Хуссар Ирыстоны фæлхасадон цæстдарды комитет æдзух йæ хъус дары грипп æмæ карз респираторон вирусон инфекцийæ рынчынты нымæцмæ. Ахæм куыст æххæст цæуы æрвылаз дæр, уымæн æмæ, ахæм рынчынты нымæц зымæджы сезоны фæфылдæр вæййы.

Аивгъуыйгæ азы кæрон нæ республикæйы территорийыл фæфылдæр гриппæй рынчынты нымæц. Уыдонæн сæ фылдæр хай уыдысты сывæллæттæ. Фæлæ ныртæккæ Хуссар Ирыстоны бæрæг фæхуыздæр санитарон-эпидемиологон уавæр.

Банысангонд комитеты сæргълæууæг Коцты Маринæйы ныхæстæм гæсгæ уавæр хуыздæрæрдæм кæй фæивта, уымæн фæахъаз сты рæстæгыл райсгæ мадзæлттæ. Азы кæрон рæстæгыл æхгæд æрцыдысты астæуккаг скъолатæ æмæ сывæллæтты рæвдауæндæттæ-цæхæрадæттæ.

Ныртæккæ Комитеты кусджытæ сæ хъус дарынц, бæстæйы иумиагахуырадон уагдæтты санитарон-эпидемиологон нормæтæ куыд хынцыд цæуынц, уымæ. Æрвылбон дæр æмбырд цæуы информаци, æмæ йæ фæстиуджытæм гæсгæ иумæйагахуырадон æмæ скъолайы агъоммæ уагдæтты рынчынты нымæц уадиссаг бирæ нæу. Уымæ гæсгæ уагдæттæ кусынц штатон режимы.

Бæстæйы сæйраг санитарон дохтыры ныхæстæм гæсгæ куыст ууыл не ‘рлæудзæн, æрвылбон дæр уагдон йæ хъус дардзæн эпидемиологон уавæрмæ æмæ кæд мæгуырауæрдæм ива, уæд мадзæлттæ ист цæудзæн, цæмæй низ парахат кæнынæн уавæртæ ма уа.

Медицинон уагдæттæм æххуысмæ цы рынчынтæ бахатынц, уыдоны нымæц дæр бæрæг фæкъаддæр. Иумиагæй сисгæйæ, гриппы тыххæй дзырд куы цæуа, уæд уавæр республикæйы территорийыл ныртæккæ у стабилон.

Коронавирусон инфекцийы тыххæй банысан кæнын хъæуы уый, æмæ ацы вирус афтæ нæ фесæфдзæн. Фæстаг рæстæджы информацион фæрæзты фæзынд ахæм информаци, зæгъгæ, рабæрæг коронавирусы ног хуыз «кракен»-æй рынчын Уæрæсейы Пензæйы областы.

Хуссар Ирыстоны дæр нырма æххæстæй нæ фесæфт коронавирусон инфекци, хатт рабæрæг вæййынц ацы низæй рынчынтæ. Банысан кæнын хъæуы уый, æмæ аивгъуыйгæ аз ацы вирусæй рынчынты нымæц фæфылдæр кæныны хъуыддаг хынцыд цыд дыууæ хатты – азы райдианы æмæ фæззæджы мæйты. Дæнцæгæн – ивгъуыд азы кæрон медицинон уагдонмæ чи æрбахатыд, уыдонæн сæ 8 процентæн рабæрæг, ацы вирусæй рынчын кæй уыдысты. Ацы азы бæрæггæнæнтыл дзырд куы цæуа, уæд ныридæгæн басгæрст æрцыдысты 20 адæймагæй фылдæр, фæлæ дзы иуæн дæр нæ рабæрæг коронавирус.

Сæйраг санитарон дохтыры ныхæстæм гæсгæ алы вирусон æмæ инфекцион низы ныхмæ тох кæныны сæйраг фæрæз у вакцинæ. Кæй зæгъын æй хъæуы, уый низæн йæхицæй нæ хъахъхъæны, фæлæ йæ уæззау фæстиуджытæй. Уымæ гæсгæ алы адæймаг дæр æмбаргæ ахаст хъуамæ æвдиса йæхи æмæ йæ алфæмблай адæммæ æмæ вакцинæ саразын низы авналæнтæ кæй къуындæгдæр кæны, уый нæ зæрдыл хъуамæ дарæм.

Къæбулты Маринæ