Æрбалæугæ азы райдиан уагъд æрцыд Инциденттæ ма æруадзын æмæ сæм хъусдард здахыны фæдыл механизмты форматы   фыццаг фембæлд Хуссар Ирыстон æмæ Гуырдзыстоны æхсæн арæнгæрон хъæу Эргнетмæ хæстæг. Механизмты фæлгæтты, сæйраджыдæр, уынаффæ цæуы æдасдзинады фарстатыл, паддзахадон арæнтæ халыны цаутыл æмæ иумиаг эпидемиологон уавæрыл.

Цънелисы æнæзакъонон пост

Хуссар Ирыстонæй механизмты форматы хуссарирыстойнаг делегацийы сæргълæууæг, Фæсконфликтон фарстатæ бæстонкæныны фæдыл РХИ-йы Президенты æххæстбарджын минæвары хæдивæг Коцты Егор фембæлдæн хатдзæгтæ аразгæйæ информацион фæрæзтæн афтæ радзырдта, зæгъгæ, фылдæр хъусдард здæхт æрцыд, гуырдзиаг полициæгтæ Цънелисы цы æнæзакъонон пост сæвæрдтой, уымæ, афтæ арæнты фæйнæфарс æрцæугæ цаутæ æмæ арæнтæ халынимæ баст фарстатæм. Хуссарирыстойнаг фарс ныр цалдæр азы рæгъмæ хæссы, Знауыры районы цæрæн пункт Уисты хъæумæ хæстæг цы æнæзакъонон пост æвæрд æрцыд, уыцы проблемон фарстмæ. Йæ рæстæджы ацы ахсджиаг фарсты фæдыл Механизмты фæлгæтты уагъд æрцыд авд техникон фембæлды.

«Ацы фарсты тыххæй дзырд цæуы Механизмты фæлгæтты алы фембæлды рæстæджы дæр, фæлæ абоны онг дæр гуырдзиаг фарс иунæг къахдзæф дæр нæ сарæзта уавæр æрбæстон кæныны фæдыл», – банысан кодта Коцты Егор.

Йæ ныхæстæм гæсгæ ацы районы уавæр æр-бæстон кæнынæн æрмæст æнæзакъонон пост аиуварс кæнын фаг нæу, уырдыгæй конд хъуамæ æрцæуой Гуырдзыстоны æппæт тыхон структурæты минæвæрттæ. Уымæн æмæ ма уæлæмхасæнæн Гуырдзыстоны территорийыл цалдæр бынаты æвæрд æрцыдысты гуырдзиаг полициæгты пункттæ, кæцытæн сæ нымæц бæрæг фылдæр кæны.

Хæлд цæуы уæлдæфон тыгъдад

Инцинденттæ ма æруадзын æмæ сæм хъус-дард здахыны фæдыл механизмты фæстаг фембæлдæй фæстæмæ фылдæр кæнынц Хуссар Ирыстоны уæлдæфон тыгъдад халыны факттæ Гуырдзыстоны рдыгæй æнæпилотон тæхæн аппаратты фæрцы. Тæхæн аппараттæ нырмæ кæд фылдæр Знауыры районы бæрæг цыдысты, уæд ныр та фылдæр кæнынц Ленингоры районы паддзахадон арæнтыл хизыны пунктмæ хæстæг.

«Хуссарирыстойнаг фарс æдзух хъусдард здахы ацы факттæм. Зæрдыл лæууын кæнæм уый, æмæ ахæм факттæ здæхт кæй сты радон инциденттæм.

Социалон хызæгты мыхуыр цы информаци лæвæрд цæуы, уыдонмæ гæсгæ бæрæг цæуы, ацы æнæпилотон тæхæн аппараттæ уадзыныл фылдæр кæй архайынц Гуырдзыстоны æнæхицауадон организацитæ. Уыдон нымæцы ис ахæм организаци «Сила в единстве». Фæлæ уыйхыгъд хынцыд цæуы ахæм факттæ дæр, æмæ уыцы тæхæн аппараттæ гуырдзиаг полициæгты цæсты-ты раз кæй тæхынц, æмæ уый æвзæрын кæны серьезон тыхстдзинад», – банысан кодта делегацийы сæргълæууæг.

