Куыд ма хъусын кодтам, афтæмæй нæ республикæмæ ивгъуыд къуырийы дыууæбонон кусæгон балцы æрцыдысты уазджытæ Уæрæсейæ, Фæсарæйнаг бæстæтимæ æхсæнрегионалон æмæ культурон бастдзинæдты фæдыл УФ-йы президенты управленийы къухдариуæггæнæг Игорь Масловы сæргълæудæй.
Уазджытæ фыццаг бон бабæрæг кодтой Дзау æмæ Знауыры районы, афтæ ма нæ горæты Инвестпрограммæйы фæлгæтты арæзтцæуæг объекттæ.
Дыккаг бон уазджытæ бацыдысты æмæ федтой, цалдæр азы размæ Инвестицион проектмæ гæсгæ Присы хъæуы цы дыргъдон сырæзт «Сады Ирыстона», зæгъгæ, уый. Ам 50 гектары территорийыл сагъд æрцыд 160 000 фæткъуыбæласы. Проекты инициатор уыд Ростовы областæй Константин Ластович. Йæ реализаци цыд Инвестицион программæйы фæлгæтты. Æмткæй рахицæн кодтой 240 милуан сомы. Уыдонæй инвесторæн йæхи фæрæзтæ уыдысты 60 милуан сомы. Талатæ æрластой Сербийæ. Зæххы мæры ауагътой сæрмагонд шлангтæ, цæмæй дыргъдоны æппæт территорийыл дæр донхæр цæуа. Инвестор ма хъуамæ сарæзтаид дыргъдоны фарсмæ дыргътæ æмæ халсартæфснайæн дыууæ ангары. Ныфс æвæрдта, 50 кусæгон бынаты кæй ратдзæн республикæйæн. Фæлæ ныртæккæ фæткъуыбæлæстæ сты æдзæллаг уавæры. Инвестор Константин Ластовичæн йæ хъуыддæгтæ йæхи фæндиаг нæ ацыдысты æмæ йæ Ирыстоны ничиуал федта. Ацы дыргъдон ныртæккæ ис экономикон райрæзты министрады дæл-бар. Агурынц ын æндæр инвестор, дыргъгуысты къабазы фæлтæрдджын чи уа æмæ дыргъдон чи сæндидзын кæна, ахæм.
Уый фæстæ уазджытæ сæ фæндаг акодтой Ленингоры поселокмæ. Раздæр уал бацыдысты уырыссаг скъоламæ. Ам сыл цытджын æгъдауæй сæмбæлдысты районы сæргълæууæг Гæджиты Иларион æмæ скъолайы директор Битарты Лали. Ацы аз скъолайы уыдис 84 ахуыргæнинаджы. Уыдон æппынæдзух сты Хуссар Ирыстоны Уæрæсейы Æххæстбарджын минæвар Мурат Кулахметовы цæстдарды бын. Битарты Лали фехъусын кодта уазджытæн се скъола техникæйæ ифтонг кæй у, уæзгæ хуынтæ кæй райсы Уæрæсейы минæварадæй. Гуманитарон миссийы руаджы та сæм ацы аз уырыссаг кълас конд кæй æрцыд. Уыцы кълас ифтонг у æппæт литературæ æмæ цæстуынгæ æрмæджытæй. Скъолайы ахуыр кæнынц арæнгæрон службæгæнджыты сывæллæттæ. Уыдонæн ис уавæртæ, ис сын нырыккон техникæйыл зонæнтæ райсынæн, афтæ ма спортæй архайынæн дæр. Уымæн æмæ скъолайы спортивон зал дæр ифтонг у æппæт спортивон инвентарæй.
Уазджытæ сæ кусæгон инспекцион азылд адарддæр кодтой Ленингоры донсыгъдæггæнæн арæзтадмæ. Ис ахæм объекттæ, кæцытæ арæзт цæуынц дыууæ фæлтæрæй, ома, сæ арæзтад иу азæй хизы дыккагмæ. Уыдон нымæцмæ хауы ацы вазыгджын арæзтад дæр – фарон куыстытæ райдыдтой æмæ сæ фæуыдзысты ацы аз.
Бацыдысты ма бæгæныфыцæн завод «Высокогорная кельская пивоварня»-мæ. Ам уазджытыл сæмбæлд Хуссар Ирыстоны базарадон минæвар Уæрæсейы Таймураз Гогинов. Уый равдыста продукцийы каталог, радзырдта доны уникалон миниуджыты тыххæй. Ацы куыстуат уæрæх кæны йæ рауагъдадон гуырахст. Проектон гуырахстмæ куы рахиза, уæд дæтдзæн 50 тоннæйы продукци иу бонмæ. Кусджыты нымæц та, дам, схиздзæн 100-мæ. Проект «Высокогорная кельская пивоварня» арæзт æрцыд Инвест-проекты руаджы. Уый размæ ам уыд паддзахадон унитарон куыстуат «Алутон». Ныр ацы бæгæныфыцæн завод рахызт ног æмвæзадмæ, æвдисы æвæрццаг экономикон эффект. Куыстуат дарддæр фæнд кæны дæс сортæй фылдæр лимонад, минералон æмæ нуазыны дон уадзын дæр.
Уазджытæ райгондæй баззадысты заводы куыстæй. Проект «Высокогорная кельская пивоварня»-йы рахуыдтой Хуссар Ирыстоны территорийыл инвестициты хуыздæр проекттæй иуыл. Кусæгон балц кæронмæ куы æрхæццæ, уæд УФ-йы экономикон рæзты министры хæдивæг Дмитрий Вольвач загъта: «Дыууæ боны дæргъы республикæйы разамынад президент Гаглойты Аланы сæргълæудæй æмæ нæ делегаци зæрдиаг куыст бакодтой.
Лæмбынæг равзæрстам Хуссар Ирыстоны экономикон рæзты уавæртæ. Кæй зæгъын æй хъæуы, УФ-йы æрдыгæй æххуыс удзæн – нырыккон программæтæн æмæ 2022-2025 азты ног инвестицион циклмæ цы объекттæ бахаудысты, уыдонæн дæр».
Уырны мæ, ныртæккæ республикæйы разамынады цы тыхджын æмæ профессионалон комæндæ ис, уыимæ алцыдæр нæ къухы бафтдзæн».
Кусæгон балцы хайад райстой УФ уæлвæткон æмæ æххæстбарджын минæвар Мурат Кулахметов, РХИ-йы Хицауады сæрдар Джуссойты Константин, Архитектурæ æмæ арæзтады министр Елдзарты Константин, экономикон райрæзты министр Тадтаты Дзамболат æмæ æнд.
УАЗÆГТЫ Марфæ
