Æхсӕнадон организаци ӕрӕвнӕлдта йӕ хӕстӕ æххæст кæнынмæ

Куыд зонӕм, уымӕ гӕсгӕ Хуссар Ирыстоны Президент Гаглойты Алан бахӕс кодта тыхон структурӕты къухдариуӕггӕнджытӕн, цӕмӕй сӕрмагонд ӕфсӕддон операцийы хайадисджыты тыххӕй арӕзт ӕрцӕуа æхсӕнадон организаци. Организаци архайдзӕн операцийы зонӕмӕ гуманитарон уӕзтӕ ласыны фарстытыл, цӕфтӕ чи фесты, афтæ ма чи фӕмард сты, уыдоны  бинонтимæ ӕмархайд кæнын ӕмӕ æндæр хъæуæг фарстытыл.

Æхсӕнадон организацийы сӕйраг хӕс у, цӕмӕй, гӕнӕн уæвгæйæ, ӕххуыс кӕна Хуссар Ирыстоны ӕмбӕстӕгтӕн, кӕцытӕ хайад исынц Уӕрӕсейы Федерацийы сӕрмагонд ӕфсӕддон операцийы ӕмӕ ӕххӕст кӕнынц вазыгджын хӕстон хӕстӕ.

Бӕрӕг куыд у, афтæмæй ацы проекты координатор у бӕстӕйы Хъахъхъӕнынады министрад ӕмӕ ныридӕгӕн бакодта бӕрӕг куыст. РХИ-йы Хъахъхъӕнынады министры хӕдивӕг Сиукъаты Вадим информацион фӕрӕзты минӕвӕрттӕн куыд радзырдта, уымӕ гӕсгӕ ныридӕгӕн цӕттӕ у организацийы уставы проект. Уый ныртæккæ ӕмбӕлон уагдӕтты цӕуы паддзахадон регистрацийы процедурӕтӕ. Официалонӕй регистраци куы ӕрцӕуа, уӕд ӕрӕвналдзӕн, уставмӕ гӕсгӕ æмæ бӕстӕйы разамонӕг цы хӕстӕ сбӕрӕг кодта, уыдон ӕххӕст кӕнынмӕ.

 

Нæ къухты ис конкретон

фæстиуджытæ

«Президент Гаглойты Алан ма бахӕс кодта зонæнты иумиаг банг саразын ӕмӕ нӕм абоны онг цы зонӕнтӕ ис ӕфсӕддон операцийы хайадисджыты тыххӕй, уыдон цæудзысты систематизаци.

Ныридӕгӕн зӕгъӕн ис, ӕмӕ конкретон фӕстиуджытӕ кӕй бафтыд нӕ къухты – сӕрмагонд ӕфсӕддон операцийы нӕ ӕмбӕстӕгтӕй, хъайтардзинад, ныфсхастдзинад ӕмӕ лӕгдзинад ӕвдисгӕйӕ, чи фӕхъуыд, уыдон фӕдыл ӕмбырд ӕрцыдысты зонӕнтӕ – æфсӕддон службӕгӕнӕг кӕм ӕмӕ цы уавӕрты фӕмард, йӕ бинонты уӕнгты тыххæй зонæнтæ ӕмӕ кӕм цард фӕмардуӕвӕг ӕфсӕддон, уый тыххӕй лӕмбынӕг информаци», – банысан кодта Вадим.

Хъахъхъӕнынады министрады бӕрнон минӕвары ныхӕстӕм гӕсгӕ ныртӕккӕ ӕфсӕддон уагдон дарддӕр ӕмбырд кӕны Хуссар Ирыстонӕй сӕрмагонд ӕфсӕддон операцийы хайад чи исы, уыдон фӕдыл информаци. Бӕрӕг куыд у, уымӕ гӕсгӕ уыдонӕй иутӕ хайад исынц Уӕрӕсейы Федерацийы ӕдзухон ӕфсӕддон дӕлхӕйтты, хисӕрмагонд ӕфсӕддон компанитӕ ӕмӕ хъахъхъӕнынадон уагдӕтты, бирӕтӕ та, территориалон ӕууӕлтӕм гӕсгӕ, бархионтӕй архайынц цӕгатирыстойнаг батальонты.

