Ацы аз нæ горæты Инвестпрограммæйы фæлгæтты арæзт цы уынгтæ цæуынц, уыдон номхыгъдмæ бахауд Плиты Ароны уынджы кæронæй БАМ-ы микрорайонмæ цы фæндаг цæуы, уый дæр. Тынг тыхстысты ацы районы цæрджытæ, рæстмæ фæндаг сæм кæй нæ уыдис, уымæй. Къæвда рæстæджы-иу азмæлæнтæ нæ уыд цæрæн хæдзæртты раз. Цæрджытæ сæхæ-дæг куыд зæгъынц, афтæмæй сын хæдзæрттæ байуæрстой 1992-93 азты, Советон Цæдис куы ныппырх æмæ советон æфсады службæ-гæнджытæ сæ цæрæн-бынæттæ куы ныууагътой, уæд. Уæдæй нырмæ, дам, БАМ-ы районы цæрæн хæдзæртты раз уынгтæ арæзт никуы уыдысты. Цæрджытæ-иу сæ сæхи тыхтæй барæстытæ кодтой, æркалдтой-иу дзы хуыр, фæлæ-иу уый бирæ рæстæг нæ ахаста, уайтагъд-иу къæвда рæстæджыты фехæлдис æмæ дзы фистæгæй цæуджытæн нæ, фæлæ машинæтæн дæр ахизæнтæ нал уыдис.
«Æппынфæстаг махæн дæр нæ микрорайон рафидаудзæн æмæ фервæздзыстæм нæ фыдæбæттæй. Ныртæккæ БАМ-ы район тынг змæст у, ивынц зæххы бын коммуникацитæ. Техникæ æппынæдзух кæй кусы, уымæ гæсгæ нæм бахизæнтæ нæй рыгæй, хуырдуртыл цæуын дæр зын у, нæ машинæтæ хатт Мæскуыйаг микрорайоны бауромæм. Фæлæ тагъд нæ уынг асфальт кæй æрцæудзæн, уый цинæй ацы тухитæ ницæмæ дарæм. Нæ цинæн кæрон дæр нæй! Фæндаг аразджытæ дæр архайынц æппæт куыстытæ дæр цæсгомджынæй бакæныныл», – зæгъынц БАМ-ы районы цæрджытæ.
Куыд иннæ уынгтæм, афтæ ам дæр куыстытæм фыццаг æрæв-нæлдта «Водоканал», ивынц ком-муникацион хæххытæ. Уыдон бынтондæр дзуапп нал лæвæрдтой сæ домæнтæн. Ныр раивтой доны хæххытæ. Цæмæй районы цæджытæ донхъуагдзинад ма банкъа-рой, цалынмæ ног хæтæлтæ баиу кæной, уæдмæ, уый тыххæй зæрæдты фарсмæ ныппæрстой ногтæ. Куыддæр куыст кæронмæ бахæццæ уа, афтæ зæрæдтæ ахицæн кæн-дзысты æмæ ногтæ сæ куыст адарддæр кæндзысты. Уыцы-иу рæстæг куыст цæуы газуадзæн куыстытæ бакæныныл дæр. Ныртæккæ кусджытæ тротуартæн æвæрынц бордюртæ. Куыст цæуы сæйраг фæндагыл хуыр ныккалыныл æмæ йæ асфальтмæ бацæттæ кæныныл. Кусджытæ ныфс æвæрынц тагъд рæстæджы «Дорэкспострой»-мæ кæй ратдзысты фæндаг æмæ уыдон планмæ гæсгæ ноябры мæйы фæндаджы уæлцъарыл асфальтæвæрæн куыстытæ кæй бакæндзысты.
Арæзтад, архитектурæ æмæ цæрæнуатон-коммуналон хæдзарады министрады пресс-службæ куыд зæгъы, афтæмæй ацы аз цы 8 уынджы хъуамæ сырæзтаид нывæзтмæ гæсгæ, уыдон се ‘ппæт дæр эксплуатацимæ лæвæрд æрцæудзысты афæдзы кæронмæ.
Кæд иуæй-иу ран куыстытæ бакъуылымпы сты, уæд уыдонæн сæ аххосаг у, пандемийы рæстæджы арæзтадон æрмæджыты æрласыны проблемæ кæй фæзынд, уый.
Уæ зæрдыл уын лæууын кæнæм, ахæм æнгæс куыстытæ æххæст кæй цæуы ноджы мæнæ ахæм уынгтыл: Кимы, Белинскийы, Революцийы, Базарады, Табуйы фырты уынгтыл.
Уазæгты Марфа
Comments are closed, but trackbacks and pingbacks are open.