Куыст куы уарзай, дæ хъуыддагыл иузæрдион куы уай, уæд ахæм фæллойгæнæгæн кæддæриддæр йæ фæстиуæгджын архайдæй рухс кæндзæн йæ зæрдæ. Ахæм хæдзардзин æмæ намысджын кусæгыл нымад у Цхинвалы районы Тъбеты хъæуы цæрæг Цхуырбаты Иван дæр. Ацы хæдзарвæндагæн фыдæлтæй баззад уæхскуæзæй фæллой кæнын æмæ уыцы раппæлинаг хъуыддагыл йæ зæрдæ нæ ивы Иван дæр. Уый цалдæр азы размæ ахъуыды кодта фермерон хæдзарад саразыныл, æнтысгæ дæр ын бакодта уыцы зын, фæлæ арфæйаг хæс сæххæст кæнын æмæ ныр 15 азы дæргъы лæуд у арфæйаг куыстыл. Фæстæдæр кусынмæ райста йæхи хуызæн куыстуарзаг лæппу Бибылты Мелсы æмæ сæ дыууæ дæр æнæзæрдæхудтæй æххæст кæнынц, афæдзы алы рæстæджы дæр сæ разы цы хæстæ вæййы скъуыддзаггæнинаг, æппæт уыдон.
Районы хæдзарадтæй куысты æнтыстытæ кæмæн вæййы, уыдоны ‘хсæн кæддæриддæр раззагдæрты рæнхъы вæййы «Тъбет»-ы фермерон хæдзарад дæр. Ныртæккæ хæдзарады цы стуртæ ис, уыдон сты хæрзхуыз, уымæн æмæ сæм зилынц æмбæлон æгъдауæй. Хорз боныгъæдты фæхизынц сæрвæты, фæлæ ацафон æрмæст уый æвджид нæ вæййынц æмæ сæ кæвдæс дæр дзаг вæййы хæрзгъæд холлагæй. Родтæ уал сæм нымадæуы 13 æмæ уыдоны уындæй дæр рухс кæны зæрдæ. Хæдзарад цалдæр азы размæ самал кодта дуцæн аппарат æмæ сын уый рог кæны сæ куыст. Дуцгæ уал цы æхсыр кæнынц, уый продукци реализаци кæнынц нæ горæты æмбæстæгтæн.
«Тъбет»-ы хæдзарад ма кæны зæххы куыст дæр, фидаргонд сæм цы зæххы фадыг ис, уым байтауынц æфсирон культурæтæ. Куыстытæ æнæкъуылымпыйæ æмæ агротехникæйы домæнтæм гæсгæ æххæст кæ-нынæн сын ахъаз кæны, цы хисæрмагонд техникæ самал кодтой, уый дæр. Цæвиттон, хуым кæныны рæстæджы Бибылы-фырт сбады хъомысджын тракторыл æмæ цыбыр рæстæгмæ мæр афæлдахы. Афтæ у ныр дæр, фæззыгон куысты фæстæ мæр сфæлмæн æмæ куыддæр тауынæн сбæзза, афтæ дзы байтаудзысты сысджы æмæ хъæбæрхоры культурæтæ. Ифтонг сты тауинагæй дæр.
ХУЫБИАТЫ Никъала
Comments are closed, but trackbacks and pingbacks are open.