Ирыстоны фæстаг азты цы куыстуæттæ фæзындис, уыдонæй сæ иу у арæнгонд бæрндзинады æхсæнад «Сæнуадзæн «Ирон сæн». Ацы куыстуаты электродæлстанц среконструкци кæнын æмæ йæм бацæуæн автомобилон фæндаг схæрзарæзт кæныны тыххæй сын бюджетон инвестициты хуызы паддзахад баххуыс кæндзæн. Уыцы нысанæн ацы бонты Хицауады æмбырды фидар æрцыд РХИ-йы Хицауады Барамынды проект. Æмбырд уагъта Хицауады Сæрдары хæстæ æххæстгæнæг Бекъойты Геннади. Паддзахадон æххуыс цæудзæн республикæйы социалон-экономикон рæзтæн ахъазгæнæг Инвестицион программæйы фæлгæтты æмæ æмæ йæ бæрц у 17 512 410 сомы.
Завод кусын райдыдта дыууæ азы размæ æмæ у иууыл эффективондæр инвестицион проекттæй сæ иу нæ республикæйы территорийыл. 2019 азы компани Уæрæсемæ арвыста 755 167 мин авджы сæн, кæцытæн сæ аргъ уыд 75 073 322 сомы, ацы аз та – 1 275 189 авджы 12 1704 163 сомы аргъ.
«Сæнуадзæн «Ирон сæн» йæхи равдыста куыд æнтысгæ инвестицион проект, кæцы здæхт у нæхи хомысон базæ рæзын кæнынмæ, кондады гуырахсттæ фылдæр кæнынмæ. Йæ продукцийы йын базыдтой æмæ йæ æлхæнынц куыд республикæйы территорийыл, афтæ уымæн æддейæ дæр. Хъæуæгыл нымайын ахæм рентабелон, тагъд рæзæг проекттæн æххуыс кæнын», – банысан кодта Бекъойты Геннади.
Дарддæр Хицауады уæнгтæ сфидар кодтой 2020 азы æртыккаг кварталæн цæрынæн иууыл къаддæр хæрдзты бæрц. Уый, удгоймагмæ йæ ракæнгæйæ уыдис 10 884 сомы. Социалон демографион къордтæм гæсгæ та: куыстхъом цæрджытæн – 11 701 сомы; пенсиисджытæн – 8 928 сомы; сывæллæттæн – 11 814 сомы. 2020 азы дыккаг кварталмæ гæсгæ ацы бæрæггæнæн фæкъаддæр 363 сомы.
Рабадты ма райст æрцыд уынаффæ Фæлхасгæнджыты бартæ хъахъхъæныны æмæ адæймаджы фæрныгады къабазмæ хъусдарды фæдыл комитетæн Хицауады Резервон фондæй æхцайы фæрæзтæ 258 000 сомы рахицæн кæнын, кæцытæ здæхт сты Республикæ Хуссар Ирыстоны санитарон-эпидемиологон æдасдзинад сифтонг кæныны фæдыл уæлдай ахсджиаг куыстытæ æххæст кæнынæн разæнгардгæнæн бафыстытæ æххæст кæнынмæ, кæцытæ баст сты коронавирусон инфекци апарахат кæныны тасдзинадимæ. Бафыстытæ фиддзысты 2020 азы ноябрæн «Гигиенæ æмæ эпидемиологийы центр»-ы кусджытæн.
Рабадты ма æркастæуыд хицæн фарстатæм, кæцытæ хаудысты 2020-2022 азтæн республикæйы социалон-экономикон рæзтæн ахъазгæнæг Инвестпрограммæйы хицæн мадзæлтты фæдыл паддзахадон закъазгæнджыты сбæрæг кæнынмæ. Афтæ ма Уæрæсейы Федераци æмæ Хуссар Ирыстоны æхсæн социалон-экономикон æмгуыстады фæдыл Æхсæнхицауадон къамисы 2020 азы 16 декабры уынаффæтæм гæсгæ Инвестпрограммæмæ ивындзинæдтæ бахæссынмæ.
Нæ уацх.
Comments are closed, but trackbacks and pingbacks are open.