Иумиаг зонæнты бангы ма уыдзӕн, ӕбӕрӕгӕй цы ӕфсӕддон службӕгӕнджытӕ фесӕфт, уыдон тыххӕй ӕххӕст ӕмӕ объективон информаци. Хуссар Ирыстоны Хъахъхъӕнынады министры къухфыстӕй фыстӕджытӕ ӕрвыст ӕрцыд ӕппӕт тыхон структурӕты номыл.

«Ныридӕгӕн уыдонӕй иуӕй-иутӕй райстам бæстон зонæнтæ. Уыцы информаци систематизаци æмæ æмбырд цӕуы ӕмӕ уый фӕстӕ хаст цӕудзæн бӕрӕггӕнӕнты иумиаг бангмӕ», – банысан кодта Сиукъайы фырт.

Йæ ныхӕстӕм гӕсгӕ Цӕгат Ирыстоны дӕр арӕзт цӕуы ахӕм ӕнгӕс организаци, ӕмӕ уый дæр ӕххӕст кӕндзæн ахæм хӕстӕ. Хуссар Ирыстоны ацы ног ӕхсӕнадон организаци ӕмархайд кӕндзӕн ӕнгӕс организацитимæ, кæй зæгъын æй хъæуы, цӕгатирыстойнаг коллегӕтимӕ дæр.

 

Бакӕнгӕ куысты тыххӕй хъусын

кӕндзысты бӕстӕйы сӕргълӕууӕгӕн

Зонӕнтӕ ӕрӕмбырд кӕныны фӕстӕ организацийы куысты фӕстиуджыты тыххӕй фехъусын кӕндзысты бӕстӕйы сӕргълӕууӕгӕн. Уый фӕстӕ организацийӕн ӕвзӕрст ӕрцӕудзӕн къухдариуӕггӕнӕг æмæ бӕстон цӕудзӕн гуманитарон ӕххуыс æмбырд кæнын, уӕзтӕ бынатмӕ фӕхӕццӕ кӕнын, ӕфсӕддон операцийы рӕстӕджы фӕмардуӕвӕг ӕфсӕддон службӕгӕнджытæ ӕмӕ уӕззау цӕфтӕ чи фесты, уыдон бинонтӕн æххуыс кӕныны фарстытӕ.

 

Хъаугъайы зонӕйы не ‘мбӕстӕгтӕ хъуамӕ ӕнкъарой нӕ хъусдард

Ацы ахсджиаг хъуыддагыл Хуссар Ирыстоны Хъахъхъӕнынады министрад уымӕн архайы, ӕмӕ ӕфсӕддон уагдоны къухдариуӕгадӕн ис бастдзинæдтæ сӕ уӕрӕсейаг коллегӕтимӕ ӕмархайд кæнынæн. Уымӕ гӕсгӕ организаци араздзæн ӕппӕтдӕр, цæмæй нӕ республикӕйӕ банысангонд операцийы зонӕйы цы ӕмбӕстӕгтӕ хайад исынц, уыдон ӕнкъарой нæ аудындзинад.

Сиукъаты Вадимы ныхӕстӕм гӕсгӕ ӕфсӕддон операцийы хайадисджытӕн, фыццаджыдӕр, хъæуы моралон-этикон ӕгъдауӕй ӕххуыс кӕнын, цӕмӕй хуссарирыстойнаг ӕфсӕддон службӕгӕнджытӕ Донбассы сӕхи ма ӕнкъарой ӕнӕхъусдардæй, ӕфсӕддон операцийы зонӕйы уæвгæйæ, Райгуырӕн бӕстӕимӕ бастдзинад макуы аскъуыйа.

«Аннӕмӕй та сын хъуамӕ цӕуа материалон-техникон ӕххуыс. Æппынӕдзух семӕ бастдзинад хъуамӕ уа, сӕ домындзинӕдтӕм хъусдард здӕхт цӕуа ӕмӕ сӕ фарсмӕ уӕм нæ фадӕттӕм гӕсгӕ.

