Æрæджы социалон хызæджы апарахат информаци, зæгъгæ, браконьертæ амардтой арс æмæ йæ цыппар лæппыны сидзæрæй баззадысты. Фæзындис лæппын æрсытæн видеотæ æмæ нывтæ не ‘мбæстæгтимæ æмæ нæ республикæйы Экологон æхсæнадон змæлд «Зеленая Алания» æрдомдта æмбæлон органтæй, цæмæй ссарой арсы лæппынты æмæ бафхæрой цуанонты, кæцытæ сарæзтой ацы фыдракæнд.
Агурын сæ райдыдтой æмæ дзы дыууæйы уайтагъд ссардтой. Цалдæр боны фæстæ æртыккаджы дæр бахастой Ӕрыгон натуралистты станцæмæ. Баззад ма дзы цыппæрæм лæппын, кæцы не ‘фтыд къухты. Специалисттæ куыд æмбарын кæнынц, афтæмæй арсы лæп-пын æгæр бирæ куы аззайа адæмы хсæн, куы сыл сахуыр уа, уæд йæхигъæдæй æрдзы нал схъомыл уыдзæн, – адæмæй нал тæрсдзæнис æмæ æдзух йæхи æппардзæнис адæмы цæрæнуæттæм хæлцагурæг.
21 апрелы Сарабукы хъæуы 51-аздзыд цæрæг фехъусын кодта милицимæ, зæгъгæ хъæугæрон ссардтон арсы лæппын, кæцы мæм ралыгъд хъæдæй. Ӕххормаг æмæ фæллад арсы лæппыны ахаста хæдзармæ æмæ йын бахæрын кодта. Фæстæдæр æм бацыдысты милицийы кусджытæ, рахастой арсы лæппыны æмæ йæ радтой Экологон æхсæнадон змæлд «Зе-леная Алания»-йы кусджытæм. Ацы арсы лæппын ма цалдæр боны куы баззадаид сæфтæй, уæд ын ницыуал баххуыс уыдаид, нал рацахуыр уыдаид, кæнæ та йæ исты сырд бахордтаид.
Ныридæгæн цыппар лæппыны дæр сты Знауыры районы Балтайы хъæуы цæрæг Плиты Лаврикмæ, кæцы нæ республикæйы Цуанонты цæдисы кусы егерæй. Раздæр дæр æрцыд иу ахæм цау 2020 азы æмæ уæд дæр сидзæр арсы лæппынты схъомыл кодта æмæ сæ æрдзы хъæбысмæ ауагъта Лаврик. Ацы хъуыддаджы йын консультацитæ фæдæттынц Тверы горæтæй æмбæлон специалисттæ, кæцытæ йын ныр дæр амонынц æмбæлон уагыл арсы лæппынты куыд хъомыл кæнын хъæуы, уыцы сусæгдзинæдтæ.
Нæ республикæйы территорийыл арс марыны бар нæй – хаст сты Хуссар Ирыстоны Сырх чиныгмæ. Фыдгæнæг ивар æрцæуы 77 мин сомы бæрц, фæлæ йæ хъуыддаг куыд æвдисы, афтæмæй æдзæсгом цуанонтæ нæ тæрсынц ацы иварæй – æвæццæгæн ын йæ суммæ фæфылдæр кæнын бахъæудзæнис æмæ фыдгæнджыты та кæнын хъæудзæнис уголовон бæрндзинадмæ. Ныридæгæн уал рабæрæг ис, ацы фыдракæнд кæй æрцыд Цхинвалы районы Бихъары хъæумæ ввахс. Барадхъахъхъæнæг органтæ уадзынц æмбæлон мадзæлттæ, цæмæй сбæлвырд кæной фыдгæнджыты.
ДЖИОТЫ Алыксандр
Comments are closed, but trackbacks and pingbacks are open.