Ног спортивон сезонмæ сæхи цæттæ кæныны фæлгæтты 10-бонон цæттæгæнæн сбортæ уагъд æрцыдысты боксы скъолайы хъомылгæнинæгтæн. Сæ ауадзынæн æвзæрст æрцыд Знауыры районы дзюдойы скъола, цыран хорз уавæртæ ис тренировкæтæ уадзынæн. Спортивон къордмæ хаст æрцыдысты уыцы боксертæ, кæцытæ ацы аз равыдыстой иууыл хуыздæр бæрæггæнæнтæ.
Спортсменты бабæрæг кодта Фæсивæдон политикæ æмæ спорты фæдыл комитеты сæрдар Хубежты Руслан. Уый базонгæ сборты программæ æмæ тренировкæтæ уадзыны уавæртимæ. Спортсментæн сбортæ уадзынц боксы скъолайы тренертæ. Уыдон бацæттæ кодтой сæрмагонд программæ. Боны дæргъы сын уагъд цæуынц æртыгай тренировкæтæ. Боксертæн уавæр ис тренажерон залмæ цæуынæн дæр, спорты командон хуызтæй хъазын. Скъолæйы территорийы ис футбол, волейбол æмæ баскетболæй хъазæн фæзуæттæ. Уагъд ма сын цæуынц кросстæ. сæрмагонд хъусдард здæхт цæуы спортсменты хæлцмæ.
Сæйраг къордæй хицæнæй йæхи цæттæ кæны æвзæнгты ‘хсæн Уæрæсейы чемпионаты уæлахиздзау Гæджиты Гурам. Уый хъуамæ хайад райса æппæтæуæрæсейон ерысты.
Тренировкæтæй сæрибар рæстæджы спортсментæ бакæсынц кинофильмтæм, хъазынц шахмæттæ æмæ шашкæтæй.
Банысан кæнын хъæуы уый дæр, æмæ ацы скъолайы ахæм сбортæ фыццаг хатт уагъд кæй нæ цæуынц. Ног сезонмæ сæхи цæттæ кодтой спорты æндæр хуызтæй архайæг спортсментæ дæр. Фæсивæдон политикæ æмæ спорты фæдыл комитеты сæрдар Хубежты Руслан куыд зæгъы, афтæмæй дарддæр дæр уагъд цæудзысты ахæм цæттæгæнæн сбортæ.
ХУРИТЫ Батрадз
