Экономикон рæзты министрад чысыл æмæ астæуккаг амалиуæгадæн цы хатырон кредиттæ хъуамæ радтаид, уый фæкъуылымпы коронавирусы аххосæй.
«Куырдиæттæ ист цыд 14-æм январæй 14-æм февралмæ. Бизнесплантæ, сæйраджыдæр, хауынц хъæууон хæдзарады фадыгмæ. Мах фылдæр хъусдард здахæм ахæм амалиуæггæнджытæм, кæцытæн ис фермерон хæдзарадтæ æмæ сæ хъавынц ноджы рауæрæх кæнын. Сæрмагонд къамис апрелы райдианы райдыдта йæ куыст, сахуыр кодта бизнес-плантæ. Кæцыты рахицæн кодтам, уыдонæн ныридæгæн цæттæ кæнынц сæ гæххæттытæ æмæ ацы бонты бангæй рахæсдзысты сæ кредитон фæрæзтæ», – зæгъы Экономикон рæзты министрады социалон-экономикон нывæзтытæ аразыны хайады хистæр Бибылты Нонна.
Ныртæккæ къамисмæ цы 150 куырдиаты ис, уыдонæй æвзæрст æрцыд дыууын.
600 мин сомæй уæлæмæ кредиттæ кæй хъæуы, уыцы амалиуæггæнджытæ хъуамæ ныууадзой бангы хыгъдыл фæдзæхст исад, 400 мин сомæн та хъæуы дыууæ æвдисæн адæймаджы. Бангæй иууыл стырдæр финансон фæрæзтæ райсæн ис 1,5 милуан сомы. Уый тыххæй та ныууадзын хъæуы кæнæ сæрмагонд хæдзар, кæннод та приватизацигонд фатер.
Ацы аз лæвæрд æрцæудзæнис 27 милуан æмæ 110 мин сомы кредиттæ. Къамисмæ куырдиæттæ цы амалиуæггæнджытæ бадæттой æмæ йæ бизнес-плантæ нывыл кæмæн сты, уыдон хъуамæ зоной, ацы аз кæд нæ райсой хатырон кредит, уæддæр æй иннæ аз кæй райсдзысты.
2019 азмæ абаргæйæ 2020 азы астæуккаг æмæ чысыл амалиуæгады тыххæй Паддзахадон бюджетæй хицæн æрцыд 3 милуан сомы фылдæр.
Comments are closed, but trackbacks and pingbacks are open.