РХИ-йы Хицауады Сæрдары хæстæ æххæстгæнæг Бекъойты Геннади ауагъта Хицауады æмбырд. Боны фæткмæ хаст æрцыдысты ахæм ахсджиаг фарстытæ, куыд коронавирусон инфекци Ковид-19 апарахаты тасдзинадимæ баст уæлдай ахсджиаг куыстытæ æххæст кæныны тыххæй сæрмагонд бафыстытæ сфидар кæнын, 2021 азæн республикæйы чысыл æмæ астæуккаг амалиуæгадæн æххуысы æмæ рæзты паддзахадон программæ сфидар кæнын æмæ бирæ æндæр фарстытæ.
Рабадты Æнæниздзинад хъахъхъæныны æмæ социалон рæзты министры хæстæ æххæстгæнæг Тотчиты Георги куыд банысан кодта, афтæмæй сæрмагонд бафыстыты фæдыл уынаффæйы проект бацæттæ æрцыд ног коронавирусон инфекцийы апарахаты тасдзинады рæстæджы медицинон æмæ æндæр кусджытæн сæрмагонд уавæрты кусыны тыххæй социалон æххуыс бакæныны нысанæн.
«Проектмæ гæсгæ паддзахадон бюджеты æмæ Хицауады резервон фонды фæрæзты хыгъдæй 2021 азы 1 январæй 31 декабрмæ медицинон æмæ æндæр кусджытæн бæлвырд цæуынц социалон æххуысы мадзæлттæ, куысты сæрмагонд уавæрты æмæ уæлæмхас куысты тыххæй», – загъта уый.
Министры ныхæстæм гæсгæ уæлæмхас бафыстытæ æххæст цæудзысты ахæм бæрцтæй, ахæм фæтк æмæ уавæртыл, кæцытæ фидар æрцыдысты Хицауады 2020 азы 5 июны №41 уынаффæйæ.
Рабадты Хицауады уæнгтæ хорзыл банымадтой «2020 азæн Республикæ Хуссар Ирыстоны чысыл æмæ астæуккаг амалиуæгадæн хатырон уавæрты кредит дæттынæн ахъаз кæныны фонды бюджеты сæххæст кæныны тыххæй» Закъоны проект æмæ 2021 азæн чысыл æмæ астæуккаг амалиуæгадæн æххуысы æмæ рæзты паддзахадон программæ.
Экономикон рæзты министры фыццаг хæдивæг Тадтаты Дзамболаты ныхæстæм гæсгæ 2020 азы фонды бюджет æххæст æрцыд 33 370 500 сомæй, ома, 99 процентæй. Дарддæр куыд загъта, афтæмæй ивгъуыд азы æххуыс райстой 49 амалиуæггæнæджы, уыдонæй 33 уыдысты хъæууон хæдзарады къабазæй, лæггæдты къабазæй – 7 æмæ кондадæй та – 9 амалиуæггæнæджы.
Уый ма куыд банысан кодта, афтæмæй экономикон рæзты министрады азы райдианæй консультативон æмæ информацион æххуыс цæуы, паддзахадон æххуыс райсын кæй фæнды, уыцы амалиуæггæнджытæн.
Фарсты фæдыл дзургæйæ, Бекъойты Геннади банысан кодта, зæгъгæ, ахсджиаг у, нырмæ цы хатырон кредиттæ лæвæрд æрцыдысты, уыдоны экономикон эффект сбæлвырд кæнын. Уый тых-хæй Дзамболатæн бахæс кодта, цæмæй бацæттæ кæна хицæн хыгъд, амалиуæггæнджытæн æх-хуысы программæйы руаджы цы бизнес-проекттæ организаци æрцыдысты, уыдон куыд реализаци цæуынц æмæ рæзынц, уый тыххæй.
«Ацы аз экономикæйы реалон секторы бизнес-проекттæн паддзахадон æххуысы тыххæй рахицæнгонд фæрæзтæ фæфылдæр сты æмæ у 49 миуан 904 мин сомы. Мах æнхъæлмæ кастыстæм паддзахадон бюджеты райстмæ, цæмæй фехъусын кодтаиккам документтæ исын райдайыны тыххæй æмæ сæ ныр æввахс рæстæджы райдайдзыстæм исын. Фыццаг рады ист цæудзысты ахæм проекттæ, кæцытæ хауынц хъæууон хæдзарады къабазмæ, кондадмæ. Æмæ фæстаг рады та – лæггæдты æмæ базарады къабæзтæм. Ахсджиаг у, ныридæгæн чи архайынц, уæлдайдæр та – республикæйы районты, уыцы проектты экономикон эффект цахæм у, уымæ хъус дарын», – загъта Бекъойты Геннади.
Дарддæр Хицауады уæнгтæ сфидар кодтой 2020 азы 4 кварталы фæцæрыны минимумы бæрц.
Тадтаты Дзамболат куыд фехъусын кодта, афтæмæй цæрыны минимумы бæрц 2020 азы 4 кварталы, удгоймагмæ ракæнгæйæ, республикæйы фæфылдæр æмæ уыдис 11 556 сомы, уыцы нымæцы цæрджыты социалон демографион къордтæм гæсгæ: куыстхъом цæрджытæ – 12 420 сомы; пенсиисджытæ – 9448 сомы: сывæллæттæ – 12 596 сомы. 2020 азы 3 кварталы удгоймагмæ ракæнгæйæ, уый уыд 10 884 сомы, афтæмæй фæфылдæр 672 сомы.
Рабадты рæстæджы хорзыл нымад æрцыдысты «Терроризмы ныхмæ тохы тыххæй» закъонмæ бахæсгæ ивындзинæдтæ, афтæ ма фидар æрцыдысты къорд нормативон акттæ æмæ закъæтты проекттæ.
Нæ уацх.
Comments are closed, but trackbacks and pingbacks are open.