Инциденттæ ма æруадзын æмæ сæм хъусдард здахыны фæдыл механизмты формат нымад у ахсджиаг фæзуатыл, цыран дунеон организациты минæвæртты хайадистæй Хуссар Ирыстон æмæ Гуырдзыстоны минæвæрттæн фадат ис паддзахадон арæнтыл æмæ æндæр æрцæугæ цаутыл æруынаффæ кæнынæн.
Механизмты куыстæн фæстиуджытæ аразгæйæ Хуссар Ирыстонæй механизмты форматы хуссарирыстойнаг делегацийы сæргълæууæг, Фæсконфликтон фарстатæ бæстонкæныны фæдыл РХИ-йы Президенты æххæстбарджын минæвары хæдивæг Коцты Егор информацион фæрæзтæн радзырдта, зæгъгæ, фылдæр хъусдард здæхт цæуы, цалдæр азы размæ гуырдзиаг полициæгтæ Уисты хъæуы цы æнæзакъонон пост сæвæрдтой уымæ, афтæ арæнты фæйнæфарс æрцæугæ цаутæ æмæ паддзахадон арæнтæ халынимæ баст фарстатæм.
Уисты хъæуы æнæзакъонон пост – æнцойад халæг
«Хуссар Ирыстоны территорийыл цы æнæзакъонон пост æвæрд æрцыд, уыцы ахсджиаг фарст Хуссар Ирыстоны минæвæрттæ рæгъмæ хæссынц 2020 азæй фæстæмæ. Фæлæ абоны онг дæр гуырдзиаг фарс ацы фарстмæ кæсы уæлæнгай цæстæй. Æгæрыстæмæй йæ хонынц «пионерты лагерь» дæр æмæ, зæгъгæ, уым цы полициæгтæ ис, уыдон тæссагдзинад хæссæг не сты», – загъта Егор.
Фæлæ, йæ ныхæстæм гæсгæ, уыцы посты æппынæдзух ис 12-15 хотыхджын полициæгтæ, кæцытæ, кæй зæгъын æй хъæуы, сты тæссагдзинад хæссæг. Уымæн æмæ 15 адæймаджы сты взвод æмæ хъæуы цæрджытæн уынгты сæрибарæй цæуын у зын.
Уæлдæфон тыгъдад хæлд цæуы
Механизмты куысты ма дзырд цыд, Гуырдзыстоны тæхæн аппараттæ уæлдæфы тыгъдад кæй халынц, уый тыххæй дæр. Фæлæ, зæгъгæ, уыдон нæ халынц паддзахадон арæнты фæтк, уымæн æмæ тæхынц æрмæстдæр сæхи территорийыл. Уый раст нæу. Коцты Егор куыд банысан кодта, уымæ гæсгæ боныфæстагмæ ацы проблемæ бæстон хъуамæ æрцæуа. Уымæн æмæ гуырдзиаг фарс æппынæдзух дзуры уый, ома уыдон фарсæрдыгæй нæ тæхынц æнæпилотон тæхæн аппараттæ, фæлæ нæ хъусдарджытæ хынцынц уыцы хъуыддаг.
Паддзахадон арæнтыл хъуамæ уа фæтк
Куыд зонæм, афтæмæй арæх хæлд цæуы паддзахадон арæнты фæтк. Хуссар Ирыстоны арæнтæ æппынæдзух хæлд цæуынц Гуырдзыстоны полициæгты минæвæртты руаджы æмæ паддзахадон арæнтæм хæстæг хотыхджын адæймæгтæ кæй ис, уымæй. Фылдæр хатт уыдон вæййынц цуангæнджытæ, фæлæ хотыхджын адæймаг кæдфæндыдæр у тæссагдзинад хæссæг.
Хуссарирыстойнаг делегацийы сæргълæууæджы ныхæстæм гæсгæ паддзахадон арæнты фæткхалджытæм ахасты пайда цæуы гуманон ахастæй æмæ æнæ ивартæй æрвыст æрцæуынц Гуырдзыстоны территоримæ, кæд æмæ уымæй размæ уыцы æмбæстаг ницы бархалæн цау сарæзта, уæд.
Уый æмрæнхъ, Коцты Егоры ныхæстæм гæсгæ, механизмты хайадисджытæ кæрæдзи бамбæрстой иуæй-иу гуманитарон фарстытæм ахасты. Уыдонæй иу у – донхæргæнæн сезоны Ленингоры районы Цъинагары зонæйы хъæутæ донхæры донæй цæмæй парахатæй пайда кæной.
Хуссарирыстойнаг делегацийы сæргълæууæг банысан кодта, зæгъгæ, механизмты фæстаг фембæлды дзырд цыд, коронавирусон инфекци цалынмæ нæ райтынг, уæдмæ цы конкретон фарстатыл уынаффæ цыд, уыдонмæ раздæхой. Ацы фембæлды рæстæджы сæ къухы бафтыд уый, æмæ механизмты куысты боны фæткмæ кæй æркæсдзысты.
Уый фылдæрбæрцæй баст у фембæлды модератортыл – Евроцæдис æмæ ЕÆÆО-йы минæвæрттыл. Хуссарирыстойнаг фарсы ныфс ис, æмæ уый æвæрццагæй бандавдзæн йæ куыстыл.
Информацион фæрæзтимæ æмархайд
Механизмты куыстæн хатдзæгтæ аразынæн уымæй размæ фембæлдтыты рæстæджы информацион фæрæзты минæвæрттæн фадат уыд иннæ хайадисджытимæ ныхас кæнынæн.
«Механизмты форматы куысты фæстæ информацион фæрæзты минæвæрттæн чи дзуапп кæны, уыцы Евроцæдисы миссийы минæвар фарста мæн, зæгъгæ, ныхас кæндзынæ журналисттимæ. Кæй зæгъын æй хъæуы, уыдон цымыдис кодта гуырдзиаг информацион фæрæзтимæ ныхас. Ныр фæстаг дыууæ раунды сæ уыцы фарст дæр нал цымыдис кæны. Уый размæ уынаффæ кодтам уыцы фарстыл æмæ бадзырдтам, фембæлды кæрон дыууæфарсæрдæгæй журналисттæн кæй уыдзæн фадат йæ хайадисджытимæ ныхас кæнынæн.
Куыд уынут, афтæмæй та ацы хатт дæр ныхас кæнын æрмæстдæр хуссарирыстойнаг информацион фæрæзтимæ. Ацы хъуыддаг цæмæн афтæ у, уымæн мæм дзуапп нæй», – загъта Коцты Егор.
Куыд зонæм, уымæ гæсгæ Хуссар Ирыстон, Гуырдзыстон æмæ Евроцæдисы минæвæртты æхсæн уæвынад кæны «тагъдыл бастдзинад». Уый у форматы уæвæг сæйраг механизм, кæцыйы руаджы оперативонæй бæстон цæуынц уæвæг фарстатæ æмæ проблемæтæ.
Делегацийы сæргълæууæг куыд банысан кодта, уымæ гæсгæ механизмты фæлгæтты радон фембæлд уагъд æрцæудзæн 2 марты.
Къæбулты Марина