Паддзахады сӕргълӕууӕг, министрадтӕ ӕмӕ уагдӕтты минӕвӕрттӕ, хицæн æмбӕстӕгтӕ къорд хӕттыты ацыдысты сӕрмагонд операци уагъд кӕм цӕуы, уыцы бынатмӕ æмæ æмбӕлдысты хӕстонтимӕ, бакодтой-иу сын хъæугæ æххуыс. Æмӕ дарддӕр цӕмӕй ацы хъуыддӕгтӕ оперативонӕй уагъд цӕуой, уый тыххӕй координаци цӕудзӕн ацы архайд», – банысан кодта Вадим.

 

Организаци кӕндзӕн

ӕхсӕнадон куыст

Æхсӕнадон организаци йæ фæндаджы райдианы ис æмæ æххæст кæндзæн, кæй райсой, уыцы уставы домæнтæ, нæ кæндзæн политикон архайд. Организацийы къухдариуӕгады сконды дӕр службӕгӕнджытӕ нӕ уыдзысты, фӕлӕ ӕмбӕстӕгтӕ. Гӕнӕн ис, ӕмӕ йе сконды уой Хъахъхъӕнынады министрады кӕнӕ ӕндӕр тыхон структурӕты ӕмбӕстагон кусджытæ, кӕнӕ Хуссар Ирыстоны хуымӕтӕг ӕмбӕстӕгтӕ, кӕцытӕн ис бастдзинӕдтӕ сӕ коллегӕтӕ ӕмӕ хӕлӕрттимӕ операцийы зонӕйы. Уыдон ахъаз уыдзысты организацийы эффективон куыстӕн.

Организацийы куыстмӕ йӕ хъус дардзӕн ӕмӕ йын ӕмбӕлон ӕххуыс кӕндзӕн Хъахъхъӕнынады министрад. Æфсæддон операцийы зонӕмӕ уӕзтӕ ласын алыхатт ӕнцонвадат нӕу. Фӕлӕ уыцы фарст развӕлгъау нӕ уӕрӕсейаг коллегӕтимӕ ӕмразы куы уа, уӕд æнцондæр ӕмӕ тагъддӕр уыдзӕн уæзтæ бынатмæ фæхæццæ кæнын.

 

Министр йæ хъус дары

организацийы архайдмæ

Сиукъаты Вадим ма куыд банысан кодта, уымӕ гӕсгӕ Хъахъхъӕнынады министр Марат Павловы ‘рдыгӕй организацимӕ ис стыр хъусдард, йӕ хъус дары йӕ архайдмӕ, цӕттӕ у ӕххуыс бакӕнынмӕ, цӕмӕй архайа организаци йӕ нысан ӕмӕ хӕстӕ ӕххӕст ӕрцӕуой.

Йӕ ныхӕстӕм гӕсгӕ организаци регистраци куы ӕрцӕуа ӕмӕ йӕ ӕвӕджиаг хӕстӕ ӕххӕст кӕнынмӕ куы ӕрӕвнала, уӕд йӕ архайд уæрæхдӕрæй ӕвдыст цӕудзӕн информацион фӕрӕзты руаджы. Уымӕй дарддӕр ма РХИ-йы Хъахъхъӕнынады министрады официалон сайтыл байгом уыдзӕн сӕрмагонд рубрикӕ, цыран алы цымыдисгӕнӕг ӕмбӕстагӕн дӕр фадат уыдзӕн лӕмбынӕг информациимӕ зонгӕ кӕнынӕн, уыцы нымӕцы Донбассы территорийыл чи ис, уыдонӕн дӕр.

Банысан кӕнын хъӕуы уый, ӕмӕ ацы организацийы сырӕзт у ахсджиаг ӕмӕ рӕстӕгыл. Сæрмагонд æфсæддон операцийы хæстонтæн æххуыс кæнын ныртæккæ ссис иумæйаг хъуыддаг. Бирæтæ сæ хæсыл нымайынц операцийы зонæйы чи ис, уыдонæн гуманитарон æххуысæй дарддæр хуымæтæджы хъарм хæлар ныхæстæй æххуыс кæнын, фронты уымæн стыр нысаниуæг ис.

КЪÆБУЛТЫ Маринæ