Фидæн аз нæ бæстæйы уагъд цæудзысты Парламентон æв-зæрстытæ. Уыцы политикон цаумæ ныридæгæн сæхи цæттæ кæнынц æппæт политикон партитæ дæр. Уыдон æхсæн ис æхсæнадон змæлд «Адæмы ныфс» дæр. Кæд ацы политикон æхсæнад æхсæнадон æвзæрстыты хайад исын сæйрагыл нæ нымайы, уæддæр сæ зæрды ис активон политикон архайд кæнын.
Нæ уацхæссæг фембæлд æхсæнадон змæлд «Адæмы ныфс»-ы сæргълæууæг Гæджиты Радионимæ æмæ йæм радта иу цалдæр фарсты.
– Радион, зæгъма, кæд сырæзт æхсæнадон змæлд «Адæмы ныфс»?
– Арæзт æрцыдис 2016 азы сентябры мæйы, фæлæ мæм ахæм змæлд саразыны хъуыды та æрцыд раджы. Бирæ рæстæджы дæргъы æргом ницы дзырдтон, фæлæ куыддæр рæстæг æрцыди, зæгъгæ, уый бамбæрстон афтæ райдыдтон архайын йæ саразыныл æмæ арæзт дæр æрцыдис.
– Зæгъ-ма цæмæн дæ бафæндыд змæлд «Адæмы ныфс» саразын? Йæ саразыныл æрмæст дæхæдæг архайдтай, æви ма дын æххуысгæнджытæ дæр уыд?
– Ахæм змæлд саразын мæ сæйраджыдæр бафæндыд уымæн, æмæ уæд нæ республикæйы цы бирæ змæлдтытæ æмæ партитæ фæзынд уыдонæн адæммæ мæгуырау ахаст кæй уыд. Афтæ уымæн зæгъын æмæ уыдонæй иутæ уæд архайдтой æрмæстдæр сæхи пайдайæн. Сæхи-иу равдыстой æрмæстдæр æвзæрстыты размæ æмæ-иу куыд æнæнхъæлæлæджы фæзындысты, афтæ æнæнхъæлæджы фæтары сты.
Змæлд куы арæзтон, уæд мын хорз баххуыс кодтой Бестауты Æхсар, Цхуырбаты Инал æмæ æндæртæ. Нæ съездмæ æрбацыд бирæ зындгонд адæймæгтæ. Ахуыргонд Гаглойты Юри та нын равзæрста ном.
– Ныртæккæ цал сты «Адæмон змæлд»-ы уæнгтæ?
– Абон не змæлды номхыгъды ис 300 уæнджы бæрц. Сæ фылдæр хай сты æвзæнгтæ. Кæд дзы чидæртæ ацæуы, уæддæр нæм рæстæгæй рæстæгмæ цæугæ дæр æрбакæнынц. Чи нæм æрбацæуы, уыдонæн вæййы сæхи фæндон. Æхсызгон ма у уый дæр, æмæ нæ партийы уæнгтæ се ‘ппæт дæр кæй сты Ирыстоныл, ирон адæмыл æнувыд æмбæстæгтæ.
– Бæстондæр ма нын радзур «Адæмы ныфс»-ы уæнгты тыххæй?
– Сæ фылдæр сты, Ирыстон уæззау уа-вæры куы уыд, знагæй йæ бахъахъхъæнын куы хъуыд уæд, уыцы бонты йæ къухмæ хæцæнгарз чи райста, ахæмтæ. Се ‘хсæн ис бæрнон кусджытæ, ахуыргæндтæ, студенттæ, хуымæтæг æмбæстæгтæ. Уыдон иуылдæр иу кæны, кæй сæ фæнды ныфс уой сæ адæмæн, сæ Ирыстонæн.
– Цахæм хæстæ æвæры уæ парти йæ разы?
– Комкоммæ уын зæгъдзынæн, нæ разы не ‘вæрæм ахæм хæс, цæмæй хайад исæм алыгъуызон æвзæрстыты. Нæ сæйрагдæр хæс у, цæмæй цыфæнды хъуыддаджы дæр уæм нæ адæмы фарсмæ, æххуыс сын кæнæм, æххуыс сæ кæм хъæуы, уым. Уымæй дарддæр, абон ахсджиаг у, цæмæй нæ адæмы ‘хсæн уа кæрæдзиæмбарынад, иудзинад æмæ ацы фарстытыл дæр кусæм.
