ÆРЛАСТОЙ КАРТОФЫ ТАУИНАГ

Хъæууон хæдзарады министрад ивгъуыд къуыри нæ республикæмæ æрласта хæрзгъæд картофы тауинаг. Уыдон лæвæрд æрцыдысты арендатортæн. Куыд зонæм, афтæмæй картоф иууыл хуыздæр зайы хæххон уавæрты. Уымæ гæсгæ цы 40 тоннæйы картоф æрластой, уымæн йæ 90 проценты радтой Дзауы районæн. Цалынмæ тауинаг нæ баластой Ерцъойы хъæумæ, уæдмæ арендатор бацæттæ кодта йæ зæххы фадыг, уым техникæйы фæрцы тыд æрцыд картоф. Тауинаг кæд лыстæг у, уæддæр у хъæддых. Цалынмæ йæ не ‘рластой, уæдмæ рацыд лабораторион басгæрст. Арендатор куыд загъта, афтæмæй ацы зæххыты картоф хорз зайы, ацы куыст рагæй кæ-нынц. «Нæ фыдæлтæ кæд агрономтæ нæ уыдысты, уæддæр хорз зыдтой картоф æрзайыны сусæгдзинæдтæ. Уыцы иу бынаты йын садзæн ис æр-мæстдæр фондз азы. Уый фæстæ йын йæ бынат фæивын хъæуы. Стыр нысаниуæг ис тауинаджы мыггагæн дæр. Кæд ацы тауинаг хорз тыллæг радта, уæд республикæмæ картоф ласын нал хъæудзæн. Сæ фæлтæрддзинад нæ бавгъау кæндзысты республикæйы иннæ районты арендатортæн дæр», – зæгъы Хъæууон хæдзарады министр Мæргъиты Алан.

Хъæууон хæдзарады министрад дард-дæр дæр архайдзæн, цæмæй нæ республикæмæ æрласа хæрзгъæд нæмыгонты культурæты тауинæгтæ æмæ ма халсæртты тауинæгтæ дæр. Нæмыгон культурæты гъæд дæр фæивинаг кæй у, ууыл рагæй цыд дзырд, арендатортæ цы мæнæу, хор, сысджы байтауынц, уый бынтон гъæдджын нæ вæййы. Уымæ гæсгæ кæд æппæт куыстытæ дæр афоныл бакæнынц, уæддæр тыллæгæрзад мæгуырау вæййы. Зæххытæ смæгуыр сты, зæгъгæ, афтæ чи дзуры, уыдон бынтон раст не сты. Хъæууон хæдзарад райтынг кæныны хъуыддаджы стыр роль æххæст кæны техникæйæ ифтонгад. Уымæй дæр фæрæвдз ис «Ирагросервис». Азы райдианы уыдон райстой техникæйы цыппар иуæгæй фылдæр. Уæрæсейы Федерацийы хъæууон-хæдзарады министрад æмæ РХИ-йы Хъæууон хæдзарады министрады ‘хсæн къухтæ цы бадзырдыл фыст æрцыд, уый руаджы æввахсдæр бонты нæ республикæ ноджы райсдзæнис дзæвгар техникæ. Уыдоныл цы механизатортæ кусдзысты, уыдон ныридæгæн цæттæ цæуынц. Уымæн æмæ комбайнтæ æмæ ма иннæ техникæ дæр цы операцитæ æххæст кæнынц, уыдон сты компьютеризацигонд. Арендатортæ рагæй домдтой, цæмæй сын æлхæд æрцæуа ахæм техникæ, кæцы сын хæххон уавæрты сæ къух араза. Ныр ахæм техникæ дæр фæзынд нæ рес-публикæйы. «Кæд нæ республикæйы Хицауад рагæй архайдта, цæмæй бынæттон мæнæуы иса дзулфыцæн комбинат æмæ уымæй кæна дзул, уæддæр-иу хойраджы гъæд мæгуырау кæй уыд, уый тыххæй дзул гъæдджын нæ уыд. Ныр нæмыгонты мыггаг куы фæива, афоныл хус куы цæуа, уæд йæ реализаци кæнын дæр зындзинæдтæ нал æвзарын кæндзæнис. Нæ климатон уавæртæ фадат дæттынц хæрзгъæд тыллæг æркæнынæн», – зæгъы Хъæууон хæдзарады министр Мæргъиты Алан.

УАЗÆГТЫ Марфа