Хуссар Ирыстоны «Æнæмæлгæ полч»-ы рæнхъыты баххæст кæндзысты Украи-нæйы сæрмагонд æфсæддон операцийы фæмардуæвæг хæстонты хайадисджыты къамтæй. Уый тыххæй фехъусын кодта культурæйы министр Зæгъойты Радæ 9-æм майы бæрæгбон банысан кæныны фæдыл паддзахадон къамисы рабадты рæстæджы.
«Абоны бонмæ махмæ ис информаци Хуссар Ирыстонæй сæрмагонд æфсæддон операцийы 27 фæмардуæвæг хайадисæджы тыххæй. Уыдоны къамтæ «Æнæмæлгæ полч»-ы рæнхъыты рахæсдзысты кадетон скъолайы ахуыргæнинæгтæ», – загъта министр.
Йæ ныхæстæм гæсгæ, Украинæйы сæрмагонд æфсæддон операцийы фæмардуæвæг хайадисджыты къамтæ акцийы хайадисджытæ рахастой ивгъуыд азы дæр.
Акци уыдзæнис Цхинвалы Театралон фæзуаты 9-æм майы æфсæддон парады фæстæ. Ивгъуыд азы «Æнæмæлгæ полч»-ы хайадисджытæ рахастой Стыр Фыдыбæстæйон хæсты фæмардуæвæг ветеранты, афтæ ма Ирыстоны хъахъхъæнджыты, Украинæйы Уæрæсейы спецоперацийы рæстæджы фæмардуæвæг ирон хæстонты 10 мин къамæй фылдæр.