Инциденттæ ма æруадзын æмæ сæм хъусдард здахыны фæдыл механизмты формат нымад у ахъазджын фæзуатыл, цыран дунеон организациты минæвæртты хайадистæй Хуссар Ирыстон æмæ Гуырдзыстоны минæвæрттæн фадат ис паддзахадон арæнтыл æмæ æндæр æрцæугæ цаутыл цæстæй-цæстмæ æруынаффæ кæнынæн. Зæххы къорийыл цы æнæхайыры  коронавирусы пандеми ныппарахат, уый йæхи ивындзинæдтæ бахаста ацы форматы куыстмæ дæр, фæлæ уæддæр йæ хайадисджытæ рæстæгæй-рæстæгмæ æмбæлынц æмæ арынц сæвзæргæ уавæрæй рахизыны фадæттæ.

Уæддæр æмæ уæддæр полициæгты пост аиуварс кæнын у сæйраг

Ацы бонты цæрæн пункт Эргнетмæ хæстæг Инциденттæ ма æруадзын æмæ сæм хъусдард здахыны фæдыл механизмты фæстаг 103 фембæлды рæстæджы йæ хайадисджытæ æруынаффæ кодтой æдасдзинад æмæ коронавирусы пандемиимæ баст фарстатыл. Хуссар Ирыстонæй делегацийы сæргълæууæг, Фæсконфликтон фарстатæ æрбæстон кæныны фæдыл РХИ-йы Президенты Æххæстбарджын минæвары хæдивæг Коцты Егор, фембæлдæн фæстиуджытæ аразгæйæ, банысан кодта, хуссарирыстойнаг фарсы уæлдай чи тыхсын кæны æмæ цымыдис кæны, уыцы проблемон фарстытæ кæй æрцыдысты хаст рæгъмæ. Уыдоны сæйраг у Знауыры районы Уисты хъæуы сæвзæргæ уавæр, цыран Хуссар Ирыстоны территорийыл гуырдзиаг полициæгтæ сæвæрдтой æнæзакъонон пост. Уый фæдыл уагъд æрцыд механизмты фæлгæтты цалдæр техникон фембæлды, фæлæ абоны онг дæр ацы фарст бæстон не ‘рцыд.

Коцты Егоры ныхæстæм гæсгæ механизмты форматы алы фембæлды рæстæджы дæр кæд рæгъмæ хаст цæуы ацы фарст, уæддæр йæ бынатæй нæма феггуырст. Афтæмæй та ацы пост тæссагдзинад æвзарын кæны æрмæст бынæттон цæрджытæн нæ, фæлæ æгас регионы цæрджытæн.

«Нæ республикæйы территорийыл ацы æнæзакъонон пост сæвæрынимæ баст сты Хуссар Ирыстон æмæ Гуырдзыстоны ‘хсæн паддзахадон арæнты дæрддзæгыл æдасдзинады проблемæтæ.

Хуссарирыстойнаг фарс архайы ацы проблемæ æрбæстон кæныныл æмæ домы, цæмæй Хуссар Ирыстоны территорийæ иуварс æрцæуа Гуырдзыстоны æнæзакъонон полициæгты пост. Уымæн æмæ уавæр фендыгъддæр, районы ацы пост сæвæрыны фæстиуæгæн æмæ æрбæстон уыдзæн æрмæстдæр уæд, æмæ гуырдзиаг полициæгтæ сæ пост сæхи территоримæ куы ахæссой, уæд», – банысан кодта ныхасгæнæг.

Фæлæ куыд уынæм, афтæмæй ацы фарсты фæдыл абоны онг дæр гуырдзиаг фарсы позици баззад æнæаивгæйæ. Уый нæ, фæлæ арæх гуырдзиаг фарс архайы ацы проб-лемæйæ йæхи аиуварс кæныныл, чи нæ уæвынад кæны, ахæм цавæрдæр хуссарирыстойнаг постытæм амонгæйæ.

«Хуссар Ирыстоны территорийыл постытæ сæвæрын, барадхъахъхъæнæг органты кæнæ арæнхъахъхъæнджыты архайдтытæ уагъд цæуынц нæ республикæйы территорийыл æмæ ницы амалæй не ‘ххæссынц Гуырдзыстоны территоримæ æмæ тæссагдзинад не ‘взарын кæнынц гуырдзиаг фарсæн», – банысан кодта делегацийы сæргълæууæг.

