Дарддæр кæны йæ хæрзиуæгон архайд

Сырх Дзуары Дунеон Комитет у хӕдбар организаци ӕмӕ йӕ нысан у, цӕмӕй хъахъхъӕна ӕмӕ ахъаз кӕна, хӕстон конфликттӕ ӕмӕ ӕндӕр бӕллӕхты чи бахауы, уыдон цард ӕмӕ уавӕртӕ хуыздæр кæнынæн. Ацы организаци йӕ архайд дарддӕр кӕны Хуссар Ирыстоны куыд горӕтты, афтӕ хъӕууон районты дӕр ӕмӕ комплексон ӕххуыс кӕны цӕрджыты иууыл тыхстдӕр категорийы ӕмбӕстӕгтӕн.2017 азы июлы мӕйӕ суанг афӕдзы кӕронмӕ дӕр бакодта бӕрӕг куыст. Комитет се ‘нцой лӕууы, 2008 азы ӕмӕ 1989-92-ӕм хӕстон азты ӕбӕрӕгӕй чи фесӕфт, уыдон бинонтӕн. Июлы мӕйӕ декабры мӕйы кӕронмӕ ӕрӕмбырд чындӕуыд 21 контролон биологион хуызӕджы, афтӕ ӕмӕ ивгъуыд азы ӕрӕмбырдгонд хуызӕгтӕ ӕдӕппӕт сты 140. Банысангонд рӕстӕгмӕ организаци дарддӕр ӕмбырд кодта, 1989-92-ӕм азты Комитет дарддӕр ӕмбырд кодта бавдыстытӕ (заявка) фӕдагуырды тыххӕй, ӕбӕрӕгӕй чи фесӕфт, уыдоны бинонтӕй.

Ивгъуыд азы дыккаг ӕмбисы Комитет ӕмархайд кодта ӕртӕ зӕрдылдарӕн мадзӕлтты. Уыдонӕй сӕ иу уыд 30 августы ӕбӕрӕгӕй фесӕфӕг адӕймӕгты Ӕхсӕнадӕмон боны фӕдыл ӕмӕ уагъд ӕрцыд Анахарсисы номыл республикон библиотекӕйы. Мадзалы хайад райстой 50 адӕймаджы бӕрц, уыцы нымӕцы уыдысты Хицауады минӕвӕрттӕ, ӕмбӕстагон ӕхсӕнад ӕмӕ дзыллон информацийы кусджытӕ. Комитеты кусджытӕ ӕмӕ бынӕттон хицауад сентябры мӕйы ӕбӕрӕгӕй фесӕфджыты бинонты иууыл активондӕр адӕймӕгтимӕ сорганизаци кодтой зӕрдылдарӕн мадзал – ӕбӕрӕгӕй фесӕфæг ӕмбӕстӕгты аллеяйы ныссагътой дидинджытӕ ӕмӕ алыгъуызон зайӕгойтӕ. Комитет ма ӕххуыс кӕны ахӕм бинонтӕн, кӕцытӕ бастдзинад фесӕфтой конфликты фӕстиуӕгӕн сӕ хӕстӕджытӕ ӕмӕ хиуӕттимӕ, уымӕ гӕсгӕ сын фадат дӕтты Сырх Дзуары Ныстуан фӕхӕццӕ кӕнынӕн, кӕнӕ та семæ телефонон бастдзинады саразын. Цӕвиттон, бинонты уӕнгтӕн арӕх тынг фӕзын вӕййы хӕстӕджытӕ ӕмӕ хиуӕттимӕ ӕдзухон бастдзинад сӕндидзын кӕнын ӕмӕ се ‘нцой балӕууын. Афтӕ ма ӕххуыс кӕны, бинонты уӕнгтӕ сӕ кӕрӕдзийӕ куы фӕиппӕрд вӕййынц, уӕд уыдонӕн дӕр. Уый фӕстиуӕгӕн банысангонд рӕстӕгмӕ се ‘ввахс адӕймӕгтимӕ сæмбæлдысты 4 адӕймаджы.

Комитеты ӕххуысы фӕрцы куыд гуырдзиӕгтӕ, афтӕ хуссайраг ирӕттӕн дæр сӕ бон баци сӕ ахст адӕймӕгтӕм бацӕуын ӕмӕ сын ӕрвитӕггӕгтӕ барвитын. Бантыст сын, Хуссар Ирыстоны ахӕстоны чи ис, уыдон бинонтӕн дыууӕ фембӕлды, ӕртӕ ӕрвитӕггаджы та лӕвӕрд ӕрцыдысты ахӕстонмӕ. Сырх Дзуары Дунеон Комитеты кусджытæ дыууӕ хатты уыдысты Хуссар Ирыстоны ахӕстоны.

