Алчидæр æй зоны, Дзæуджыхъæуы иууыл стырдæр завод “Электроцинк” æхгæд кæй æрцыд. Æгуыстæй баззадысты сæдæгай адæймæгтæ. Уыдонæн сæ иу хай бæстонгонд æрцыдысты – чи нæхи республикæйы, чи та æрвыст æрцыд æндæр регионты стыр куыстуæттæм.
Фæлæ дзы абоны онг дæр æгуыстæй чи баззад, уыдон нырма сты 700 бæрц. Кæмæн дзы сывæллæттæ даринаг ис, чи дзы кредиттæ фиды… Æмæ Цæгат Ирыстоны Сæргълæууæг Битарты Вячеслав йæ лозунг “Нæхиуæтты не ʻппарæм” нæ фæмæнг кодта. Фæсидт республикæйы æппæт куыстуæттæм, амалхъомтæм, цæмæй æгуыстæй чи баззад, уыдонæн сæ куыстуæтты бынæттæ скæной. Стæй канд “Электроцинк”-ы кусджы-тæн нæ, фæлæ куыст чи агуры, уыдонæн се ʻппæтæн дæр. Хъæппæрисджын къордæн разамынд лæвæрдта амалхъом, “Мегадом”-ы генералон директор Хъараты Анзор.
Уый фæдыл 31 июлы, Дзæуджыхъæуы Металлургы галуаны арæзт æрцыд ваканситы стыр армукъа æмæ дзы адæмæй æмызмæлд кодта. Ардæм æрбацыдысты республикæйы дыууадæс районы æппæт куыстуæтты минæвæрттæ, министрадтæ æмæ ведомствоты разамонджытæ, куыс-тагурджытæ… Æдæппæт 500 адæймагæй фылдæр. Залы цы стъолтæ равæрдтой, уыдонæй алкæй фарсмæ дæр уыд куыс-туаты ном: “Бавария”, “Рокос”, “Молоко Осетии”, Видеолайн”, “Электроконтактор”, “Исток”, “Луч”, “Орфей”, “Мясной дар”, “Омега”, “Арс”, “Ирафская швейная фабрика”, “Разряд”, “Да”, “Одежда” “Спортмастер” “Тис” “Кадастр” “Солло” “Грант Сервис” æмæ бирæ æндæртæ. Уыдонимæ – цалдæр арæзтадон компанийы. Уыдонæй алкæй фарсмæ дæр уыд, цы ваканситæ йæм ис, уыдоны номхыгъд. Уыдоны фылдæр уыд кусæг дæсныйæдтæ: электрик, æндадзæг, механик, плотник, механизатор… Куыстагурджытæ æвзæрстой, кæмæн йæ зæрдæмæ цы цыд, уый, æмæ уæд уый фæстæ куыстуæтты минæвæрттæ ныхас кодтой йемæ. Æххуыс сын кодтой Адæмæн куыстдæттыны центры специалисттæ. Кæд уыдонæн бæзгæ кусæг разындаид, уæд ын лæвæрдтой сæрмагонд гæххæтт. Йæ бон уыд æмæ дыккаг бон куыстмæ рахызтаид.
“Республикæйы паддзахадон куыстуæттæ бирæ нал ис, уый тыххæй мах ацы лыггæнинаг фарстамæ раздæхтам бизнесы архайджыты æргом æмæ нæ фарсмæ æрбалæууыдысты. Уый тыххæй сын зæгъын стыр бузныг. Бирæ зындзинæдтæ ис, фæлæ мах адæмы æгуыстæй куы ныууадзæм, уæд раст нæ уыдзæн. Йæхи аккаг куыст чи нæ ссара, уымæн Куыстдæттыны центр дæтты фадат йæ дæсныйад аивынæн. Нæ зæрды ис ноджыдæр ма ахæм армукъатæ саразæм”, – загъта РЦИ – Аланийы Хицауады Сæрдары хæдивæг Икъаты Русланбег.
Армукъайы организаторты бæрæггæнæнтæм гæсгæ, куыстуæтты разамонджытæ уыцы бон цæттæ уыдысты 500 – 600 адæймаджы куыстæй сифтонг кæнынмæ, фæлæ бадзырдтæ цал адæймагимæ бафыстой, уыдон тыххæй бæлвырд бæрæггæнæнтæ нæма ис…
Нæ уацхæссæг
Comments are closed, but trackbacks and pingbacks are open.