Кæстæртыл аудын нæ хæс

Наркомани, экстремизм æмæ æндæр æвзæр фæзындтæй мидхъуыддæгты органтæм хаст чи ’рцыд, уыцы æнахъомты бахизынæн семæ иудадзыг æххæстгонд цæуы профилактикон куыст. Сæрмагонд уагдон «Центр социализации молодежи» зын хъомылгæнæн æнахъомтæн сарæзта профилактикон лагертæ. Уым сын вæййы алыхуызон форумтæ: «В поисках дружбы», «Поколение без наркотиков», «Родители — выше всех» æмæ æндæртæ. Арæх сын вæййы экскурситæ Ирыстоны хæстон намысы бынæттæм, Куырттаты комы историон объекттæм, Суаргомы хъахъхъæнджыты музеймæ, номарæн комплекс «Барбашовы фæз», Хъæбатырты аллейтæм æмæ бирæ æндæр рæттæм.

Специалистты хъуыдымæ гæсгæ, ахæм балцытæн ис стыр хъомыладон æмæ патриотон нысаниуæг.

Республикæйы прокуратурæйы ма стыр куыст цæуы æнахъомты ныхмæ фыдракæндтæ раргом кæнын æмæ сын кæрон сæвæрыныл.

Æмбæлгæ цæстдард кæмæ нæй, уыцы интернет дзыллæты ’хсæнмæ хæссы бирæ цауд хабæрттæ. Фыдракæндтæй æнахъомты бахизыны тыххæй прокуратурæйы скодтой ног куысты пълан: сывæллæтты ныхмæ арæзт фыдракæндтæн бамбæхсыны фадат цæмæй ма уа, уый тыххæй хицауиуæггæнæг адæймæгтæй бæрнондзинад бадомын; тæрхон кæмæн скодтой, ахæм æнахъомты фыдбылызæй бахизыны, куыст сын ссарыны, сæ цард сын раст фæндагыл сæвæрыны тыххæй уæлæмхасæн мадзæлттæ саразын; æнахъомтæ сæхи цæмæй ма марой, уый тыххæй Интернеты хызæг бæрæг кæнын æмæ семæ прафилактикон куыст кæнын.

Цæгат Ирыстоны прокурор Александр Морозовы ныхасмæ гæсгæ, прокурортæ фыдракæндтæй æнахъомты бахизыны æмæ сын сæ бартæ бахъахъæныны фарстатæм æдзух сæ цæст дарынц æмæ сын сæ аххосæгтæ биноныг иртасынц.

Гранттæ — хуыздæртæн

Фæстаг азты стыр æргом здæхт цæуы чысыл бизнесы куыстмæ. Райдайгæ амалхъомтæ цы проекттæ бацæттæ кæнынц, уыдон фылдæр хатт царды уагъд æрцæуынц.

Цæгат Ирыстоны дæр иннæ регионтау дарддæр цæуы Уæрæсейы Президенты номыл грантты конкурс. Ацы азы тæккæ райдианы ахæм конкурсы архайдтой цалдæр æнæкоммерцион организацийы æмæ грантты хицæуттæ систы фондзæй. Сæ иумæйаг аргъ у аст милуан сомы. Уый у стыр æнтыст.

Социалон нысаниуæджы æнæкоммерцион организаци «Заботушка» йæ гранты æхцатæ схардз кæндзæн инвалидты хæдзæртты, сæрмагонд скъолаты, интернаттæ æмæ сидзæрдæтты хихъæппæрисадон къордты куыст æрбаиу кæнын æмæ иумæйаг проект «Шаг к успеху» саразын. Йæ нысан уыдзæн иумæйаг спектаклтæ æмæ концерттæ æвдисын.

Хисæрмагонд социалон — культурон куыстуат «Благодать»-ы проекты нысан у, ног техникæйæ пайда кæнгæйæ, нымæтуæрдджыты æмæ хуыйджыты скъола бакæнын йæхи дукани æмæ музейимæ. Уым ма рекламæйы хуызы æвдисдзысты нымæтимæ алыхуызон инсценировкæтæ ирон фольклорон традициты бындурыл. Ацы куыстуат суыдзæн канд республикæйы цæрджытæн нæ, фæлæ туристтæн дæр уарзон бынат.

Педагогон — психологон ассоциаци бацæттæ кæндзæн сæрмагонд программæ сахъат сывæллæттимæ чи кусы, уыдоны профессион дæсныдзинад фæфылдæр кæныны тыххæй курсытæ саразынæн.

Цæгат Ирыстоны регионалон æхсæнадон организаци «Кавказский позитив» йе ’хцатæ схардз кæндзæн медиаволонтертæ бацæттæ кæныны хъуыддаджы, кæцытæ сты социалон хызæгты активон архайджытæ æмæ сын ис сæхи граждайнаг позици. Сæрмагонд курсытæ сын бакæнгæйæ, уыдон расдзысты ног практикон зонæнтæ æмæ фæлтæрддзинад æмæ фидæны скъуыддзаг кæндзысты ахсджиаг социалон фарстытæ.

Кинематографи æмæ нырыккон аивады автономон æнæкоммерцион организаци «Мост» грант рамбылдта йæ проект «Глыба»-йæн. Йæ нысан у скульптурæйы скъолайы бындурæвæрæг Едзиты Сослæнбегы сфæлдыстадон бынтæ бабæстон кæнын æмæ бахъахъхъæнын.

Comments are closed, but trackbacks and pingbacks are open.