Августы мæйы БАМ-ы районы æрæвнæлдтой инженерон хызæгты реконструкци кæнынмæ. Ахæм куыстытæ ам рагæй нæ цыд. Кусджытæ куыд зæгъынц, афтæмæй БАМ-ы район куы сырæзт, уæдæй фæстæмæ дон, газ æмæ æндæр хызæгтæ дæр ивд никуы æрцыдысты. Раивын та сæ æнæмæнг хъуыд уымæн æмæ бирæ рæтты коммуникацион хæххытæ сты бынтон згæхæрд. Ацы аз æмткæй ивд æрцæудзысты алы бирæуæладзыгон хæдзармæ дæр цы коммуникацион хæтæлтæ ис, уыдон. Уый фæстæ доныхызæгтæ иу æрцæудзысты магистралон хæтæлмæ, цыран арæзт æрцæудзæн донсыгъдæггæнæн ифтонгадтæ, районы арæзт æрцæудзæн сæрмагонд трансформаторон дæлстанц дæр æмæ уый фæстæ ам дæр, иннæ районтау, æрцæудзæн асфальт æвæрд. Горæты администрацийы куыд загътой, афтæмæй БАМ-ы район сæрибар æрцæудзæнис æнæзакъонон арæзтæдтæй дæр. Ныртæккæ БАМ-ы районы ахæм арæзтадтæ дзæвгар ис.
«Водоканал»-ы генералон директор Цхуырбаты Алан куыд зæгъы, афтæмæй Кимы, Базарадон æмæ Табуты Радионы уынгты зæххыбын инженерон куыстытæ æххæст æрцыдысты нырыккон домæнтæм гæсгæ Уым кусджытæ æрæвнæлдтой асфальтмæ цæттæгæнæн куыстытæм. «Коммуникацион куыстытæ кæронмæ фæхæццæ кæнынц Белинский æмæ Революцийы уынгтыл. Нæузæххонты уынгты та уагъд æрцыдысты магистралон хæтæлтæ, ныр та коммуникацион хæтæлтæ ивд цæуынц бирæуæладзыгон хæдзæрттæм. Хъайтарты уынджы иу хаймæ æрæвналдзыстæм ацы бонты. Уым коммуникацитæ раивыны фæстæ хъуамæ хæрзарæзт æрцæуа фæндаг, кæцы Хъайтарты уынджы кæрон баиу уыдзæн микрорайон «Шанхай»-мæ», – зæгъы Цхуырбаты Алан.
Уый ма нын куыд загъта, афтæмæй Белинский, Революци, Нæузæххонты æмæ Хъайтарты уынджы донхæтæлтæ, кæцытæ ивд æрцыдысты, иу къуыримæ баиу кæндзысты магистралмæ, фæлæ БАМ-ы районы куыстытæ сентябры мæйы кæронмæ нæ фæуыдзысты. Техникæйæ кæд ифтонг сты, уæд дæр уыдон зæхх къахгæ-къахын арæх фехалынц. Хатт ивæн хæйттæм æнхъæлмæ кæсын бахъæуы дзæвгар рæстæг. Кусæгдых æмæ арæзтадон æрмæджытæй ифтонг сты.
Уазæгты Марфа
Comments are closed, but trackbacks and pingbacks are open.