Сæйраг хъусдард – провокацион проблемæтæм

Куыд зонæм, афтæмæй Инциденттæ ма руадзын æмæ сæм хъусдард здахыны фæдыл механизмты фæлгæтты форматы куыст дæргъвæтин рæстæджы уагъд нал цыд. Механизмты формат сног кодта йæ куыст æмæ дунейы алы бæстæты инфекцион низ кæй рапарахат æмæ дзы хи бахизын кæй хъæуы, уый тыххæй йæ куысты хайад райстой алы фарсæй дæр фæйнæ дыууæ адæймаджы.

Хуссар Ирыстонæй делегацийы сæргълæууæг, Постконфликтон фарстатæ бæстонкæнынады фæдыл РХИ-йы Президенты æххæстбарджын минæвары хæдивæг Коцты Егор информацион минæвæрттæн йæ фæстиуджыты фæдыл куыд радзырдта, уымæ гæсгæ хуссарирыстойнаг делегаци фембæлды хъусдард аздæхта арæнгæрон зонæйы уавæры фарстмæ. Хъуыддаг уыйонг æрцыд, æмæ спайда кодтой æхсæнгарзæй. Пайда та дзы скодта, Хуссар Ирыстоны арæнтæ чи фехæлдта, уыцы гуырдзиаг фарсæй цуангæнæг. Уый арæнхъахъхъæнджыты къордыл æхста æхсæнгарзæй.

Уыцы цауæн гуырдзиаг фарсы дзуапп уыд афтæ, зæгъгæ, уыцы факт нырма сбæлвырд кæнын хъæуы. Фæлæ Хуссар Ирыстонæн ис факттæ æмæ бæлвырдгæнæнтæ, кæцытæ ноджыдæр бæлвырд кæнынц гуырдзиаг æмбæстаджы азым. Уыцы æрмæджытæ лæвæрд æрцæудзысты фæдагурæн мадзæлттæ чи уадзы, уыцы æмбæлон органтæм.

Уисты æнæзакъонон блокпосты уавæр уыд сæйраг фарст

Механизмты фæлгæтты фембæлды сæйраг фарст уыд хуссарирыстойнаг территорийыл Знауыры районы Уисты хъæумæ хæстæг провокацион гуырдзиаг полицийы блокпост арæзт кæй æрцыд ивгъуыд аз августы мæйы, уый.

Механизмты куысты хуссарирыстойнаг хайадисджытæ кæд архайдтой Уисты хъæуы сæвзæргæ уавæр æрбæстон кæныныл, уæддæр гуырдзиаг фарс ныхас здæхта иуварс. Уый фæстиуæгæн Хуссар Ирыстоны минæвæрттæ, æндыгъддзинад аиуварс кæныны тыххæй фæндон бахастой, цæмæй гуырдзиаг фарс æрурома уыцы куыстытæ æмæ нæ территорийыл æнæзакъонон провокацион пост аиуварс кæна. Уымæн æмæ уый тæссагдзинад æвзарын кæны нæ арæнтыл стабилондзинадæн. Науæд хуссарирыстойнаг фарс райсдзæн закъонмæ гæсгæ мадзæлттæ, цæмæй хъахъхъæд æр-цæуой арæнгæрон хъæуты цæрджыты æдасдзинад ифтонг кæныны фæдыл ма-дзæлттæ.

Дзуаппæн Хуссар Ирыстон сæвæрдта йæхи пост

Куыд зонæм, уымæ гæсгæ механизмты фæлгæтты уагъд æрцыд цалдæр техникон фембæлды. Уыцы фембæлдтытæй алкæцыйы дæр рæгъмæ хаст цыд иу фарст – Уисты хъæуы сæвзæргæ уавæр. Хуссар Ирыстон бирæ хæттыты фехъусын кодта, уыцы фарст аскъуыддзаг кæныны иунæг метод кæй у нæ Республикæйы территорийæ гуырдзиаг полицийæгты пост ахæссын. Коцты Егоры ныхæстæм гæсгæ уый фæахъаз уы-даид дарддæры уавæр æрбæстон кæны-нæн, уыцы уынаффæ гуырдзиаг фарсы рдыгæй уыдзæн кæрæдзийыл æууæнкдзинады фыццаг хорз къахдзæф.

Цæрджыты æдасдзинад ифтонг кæныны нысанæн Хуссар Ирыстоны арæнхъахъ-хъæнджытæ дæр сæвæрдтой пост æмæ хуссарирыстойнаг тыхон структурæтæ уым хъахъхъæнынц цæрджыты æнцойад.

Хæлд цæуы Хуссар Ирыстоны уæлдæфон тыгъдад

Ергнеты хъæумæ хæстæг механизмты фæлгæтты ацы фембæлд цыд бирæ рæстæг. Коцты Егоры ныхæстæм гæсгæ фæрстæ уынаффæ кодтой Хуссар Ирыстоны уæлдæфон тыгъдад хæлд кæй цæуы, уыцы фарстыл дæр. Йæ ныхæстæм гæсгæ хуссарирыстойнаг фарс раразмæ кодта æрмæст æнæпилотон тæхæн аппараттæ нæ, фæлæ æндæр тæхæн аппараттæ дæр кæй тæхынц, уыцы фарст.

“Уыцы бархалæн цаутæ хынцыд цæуынц цæрæн пункт Уисты районы дæр, цыран уавæр нырма æндыгъд у æмæ, уыцы аппаратты тæхыны хъуыддаг гæнæн ис, æмæ æркæна инцидентмæ. Ахæм уавæры бæрндзинад хæсдзæнис, уæлдæфон тыгъдад кæй аппараттæ халынц, уыцы фарс. Æмæ уым та, æрмæстдæр, вæййы гуырдзиаг фарсы тæхæн аппараттæ», – банысан кодта делегацийы сæргълæууæг.

Уисты хъæуы æнæзакъонон пост аиуварс кæныны фæдыл фембæлды уадиссаг фæстиуæг къухты нæ бафтыд. Коцты Егоры ныхæстæм гæсгæ æнæмæнг адарддæр кæнын хъæуы уыцы здæхты бадзырдтæ æмæ хъæуы Хуссар Ирыстоны позици гуырдзиаг фарсмæ ноджыдæр ахæссын. Ныфс бавæрдта, уыцы фарст скъуыддзаг кæй æрцæудзæн сабырадон бадзырдты фæстиуæгæн.

Рæхджы уыдзæн радон фембæлд

Механизмты куысты хуссарирыстойнаг делегацийы сæргълæууæг ма куыд радзырдта, уымæ гæсгæ Евроцæдисы хъусдарджыты миссийæ фембæлды хайад райста ног сæргълæууæг Марек Щигаль.

Фембæлды кæрон фæрстæ бадзырдтой радон фембæлды развæлгъау боныл, ома эпидемиологон æмæ æдасдзинады уавæртæ хынцгæйæ 24 сентябры фæнд кæнынц куыст адарддæр кæнын.

КЪÆБУЛТЫ Маринæ