Арæнты фæтк хæлд цæуы гуымир æгъдауæй

Куыд зонæм, уымæ гæсгæ гуырдзиаг фарс æдзух æнæзакъонæй халы паддзахадон арæнтыл хизыны фæтк. Уый фæстиуæгæн ивгъуыд азæй фæстæмæ урæд æрцыд арæнты фæтк чи фехæлдта, ахæм 20 æмбæстаджы. Уыдонæй фараст арæнхалæджы фæстæмæ аздæхтой æнæ иварæй. Дыууæйæ æрцыдысты ивар, иннæты ныхмæ та алы бархалæн цауы фæстиуæгæн дæр конд æрцыд уголовон хъуыддæгтæ.

Контрабандæйы ныхмæ тох

Паддзахадон æдасдзинады комитеты информацимæ гæсгæ фæстаг рæстæджы сарæх сты хуссарирыстойнаг-гуырдзиаг арæнтыл контрабандон товартæ ласыны цаутæ. Бæрæг куыд у, уымæ гæсгæ уый у серьезон статья. Æмæ уыцы хъуыддаджы чи архайы, уыдон кæд Хуссар Ирыстоны фарсæрдыгæй урæд не рцæуынц, уæддæр сæ, æнæмæнгдæр, æрцахсынц Гуырдзыстоны территорийыл, цыран сыл æмбæлон тæрхон æрцæуы.

Контрабандæйы тыххæй ахст чи сты, уыдонæй дыууæйæ ныртæккæ сты Хуссар Ирыстоны фæдагурæн изоляторы. Æнхъæлмæ кæсынц, фæдагурæн мадзæлттæ уагъд кæд фæуыдзысты æмæ сын цахæм тæрхон хаст æрцæудзæн, уымæ. Аххосджын цæуынц дыууæ статьямæ гæсгæ – тамакойы алы хуызтæй контрабандæ æмæ паддзахадон арæнтæ халыны тыххæй.

Эпидемиологон уавæр кæд уæззау у, уæддæр фембæлдтытæ уадзын хъæуы

Коцты Егоры ныхæстæм гæсгæ ныртæккæ Хуссар Ирыстоны æмæ Гуырдзыстоны эпидемиологон уавæр кæд раппæлинаг нæу, уæддæр механизмты фæлгæтты фембæлд уагъд æрцыд. Ног коронавирусон инфекцийæ рынчынты нымæц фæстаг бонты бæрæг фæфылдæр æрмæст нæ республикæйы нæ, фæлæ сыхаг бæстæты дæр.

Уымæ нæкæсгæйæ фембæлд уагъд æрцыд æдасдзинады æппæт мадзæлттæ хынцгæйæ. Фембæлды агъоммæ йæ хайадисджытæ сарæзтой низ рабæрæг кæныны нысанæн ПЦР – тестытæ.

Банысан кæнын хъæуы уый, æмæ Механизмты фæлгæтты куыст уагъд цæуы Фæскавказы æдасдзинады фæдыл Женевæйы дискусситы фæлгæтты. Хайад дзы исынц Хуссар Ирыстон, Уæрæсейы Федераци, Гуырдзыстон æмæ дунеон организацитæ – Евроцæдис æмæ ЕÆÆО-йы минæвæрттæ.

Механизмты форматæн егъау аргъ кæнынц Женевæйы дискусситы æмсæрдæрттæ, ахсджиаг у хуссарирыстойнаг фарсæн, уымæн æмæ йæ фæлгæтты цы «тæвд хахх» архайы, уый ахъазгæнæг у стабилондзинад бахъахъхъæнынæн æмæ уый руаджы бæстон цæуынц бирæ ахсджиаг фарстатæ.

Къæбулты Марина

Comments are closed, but trackbacks and pingbacks are open.