас уавæртæй Уæрæсейæ ист æрцæудзæн дисквалификаци. Уæззау атлетикæйы æхсæнадæмон федерацийы (IWF) УФ-йы уæззау атлетикæйы федерацийы бартæ сæ тыхы бацæудзысты 19 октябры.

УФ-йы уæззау атлетикæйы федераци дисквалификацигонд æрцыд 2017м азы 30 сентябры. Уæд IWF æххæстгæнæг комитет сæрмагонд къамисы докладмæ гæсгæ уынаффæ рахаста Уæрæсейы æмæ ма ноджы 8 национ федерациты дисквалификацийы фæдыл, кæцыты спортсментæ 2008 æмæ 2012 азты фехæлдтой антидопингон уагæвæрд.

Банысан кæнын хъæуы уый, æмæ Æхсæнадæмон Олимпион комитет нырма уынаффæ кæй нæ райста 2024 азы хъæзтыты программæмæ уæззау атлетикæ бахæссыны фæдыл.

БОКС

Ирон боксер Гасситы Мурат уыдзæн Боксæй æппæтдунеон суперсерийы (WBSS) дыккаг сезоны запасы хайадисæг, – уый тыххæй фехъусын кодта Уæрæсейы боксы федерацийы генералон секретарь Умар Кремлев.

«Гасситы Муратæн фæдзæбæх кæны йæ травмæ. Уый уыдзæн дыккаг сезоны запасы», – загъта Кремлев.

WBSS дыккаг сезоны 90,7 кг уæзы категорийы сæйраг хайадисджытæ суыдзысты уæрæсейаг боксертæ Руслан Файфер æмæ Максим Власов.

Хуриты Батрадз