Цины цæссыгтæ, мидбылхудт, бузныджы ныхæстæ æмæ тыхджын къухæмдзæгъд, – афтæ ацыд, дæргъвæтин рæстæджы кæмæ æнхъæлмæ кастысты, «2021 азы – Азы адæймаг»-ы хорзæхты уыцы церемони, кæцыйы сорганизаци кодта Фæсивæдон политикæ æмæ спорты комитет «Россотрудничество»-йы минæварады æххуысæй.
Уыцы æхсызгон цау уыд Хетæгкаты Къостайы номыл Хуссар Ирыстоны паддзахадон драмон театры. Мадзалмæ æрæмбырд бирæ адæм, уыцы нымæцы хæстæджытæ, æмбæлттæ æмæ хуымæтæг адæм, кæцыты фæндыд фæуæлахизуæвджыты хорзæхджын кæныны мадзалы хайад райсын. Премитæ лæвæрд æрцыдысты фынддæс номинацийæ. Фæуæлахизуæвджытæн «Амыран»-ы статуэткæ лæвæрдтой министрадтæ æмæ ведомствоты къухдариуæггæнджытæ, республикæйы спорт æмæ культурæйы къабазы минæ-вæрттæ, театры артисттæ, æхсæнадон архайджытæ. Алы номинацийы рæстæджы дæр æвдыст цыд видеоролик, цыран дзырд цыд, фæуæлахизуæвæг цы фадыджы фесгуыхт, уый тыххæй.
«Азы дохтыр»-ы номинацийы фæуæлахиз республикæйы бирæпрофилон медицинон центры æвзонг дохтыр Гаглойты Жаннæ. Хорзæх райста Хицауады Сæрдар Бекъойты Геннадийы къухæй, кæцы банысан кодта уыцы профессийы ахсджиагдзинад.
«Азы ныфс»-ы номинацийы фæуæлахиз бирæпрофилон медицинон центры дохтыр-терапевт «сырх зонæйæ» Джиоты Теона, «Азы бархион»-ы номинацийæ – Дзабиты Руслан, кæцы æххуыс кодта рынчынтæн пандемийы рæстæджы. Хорзæхтæ дæтгæйæ, республикон бирæпрофилон медицинон центры директоры хæстæ рæстæгмæ æххæстгæнæг Джиоты Витали сын сæ куыст рахуыдта, хæрзиуæгон æмæ саргъгæнæн кæмæн нæй, ахæм.
«Афæдзы студент» ссис Хуссар Ирыстоны Паддзахадон университеты филологион факультеты студенткæ Кокойты Ландæ. Æвзонг чызгæн уый уыд æнæнхъæлæджы æхсызгон цау. Сценæйæ уый раарфæ кодта мадзалы организатортæн, ахæм бæрзонд аргъ ын кæй скодтой, уый сæраппонд æмæ бузныг загъта ХИПУ-йы ректорæн, студенттæн кæй æххуыс кæны, уый тыххæй, афтæ ма банысан кодта, сæрыстыр кæй у, ацы ахуыргæнæндоны æмæ ацы факультеты кæй ахуыр кæны, уый тыххæй.
«Азы нывгæнæг»-ы номинацийы уæ-лахизуæвæг уыд Хуссар æмæ Цæгат Ирыстоны сгуыхт нывгæнæг, Уæрæсейы Нывгæнджыты цæдисы уæнг Къадзты Вадим, кæцыйы конд нывты равдыстытæм æрæмбырд вæййынц бирæ адæм, 2008 азы «Петербурджы музæ»-йы конкурсы лауреат. Хорзæх радтой нывгæнæджы мадмæ.
«Сызгъæрин къухтæ»-йы номинацийæ схорзæхджын кодтой Кæсæбиты Андрейы, сценæйæ йын хъæдæй æмæ бронзæйæ арæзт композицитæ равдисгæйæ.
«Ирыстоны хъæлæс» ссис телепроект «Ног стъалы – 2020»-ы хайадисæг, æхсæ-надæмон вокалон конкурс «Зарæг»-ы Гран-прийы хицау Харебаты Мартæ.
«Хæлардзинады миссийы» номинацийы фæуæлахиз Гуыцмæзты Валери – бирæ хæттыты фæуæлахизуæвæг æмæ Æппæтуæрæсейон турнирты призер. Дыккаг даны сау роны хицау, Хуссар Ирыстон, Цæгат Кавказы æмæ Приволжскы федералон округы чемпион, кæцы республикæйы бакодта кореаг националон спорт тхэквондойы секци. Хорзæх ын радта Хуссар Ирыс-тоны «Россотрудничество»-йы минæвар Сергей Скворцов.
Номинаци «Экологион хъæппæрис» рамбылдта æхсæнадон организаци «Кæрдæггъуыз Алани», кæцыйы къухдариуæггæнæг у Габайты Зæлинæ. Уый хорзæх райста республикæйы Уæрæсейы минæварады минæвар Александр Журовы къухæй.
«Азы музыкант» ссис скрипач Тадтаты Григори. Хорзæх уæлахизуæвæгæн радта ансамбль «Бонвæрон»-ы бындурæвæрæг Гуыцмæзты Георги. Уый Тадтаты Аланы схуыдта курдиатджын музыкант, кæцы республикæйы къласикон музыкæйы рæзтмæ бахаста стыр хайбавæрд.
«Зæрдæйæ-зæрдæмæ» номинацийы уæлахизуæвæг ссис Дзауы скъола-интернаты хистæркъласон Гаглойты Владис-лав. Хæрзаудæн фонд «Бæллицты фонтан»-ы фæлгæтты лæппу йæхицæн ницы ракуырдта, фæлæ йæ бафæндыд 50 кг къаффеттæ Ленингоры сывæллæтты хæдзары хъомылгæнинæгтæн. «Лæппу стыр зæрдæйы хицау у», – афтæ йæ схуыдта сывæллæтты хæдзары директор Гæбæраты Дзерассæ, кæцы хорзæх радта лæппуйæн.
«Азы æнтыстыты» номинацийы фæуæлахиз сты альбом «Хурæн зарыд мæй»-йы æххæстгæнджытæ Джиоты Любæ æмæ Хъодалаты Мария.
«Аудæг зондамонæг» ссис æнахъомты хъуыддæгты фæдыл инспекцийы хистæр, милицийы булкъон Гатайты Лали, кæцы 28 азы архайы рæзгæ фæлтæры ‘хсæн фыдракæндты профилактикæйыл.
«Азы командæ» ссис футболон командæ «Барсаланы» – бирæ æппæтуæрæсейаг турниртæ æмæ ерысты уæлахиздзау, тренер Хъазиты Аланы къухдариуæгадæй.
Мадзал сæ музыкалон номыртæй барæсугъд кодтой Саппиты Зæлинæ, Харебаты Мартæ, Джиоты Любæ æмæ Хъодалаты Мария.
ИА «Рес»
Comments are closed, but trackbacks and pingbacks are open.