Хуссарирыстойнаг армлестлер Хæбæлаты Эдуард ссис Мæскуыйы Уæлдæр ахуыргæнæндæтты ‘хсæн уагъдцæуæг универсиадæйы уæлахиздзау. Эдуард хæцыд 100 кг уæзы категорийы, цыран архайдтой 20 спортсмены. Ирон богал акодта 7 тохы æмæ сæ алкæцыйы дæр тыхджындæр уыд йæ ныхмæлæуджытæй.
МИНИ-ФУТБОЛ
Цхинвалы райдыдта мини-футболæй чемпионат. Хайад дзы исынц 10 командæйы. Хъæзтытæ уагъд цæудзысты дыууæ мæйы дæргъы æрвыл хуыцаубоны дæр. Ерысты уагæвæрдмæ гæсгæ командæтæ иууылдæр сты иу къорды æмæ алкæцы командæ дæр иннæтимæ акæндзæн фæйнæ иу хъазты. Афтæмæй, чемпионаты фæлгæтты уыдзæн 9 туры.
УÆГЪДИБАР ХЪÆБЫСХÆСТ
Дагъыстайнаг хъæу Бабаюрты уагъд æрцыд паддзахадон архайæг Шейх Султан-Муты номарæн турнир уæгъдибар хъæбысхæстæй. Ерысты 92 кг уæзы категорийы сыгъзæрин майдан рамбылдта Санахъоты Радион. Турниры æвзист призер та ссис Уалыты Вильям. Уый та архайдта 110 кг уæзы категорийы.
ХУРИТЫ Батрадз
