Хуссар Ирыстон æмæ Гуырдзыстонимæ арæныл æрæджы уагъд æрцыд Инциденттæ аиуварс кæнын æмæ сæм хъусдард здахыны фæдыл механизмты фæлгæтты радон фембæлд.
Республикæ Хуссар Ирыстоны уæлдæфон тыгъдад тæхæн аппараттæ кæй халынц, уый уыд механизмты фæлгæтты фембæлды сæйраг уынаффæкæнинаг фарст. Механизмты куысты Хуссар Ирыстонæй делегацийы сæргълæууæг, Фæсконфликтон бæстонкæнынады фарс-таты фæдыл Президенты æххæстбарджын минæвары хæдивæг Коцты Егоры ныхæстæм гæсгæ æнæпилотон тæхæн аппараттæ Гуырдзыстоны территорийыл куы суагътой, уæд уым хайад истой гуырдзиаг полициæгтæ дæр.
Хуссарирыстойнаг фарс фехъусын кодта, уый кæй у цæттæ провокаци æмæ инцидентты ратæдзæн кæй у, гуырдзиаг полициæгтæ кæй сты ахъазгæнæг тæхæн аппараттæй пайда кæнынæн. Ацы цауты тыххæй пайда цыд «тæвд хаххæй», фæлæ алы хаттау гуырдзиаг полициæгтæ «ницы федтой æмæ ницы зонынц», сæ ныхæстæм гæсгæ сæ уæлдæфы суагътой чидæртæ. Фæлæ сæ ахастæй бæрæг у, уыцы факттимæ иттæг хорз зонгæ кæй сты.
Коцты Егоры ныхæстæм гæсгæ гуырдзиаг полици сæ разæнгард кæныныл ма хъуамæ архайа, фæлæ иуварс кæна ахæм инциденттæ, уымæн æмæ уыдон сты провокацион архайдтытæ. Уымæй дæр, фыццаг хатт æнæпилотон аппараттæ хуссарирыстойнаг арæнхъахъхъæнджытæ бахынцыдтой æмæ сбæрæг кодтой, куы сæ суагътой, уæд дзы хайад кæй райстой дыууæ полициаджы.
Дыккаг хатт та дзы æвдисæнтæ уыд цыппар барадхъахъхъæнæг органты минæвæрттæй.
Уыцы цаутыл дзырд цыд «тæвд хаххы» руаджы. Ацы формат у хорз, уымæн æмæ уый руаджы фадат ис бирæ арæнгæрон территоритыл æрцæугæ инциденттæ æмæ цаутæ аиуварс кæнынæн.
Механизмты куысты рæстæджы ма гуырдзиаг фарс рæгъмæ рахаста Хуссар Ирыстоны паддзахадон арæнтæ халджыты æрцахсыны фарст. Хуссарирыстойнаг фарс дзуаппæн банысан кодта, зæгъгæ, кæй цæуынц хæлд Республикæ Хуссар Ирыстоны закъæттæ æмæ алы бархалæг дæр бæрндзинад кæй хъуамæ хæсса йæ архайдтыты фæдыл.
Уисты хъæуы уавæры тыххæй
Ацы районы уавæр дæр иуварс нæ баззад механизмты куысты, уымæн æмæ, куыд зонæм, уымæ гæсгæ гуырдзиаг фарс уыцы бынаты сæвæрдта полициæгты æнæзакъонон пост. Уымæй дæр, гуырдзиаг фарс, дунеон минæвæртты руаджы активонæй дзуры паддзахадон арæнты сæрты хизыны фарст фæхуымæтæгдæр кæныныл. Бæрæг куыд у, уымæ гæсгæ уадзæн пункттæ æхгæд æрцыдысты, Уисты хъæуы æнæзакъонон пост æвæрд кæй æрцыд, уымæн дзуаппæн. Ацы уавæр æрбæстон кæныны фыццаг къахдзæф суыдзæн, Хуссар Ирыстоны территорийæ уыцы æнæзакъонон пост ахæссыны хъуыддаг.
Коцты Егоры ныхæстæм гæсгæ уымæй бæстон æрцæуиккой арæныл хизыны фарст фæхуымæтæгдæр кæнын æмæ æндæр актуалон гуманитарон фарстытæ.
Механизмты куысты рæстæджы ма дзырд цыд паддзахадон арæнты территорийыл æрцæугæ инциденттæ æмæ арæнты фæйнæ фарс эпидемиологон уавæрыл, кæцытæ ахсджиаг сты арæнтæм хæстæг цæрджытæн.
Куадзæны бæрæгбонтæ кæй сты, уымæ гæсгæ фембæлды хайадисджытæ банысан кодтой «тæвд хахх»-æй пайда кæныны эффективондзинад.
Нæ уацх.
Comments are closed, but trackbacks and pingbacks are open.