Миграцийы фарстаты фӕдыл милицийы управленийы кусджытӕ азылдысты мигранттыл, бабӕрӕг сӕ кодтой, кӕм регистраци сты, уыцы цӕрӕнуӕтты. Рейдты рӕстӕджы инспектортӕ сгӕрстой фӕсарӕйнаг ӕмбӕстӕгты гӕххӕттытӕ, кастысты кусыны бары патентты ӕмгъуыдтӕм. Хистӕр инспектор Цхуырбаты Тимур куыд зӕгъы, афтӕмӕй ма сӕ хъус дарынц мигрантты цӕрæн уавӕртӕм дӕр, бæлвырд кæнынц кӕд сæ исчи рынчын у ӕмӕ йӕ медицинон ӕххуыс хъӕуы.
«Ахӕм рейдон мадзӕлттӕ уадзӕм алы къуыри дӕр ӕмӕ нысанмӕздӕхт сты, цӕмӕй мигранттӕ ӕппынӕдзух уой контролы бын. Семӕ кӕнӕм профилактикон куыст, ӕмбарын сын кӕнӕм бынӕттон ӕгъдӕуттӕ ӕмӕ уагахасты ӕууӕлтӕ. Фӕдзӕхсӕм сӕ, цӕмӕй ма халой ӕхсӕнадон фӕтк, æмæ нӕ республикӕйы уӕвыны режим. Баххуыс сын кӕнӕм сӕ гӕххӕттытӕ ӕмбӕлонӕй саразынӕн дӕр. Истӕуыл куы фӕтыхсой, уӕд ӕй зонынц, миграцийы фарстаты фӕдыл управленийы кусджытӕ сӕ фарсмӕ кӕй балӕудзысты, уый. Басгӕрстыты рӕстӕджы кӕд исты фӕткхалӕн цаутимӕ сӕмбӕлӕм, уӕд сӕ административон бӕрндзинадмӕ ӕркӕнӕм, кӕнӕ та сӕ бафӕдзӕхсӕм», – банысан кодта Цхуырбаты Тимур.
Инспекторы ныхӕстӕм гӕсгӕ фӕстаг рӕстӕджы мигрантты нымӕц къаддӕр кӕны. Цӕимӕ баст у ацы хъуыддаг, уый бӕлвырд нӕу – ӕвӕццӕгӕн ӕндӕр ран хуыздӕр уавӕртӕ ссардтой кусынӕн. Нӕ республикӕйы арӕзтадон куыстытӕ уыйбӕрц нал цӕуы ӕмӕ уымæ гæсгæ дæр къаддæр кæны фæсарæйнаг кусджыты нымæц
ДЖИОТЫ Алыксандр