Радон хатт та Хуссар Ирыстоны къухдариуæгад равдыста гуманон ахаст

Æрæджы Хуссар Ирыстоны Президент Бибылты Анатолийы Бардзырдмæ гæсгæ Гуырдзыстоны æмбæстаг Геннади Бестави хатыргонд æрцыд æмæ ссæрибар ахæстонæй. Уый ахст уыд, паддзахадон арæнтæ фехалын æмæ наркотикон буарадтæ кæй хъуыззын кодта, уымæ гæсгæ æмæ йын хаст æрцыд æртæ аз æмæ дыууæ мæйы ахæстоны фæбадыны тæрхон.

Ацы информацийыл ныртæккæ активонæй уынаффæ цæуы Гуырдзыстоны информацион тыгъдады, политизаци кæнынц хуссарирыстойнаг къухдариуæгады уынаффæ.

Механизмты фембæлды рæстæджы ацы фарст дæр рæгъмæ хаст æрцыд. Коцты Егоры ныхæстæм гæсгæ Гуырдзыстоны информацион фæрæзтæ куыд хъусын кæнынц, уымæ гæсгæ гуырдзиаг æмбæстаг сæрибар не ‘рцыд, фæлæ бæстæйы Президенты Бардзырдмæ гæсгæ хатыргонд æрцыд. Йе ‘нæниздзинад кæй фæцудыдта, уыцы аххосагмæ гæсгæ уый госпитализаци æрцыд нæ горæты медицинон центры рынчындонмæ. Гуырдзыстоны æмбæстаг кæй у, уымæ гæсгæ хуссарирыстойнаг фарс фехъусын кодта гуырдзиаг фарсæн йæ уавæры тыххæй. Уыдон бахатыдысты, цæмæй йын Гуырдзыстоны бакæной медицинон æххуыс.

Коцты Егоры ныхæстæм гæсгæ уыцы хъуыддагæн æруадзæн кæй нæ уыд, уымæ гæсгæ ист æрцыд ацы гуманон уынаффæ æмæ уый фæстæ лæвæрд æрцыд гуырдзиаг фарсмæ.

Кæй зæгъын æй хъæуы, гуырдзиаг фарсæй хъуысы ахæм ныхæстæ, ома, Хуссар Ирыстоны æмбæлон ахаст нæ уыд гуырдзиаг æмбæстагмæ æмæ уыцы аххосагмæ гæсгæ фæцудыдта йе ‘нæниздзинад. Фæлæ уыцы ныхæстæн бындур нæй. Ацы æмбæстаджы уавæрæй пайда кæндзысты куыд политикон инструмент, афтæ, уыдон æппындæр нæ цымыдис кæны йæ  хъысмæт.

Арæнты фæткхалæн цаутæ нæ къаддæр кæнынц

Механизмты куысты ацы хатт гуырдзиаг фарс басаст, æппынæдзух сæ тæхæн аппараттæ уæлдæфы тыгъдады кæй сты, ууыл. Фæлæ уыдон, зæгъгæ, нæ халынц паддзахадон арæнты фæтк, уымæн æмæ тæхынц æрмæстдæр сæхи территорийыл. Фæлæ уый раст нæу. Коцты Егор куыд банысан код-та, уымæ гæсгæ, боныфæстагмæ, ацы проблемæ хъуамæ бæстон æрцæуа.

Куыд зонæм, афтæмæй арæх хæлд цæуы паддзахадон арæнты фæтк. Механизмты фæстаг фембæлдæй фæстæмæ урæд æрцыд 17 фæткхалæджы.

Хуссарирыстойнаг делегацийы сæргълæууæджы ныхæстæм гæсгæ паддзахадон арæнты фæткхалджытæм ахасты дæр гуманон ахастæй пайда цæуы æмæ æнæ ивартæй æрвыст æрцæуынц Гуырдзыстоны территоримæ, кæд æмæ уымæй размæ уыцы æмбæстаг-бархалæг æндæр ницы бархалæн цау сарæзта, уæд.

Механизмты куысты хайадисджытæ куыд баныхас кодтой, уымæ гæсгæ ацы фæлгæтты фембæлд уагъд æрцæудзæн фидæн аз 20-æм январы.

КЪÆБУЛТЫ Маринæ

Comments are closed, but trackbacks and pingbacks are open.