– Уе змæлды сырæзтыл сæххæст дыууæ азы. Уæ къухы цавæр æнтыстытæ бафтыд?
– Абон исты стыр æнтыстыты кой ракæнон, уымæн раджы у нырма, фæлæ стыр хъуыддæгтæн арæзт æрцыдис бындур. Æмæ æххæст дæр цæуынц. Цæвиттон, 1989 азы ноябры мæйы бирæнымæц гуырдзиаг фыдгæнджытæ Цхинвалмæ æрбацæуын куы сфæнд кодтой, уæд, сæ разы, сæ къухтыл хæцгæйæ чи слæууыд, горæтмæ кæй фæрцы не ‘рбаирвæзтысты, уыдон нæмттæ хъæуы бæрæг кæнын. Уыцы фарст та нæ æндавы уымæн, æмæ абон уыцы хъæбатыр архайды бирæтæ ныфыстой сæхиуыл. Кæд уыдысты 15 адæймаджы бæрц, уæд абон уыцы нымæц хизы цалдæр хатты фылдæрмæ.
– Уе змæлдæн йæ фидæн цавæрæй уынут?
– Æнæгуырысхойæ мæ бон зæгъын у æмæ нын кæй уыдзæнис хорз сомбон. Уымæн æмæ не змæлды уæнгтæ сæ разы æвæрынц хæс, цæмæй æххуыс кæнæм тыхст адæмæн, ахъаз сын уæм сæ рæстаг домæнтæ аскъуыддзаг кæнынæн. Уымæй дарддæр ма нæ фæнды, цæмæй адæм банкъарой уыцы хæстæ исты стыр бынæттæ бацахсыны сæраппонд кæй не ‘ххæст кæнæм, фæлæ нæ адæмы тæхудиаджы царды тыххæй.
– Абон уæ уæнгтæ сты 300 бæрц. Радзур ма, чи сты, цы æмбарындзинад ис се ‘хсæн?
– Нæ уæнгты ‘хсæн кæд фылдæр ис нæлгоймæгтæ, уæддæр нæм дзæвгар ис сылгоймæгтæ дæр. Се ‘хсæн ис ацæргæтæ æмæ æвзæнгтæ, ахуыргæндтæ, фысджытæ, хуымæтæг адæймæгтæ, студенттæ. Сæ кæрæдзиимæ сын ис хорз æмбарындзинад. Уый фæбæрæг вæййы нæ фембæлдтыты рæстæджы.
– Æндæр партитæ æмæ змæлдтытимæ та уын цы ахастытæ ис?
– Документалон æгъдауæй ницы, фæлæ нын фембæлдтытæ вæййы арæх, уæлдайдæр та «Иууон Ирыстон»-ы уæнгтимæ. Фæныхас кæнæм ахсджиаг фарстатыл. Кæмдæрты нæ фембарæм кæрæдзи дæр, фæлæ фæстагмæ æрцæуæм иу хъуыдымæ.
– Фидæн азы майы уыдзысты Хуссар Ирыстоны Парламентмæ æвзæрстытæ. Уæ парти сæм иæхи куыд цæттæ кæны, дæ хъуыдымæ гæсгæ, хуыздæр æнтыстытæ кæцы партийæн уыдзæнис?
– Кæд æвзæрстытæм ис нырма дзæвгар рæстæг, уæддæр ныридæгæн кусæм нæ архайды план аразыныл. Уымæй дарддæр фембæлдтытæ ауадзæм, нæ хъуыдыты фарс цы партитæ ис, уыдон уæнгтимæ. Алы хатт дæр ахæм фембæлдтытæй баззайæм райгондæй. Хуыздæр æнтыстытæ кæцы партийæн уыдзæнис, зæгъгæ, уый тыххæй та банысан кæндзынæн уый, æмæ уæлахиздзинад йæ къухты кæй бафтдзæнис «Иууон Ирыстон»-æн. Уымæн æмæ абон уыдон хуызæн адæмæн иунæг парти дæр нæ лæггад кæны.
Гæззаты Иван
Comments are closed, but trackbacks and pingbacks are open.