Фыццаг бон
Хуссар Ирыстонмæ дыууæбонон кусæгон балцы æрцыдис уæрæсейаг делегаци, фæсарæйнаг бæстæтимæ æхсæнрегионалон æмæ культурон бастдзинæдты фæдыл УФ-йы президенты управленийы къухдариуæггæнæг Игорь Масловы сæргълæудæй. Делегацийы сконды ма уыдысты УФ-йы регионалон райрæзты программæтты департаменты хистæры хæдивæг Александр Мишенков, УФ-йы Экономикон райрæзты министрады сæрмагонд программæтты æмæ проектты департаменты хистæры хæстæ æххæстгæнæг Анна Попова æмæ йæ хæдивæг Антон Мельник, афтæ ма Энергетикæйы министрады минæвæрттæ. Уæрæсейаг делегациимæ ма бамбал сты Абхазы Республикæйы капиталон арæзтады управленийы хистæр Тимур Агрба æмæ йæ хæдивæг Демир Гамиссония.
Уазджыты размæ ацыд РХИ-йы Хицауады сæрдар Джуссойты Константин æмæ Цхинвалмæ цæугæйæ сæ фæндаг ракодтой Дзауы районы сывæллæтты лагерь «Мзиугом»-ыл, кæцыйы нырма кæронмæ нæ фесты арæзтадон куыстытæ. Ам сæм æнхъæлмæ кастысты Республикæ Хуссар Ирыстоны Уæрæсейы Федерацийы Уæлвæткон æмæ Æххæстбарджын минæвар Марат Кулахметов, РХИ-йы арæзтады министр Елдзарты Константин æмæ хицауады æндæр бæрнон кусджытæ.
«Мзиугом»-ы лагеры арæзтад райдыдта 2021 азы Инвестпрограммæйы фæлгæтты æмæ ацы азы кæронмæ хъуамæ лæвæрд æрцæуа эксплуатацимæ. Ахæм объект нæм ныры онг никуы арæзтой. «Мзиугом»-ы ис цалдæр бæстыхайы æдæппæт 150 адæймаджы бынатимæ, амфитеатр, спортивон фæзуæттæ æмæ ма æндæр хиирхæфсæн бæстыхæйттæ. Игорь Масловы хъуыдымæ гæсгæ ацы объект домы фарстатæ, кæцыты æвæстиатæй хъæуы аскъуыддзаг кæнын.
«Пъланмæ гæсгæ лагерь кусдзæнис æрмæстдæр сæрдыгон мæйты, ома, ка-никулты рæстæджы. Иннæ афонты та уыдзæнис æдзæрæг æмæ ахæм егъау бæстыхæйттæ дарынæн бирæ финансон фæрæзтæ бахъæудзæнис. Мæнмæ гæсгæ уый раст нæу æмæ йыл ахъуыды кæнын хъæуы. Хорз уаид æмæ афæдзы алы афон дæр куы кусид», – банысан кодта уæрæсейаг делегацийы сæргълæууæг.
Дзауы районæй уазджытæ ацыдысты горæт Цхинвалмæ Ирæтты уынгмæ, цыран йæ тæккæ тæмæны ис цыппар бирæуæладзыгон цæрæн хæдзæртты арæзтад. Арæзтадон организаци «СТМ-Юг»-ы сæргълæууæг Коцты Олег куыд радзырдта уазджытæн, афтæмæй арæзтадон куыстытæ цæуынц графикæй тагъддæр.
«Дыууæ корпусы кæронмæ фесты арæзтадон куыстытæ. Стæй ма кæронмæ бахæццæ сты æппæт коммуникацитæ ауадзыны куыстытæ дæр. Дыууæ корпусы та ма нын баззадис æрмæстдæр уæлæнгай акусинæгтæ æмæ нæ фæнды, цæмæй сæ сæрды фæудмæ радтæм эксплуатацимæ», – зæгъы подрядон организацийы хистæр.
Уазджытæ азылдысты фатертыл æмæ баззадысты райгондæй – ницы фау сæм уыд æрхæссæн. Маслов раппæлыд аразджытæй æмæ ма банысан кодта, зæгъгæ, ныр та сæйраг у, цæмæй фатертæ лæвæрд æрцæуой, æцæгæйдæр чи тыхсы, ахæмтæн.
Цхинвалы районы Присы хъæугæрон ног саразгæ завод «Ир-Базальт»-ы дæр æрæджы радтой эксплуатацимæ, фæлæ нырмæ æххæстæй нæ кусы – фæззæгмæ йын йæ ифтонггæрзтæ кæронмæ монтаж фæуыдзысты æмæ коммуникацитæ бауадзыны куыстытæ бакæндзысты. Уæрæсейаг делегацийы минæвæртты бацымыдис кодта заводы кусджыты нымæц. Куыстуаты директор Джиоты Роман куыд бамбарын кодта, афтæмæй дзы райдианы кусдзысты 43 адæймаджы.
«Июлы мæйы нæм хъуамæ æрцæуой уæрæсейаг специалисттæ, цæмæй нын нæ пец бацæттæ кæной эксплуатацимæ. Уыцы процедурæ саразынæн рæстæг хъæуы иу мæй. Иумæйагæй сисгæйæ, цæмæй куысты процесс æнæкъуылымпыйæ цæуын райдайа, уый тыххæй нæ бахъæудзæнис æртæ мæйы бæрц», – зæгъы Джиоты Роман.
Æрцæугæ делегаци ма бабæрæг кодта ног хиды арæзтад дæр. Дон æгæр ивылд кæй у, уый фæстиуæгæн ацы объекты нырма активон арæзтадон куыстытæ нæ цæуынц.
Инспекцион азылды фæстæ Игорь Маслов фембæлд бæстæйы президент Гаглойты Аланимæ æмæ æрдзырдтой нæ республикæйы райрæзты æмæ æмгуысткæнынады дыууæварсон фарстатыл.
ДЖИОТЫ Алыксандр