Комитет, куыд ма загътам, афтæмæй ӕдзухон ӕххуыс кӕны цӕрджыты иууыл тыхстдӕр категорийы ӕмбӕстӕгтӕн хӕлцадон ӕмӕ ӕндӕр товартӕй. Цӕвиттон, ахӕм ӕххуыс бакӕнынц бирӕсывӕллонджын бинонтӕн, се ‘фтиӕгтӕ чысыл кӕмӕн сты, стӕй ма иунӕгӕй чи цӕры, ахӕм зӕрӕдтӕн, куыстхъом чи нӕу, фӕлӕ се ‘ввахс адӕмӕй ӕххуыс чи нӕ исы, ахӕм иунӕг ныййарджытӕн. Зӕгъӕм, июлӕй декабры мӕймӕ ахӕм ӕххуыс банкъардтой 148 бинонтӕ ӕмӕ сӕ нымӕц та уыд 400 адӕймаджы. Фараст бинонтӕн та (16 адӕймаджы) бакодтой финансон ӕххуыс бынаты дзул ӕлхӕнынӕн. Уыцы ӕххуысы фӕстиуӕгӕн уыдонӕй алчи дӕр ифтонг ӕрцыд бон ӕртӕ хатты хӕлцӕй, афтӕ ма се нцой балӕууыдысты элементарон гигиенӕйӕ дӕр. Хуссар Ирыстоны 114 ӕвӕрӕз бинонтӕн лӕвӕрд ӕрцыд хъӕрмады тыххӕй суг. Банысангонд рӕстӕджы организацийы минӕвӕрттӕ санитарон базылды тыххӕй цыдысты, бынтон чи базӕронд, ахӕм 13 иунӕгӕй цӕрӕг адӕймӕгтӕм. Уыдонмӕ зылдысты алы бон дӕр Цхинвалы горӕты, къуыри иу хатт та цыдысты Цхинвал, Ленингор ӕмӕ Знауыры районты хъӕутӕм. Уыдонӕй алкӕмӕн дӕр ӕлхӕдтой хӕлцадон продукттӕ, фыццаградон ӕндӕр ӕнӕмӕнгхъӕуӕг товартӕ, зылдысты сын сӕ цӕрӕн бынатмӕ, сыгъдӕг сӕ кодтой, хастой сын дон, ӕххуыс сын кодтой ӕнӕниздзинад хъахъхъӕныны уагдӕттӕм бацӕуынӕн.

Ивгъуыд аз Комитет Ӕнӕниздзинад хъахъхъӕнын ӕмӕ социалон рæзты министрадимӕ иумӕ Хуссар Ирыстоны сорганизаци кодтой тымбыл фынг социалон хъахъхъӕнынад ӕмӕ ифтонгады структурӕты минӕвӕрттимӕ. Мадзалы нысан уыд цӕрджыты социалон хъахъхъӕнынады сферӕйы ивгъуыд азы бакӕнгӕ куыст, кӕрӕдзийы куысты фӕлтӕрддзинадӕй пайда кӕнын, къуылымпытӕ ӕмӕ зындзинӕдтӕ рабӕрӕг кӕнын, фидӕны ӕмгуыстад ӕмӕ цӕрджыты социалон хъӕхъхъӕнынады лӕггӕдты куысты гъӕд фӕхуыздӕр кӕнын. Тымбыл фынджы куысты фӕстиуджытӕм гӕсгӕ Комитет сорганизаци кодта балц Хуссар Ирыстоны Ӕнӕниздзинад хъахъхъӕнын ӕмӕ социалон рӕзты министрадимӕ иумӕ. Уый уагъд ӕрцыд 23-28 сентябры ӕмӕ йӕ хайадисджытӕн фадат уыд сӕ кӕрӕдзийы куысты фӕлтӕрддзинадимӕ базонгӕ уӕвынӕн. Ивгъуыд аз ма 20-21 ноябры йӕ хъӕппӕрисӕй уагъд æрцыд тренинг, хайад дзы райстой Хуссар Ирыстоны Ӕнӕниздзинад хъахъхъӕныны ӕмӕ социалон размӕцыды министрад ӕмӕ социалон хъахъхъӕнынад ӕмӕ ифтонгады структурӕйӕ 15 специалисты. 22 декабры ма Комитетӕн Ӕнӕниздзинад хъӕхъхъӕнынады министрадимӕ иумӕ уыд тымбыл фынг ӕмӕ йӕ хайадисджытӕ æрдзырдтой сæ куысты фӕстиуджытыл цӕрджыты социалон хъахъхъӕнынады фӕдыл, бауынаффӕ кодтой фидӕны ӕмгуыстадыл ӕмӕ 2018 азы цӕрджыты социалон хъахъхъӕнынады сферӕйы архайды тыххӕй.

2017 азы дыккаг ӕрдӕджы 14 адӕймаджы бахатыдысты Комитетмӕ ӕмӕ райстой ортопедион ӕххуыс. Цӕвиттон, авдӕй райстой инвалидон къӕлӕтджынтӕ. Банысангонд рӕстӕгмӕ ацы организаци баххуыс кодта, ӕвӕстиат медицинон лӕггад кӕй хъуыд, уыцы уӕззау рынчынты Цхинвалӕй æндæр медицинон уагдӕттӕм аласыны хъуыддаджы. Комитет ма цӕрджыты иу хайӕн бакодта ӕндӕр ӕмӕ ӕндӕр ӕххуыс дӕр.

Хуыбиаты Никъала