Сабырад зынаргъ кæмæн у, сыгъдæг цъæх арвы бын цæрынмæ чи бæллы, уыдонæн уарзон у Фыдыбæстæ хъахъхъæнæджы бæрæгбон æмæ йæ æрвылаз дæр банысан кæнынц цытджын æгъдауæй. Афтæ уыд æрæджы Цхинвалы районы Къостайыхъæуы астæуккаг скъолайы дæр. Ахуырдзауты арæхстдзинадыл цин кодтой куыд ныййарджытæ, афтæ ма районы ахуырады хайады кусджытæ дæр. Мадзаламонджытæ зæрдиаг арфæ ракодтой æрæмбырдуæвджытæн æмæ уый фæстæ æрдзырдтой, Фыдыбæстæ цæсты гагуыйау чи хъахъхъæны, адæмы æнцойадмæ йæ хайбавæрд чи хæссы, хæдбардзинад æмæ сабырдзинадыл чи тыхсы, уыцы æвзонг лæппуты тыххæй.
Хуссар Ирыстоны сабыруарзаг цæрджытæ ивгъуыд æнусы 90-æм азтæй фæстæмæ дзæвгар хъизæмæрттæ бавзæрстой, уыцы тохты нæ сагсур лæппутæй бирæ бацарæфтыд сты фыдгулы къухтæй. 23 ноябры бирæнымæц автобустæ æмæ рог хæдтулгæтыл 40 мин адæймагæй фылдæр æрбафсæрстой Цхинвалы горæтмæ. Фæлæ сæ нæ хъæбатыр æмæ ныфсхаст лæппутæ не рбауагътой мидæмæ. Уыцы зын рæстæджы æхсардзинады цæвиттон равдыстой Джиоты Алан (Парпъат), Коцты Гри, Хуыбылты Валери, Джиоты Владик, Тасойты Валери, Къæбысты æфсымæртæ Азæмæт æмæ Ацæмæз æмæ бирæ æндæртæ. 1991 азы 18 марты та Ереды хъæуы удæгасæй баныгæдтой ницыгæнæг адæмы. Æбуалгъ уыд 1992 азы 20 майы бон дæр Хуссар Ирыстоны адæмæн. Сабыр æмæ æнæаххос лигъдæттæн Зары фæндаг уыд царды фæндаг, фæлæ афтæ нал рауад, уыцы аз 20 майы уæзласæн машинæйы Цæгат Ирыстонмæ чи цыдысты, уыцы æнæаххос зæрæдтæ, сылгоймæгтæ æмæ сывæллæттæн. Æппæты хистæрыл цыд 75 азы æмæ се ппæты кæстæрыл та æрмæстдæр 12 азы. Нæ батæригъæд кодтой цыфыддæр хотыхджынтæ уыдонæн дæр æмæ сыл баталынг кодтой сæ рухс дуне – æдæппæт 36 æнæаххос адæмы, уыдон хсæн уыд 12-аздзыд цардбæллон Къæбысты Батрадз дæр. Гуырдзиаг хотыхджынты къухæй фæмард сты Къостайыхъæуæй Хуыбиаты Ибрагим 1991 азы, 1993 азы уалдзыгон быдырон куыстытæ æххæст кæныны рæстæджы та Хацырты Нодар, Лохты Георги æмæ Хуыбиаты Серги, 2008-æм азы 7 августы сæ рухс дуне баталынг кодтой Елбачиты Настя, Мамиты Тамарæ, Мамиты Петр, Тедеты Никъала, Томайты Æхсар, Мæлдзыгаты Лаврент, Къæбысты Ирбегæн. Фæстæдæр Украинæйы хæсты йæ хъæбатырдзинады тыххæй йæ амæлæты фæстæ Уæрæсейы Президент В. Путин «Хъæбатырдзинады орден»-æй æмæ нæ республикæйы Президент «Уацамонгæ»-йæ схорзæхджын кодта Лохты Алимы. Йæ цард Фыдыбæстæйы тыххæй чи радта, уыдон ном æрæмбырдуæвджытæ ссардтой иу уысм æдзæмæй алæууынæй.
Мадзалы уыдысты æмæ йæ хайадисджытæн зæрдиаг арфæтæ ракодтой, нæ адæмы хъæбатырдзинады тыххæй æрдзырдтой Парламенты депутат Бесаты Зитæ æмæ Цхинвалы районы администрацийы сæргълæууæг Бæззаты Инал. Сæхи рады ахуыргæнинæгтæ дæр Фыдыбæстæ хъахъхъæнæджы боны цытæн дзырдтой æмдзæвгæтæ, акодтой цалдæр зарæджы, кафджыты къорд та сæххæст кодтой ирон кæфтытæ «Хонгæ», «Хæххон кафт» æмæ æндæртæ. Сæхи активонæй равдыстой Тъотъоты Марик, Хуыбиаты Эдуард, Марат, Азæмæт, Аделинæ æмæ æндæртæ.
ХУЫБИАТЫ Никъала
Comments are closed, but trackbacks and pingbacks are open.