ПАДДЗАХАДОН ТЫРЫСА ÆМÆ РЕСПУБЛИКÆЙЫ БОН БАНЫСАН КОДТОЙ ДЗАУЫ ДÆР

  Республикæ Хуссар Ирыстоныл 31 азы сæххæсты боны цытæн нæ республикæйы алы къуымты дæр уагъд цыдысты алыгъуызон бæрæгбонон мадзæлттæ.

19-æм сентябры нысан цыдис Паддзахадон тырысайы бон æмæ уый сæраппонд, куыд æрвылхатт, афтæ та ныр дæр дыууæ бæрæгбоны цытæн мадзæлттæ бацæттæ кодтой Дзауы районы къухдариуæгад дæр. Районы бæрæгбонон мадзæлттæ райдыдтой 19-æм сентябры Паддзахадон тырысайы бонæй, кæцы нæ бæстæйы нысан цæуы 2013-æм азæй фæстæмæ.

Традицимæ гæсгæ ма ацы бон Хетæгкаты Къостайы номыл Дзауы астæуккаг скъолайы 6-æм къласы ахуыргæнинæгты цытджын æгъдауæй айстой ногдзауты рæнхъытæм. Ногдзаутæ Республикæ Хуссар Ирыстоны гимны зæлтæм схæцыдысты ирон тырысайыл æмæ сæ хъуыртыл бабастой урс, сырх æмæ бур хуызтимæ галстуктæ. Скъоладзау фæсивæдæн сæ ахуыргæнджытæ Дзауы сæрмæ æрдзы хъæбысы фæйлаугæ тырысайы бын радзырдтой Паддзахадон тырысайы бæрæгбон, йæ нысаниуæг æмæ историйы тыххæй. Уыдон ма аив бакастысты æмдзæвгæтæ æмæ зæрдылдарынæн систой сæ къамтæ дæр.

Республикæ Хуссар Ирыстоны Паддзахадон тырыса бæрзонд сисыны цытджын церемони уагъд æрцыдис Дзауы райцентры Кады аллеяйы, кæцы уыд бæрæгбонвæлыст. Уырдæм æрбацыдысты районы администрацийы кусджытæ Джиоты Андрейы сæргълæудæй æмæ районы цæрджытæ. Цытджын мадзал бацæуæн ныхасæй байгом кодта мадзаламонæг,  Цалдæр Советы фыццаг æрсидты депутат Тыбылты Тотыр. Уый адæмы зæрдыл æрлæууын кодта нæ тырысайы бæрæгбоны равзæрды истори æмæ йæ хуызты нысаниуæджы тыххæй. Ирыстоны хъæбултæ сæрыстыр кæмæй сты, уыцы Паддзахадон тырысайыл Хуссар Ирыстоны гимны зæлтæм бæрзонд схæцыдис милицийы кусæг Зассеты Олег. Ацы ахсджиаг бæрæгбоны цытæн районы æппæт цæрджытæн æмæ æгас республикæйæн зæрдиаг арфæ ракодта Дзауы районы администрацийы сæргълæууæг Джиоты Андрей. Уый сæрмагондæй банысан кодта Паддзахадон тырысайы бæрæгбоны егъау æмæ ахсджиаг нысаниуæг. «Ацы бон у нæ республикæйы алы цæрæджы бæрæгбон дæр. Ацы тырысайы бын Фыдыбæстæ хъахъхъæнджытæ хъахъхъæдтой сæ Райгуырæн бæстæ. Ацы тырысаимæ райстам нæ хæдбардзинад дæр. Абон мах нæ тырысайыл бæрзонд кæй схæцыдыстæм, уый нысан кæны афтæ æмæ йын мах стыр аргъ æмæ кад кæй кæнæм. Махæн уæлдай æхсызгон вæййы дунейы алы къуымты дæр нæ фæсивæд, не спортсментæ бæрзонд куы сисынц ирон тырыса æмæ йæ дунейæн куы базонын кæнынц, уымæй. Уый стыр кады хъуыддаг у æмæ хуымæтæджы нæ нысан кæнæм ацы бæрæгбон дæр. Нæ тырыса йæ райсынæй фæстæмæ ссис бæстæйы суверенитеты символ æмæ ацы бæрæгбон нысан кæнгæйæ, хъуамæ хъуыды кæнæм нæ историйыл æмæ нæ райгуырæн зæххыл. Но-джыдæр уын арфæ кæнын абоны, 20-æм æмæ 21-æм сентябры бæрæгбонты цытæн. Мады Майрæмæй фæдзæхст ут кæддæриддæр!», – загъта Джиоты Андрей. Цытджын мадзал адарддæр кодтой Дзауы районы Хуыцъейы хъæуы культурæйы хайады вокалон къорд «Нартæ» æмæ эстрадон къорд «Амонд».

20-æм сентябры Республикæ Хуссар Ирыстоныл 31 азы сæххæсты боны цытæн ма Дзауы районы уагъд æрцыдис бæрæгбонон концерт дæр. Бæрæгбонон концерт арфæйы ныхасæй байгом кодта районы администрацийы культурæйы хайады гæс Цхуырбаты Галинæ. Уый цыбыртæй æрдзырдта 20-æм сентябры бæрæгбоны тыххæй æмæ фæсивæдмæ æрсидт, цæмæй кæддæриддæр кад æмæ аргъ кæной сæ райгуырæн Ирыстонæн. «Мах рацыдыстæм уæззау фæндагыл æмæ иууылдæр æвдисæнтæ стæм, Гуырдзыстоны хицауад нæ адæмæн цы геноцид сарæзта, уымæн. Гуырдзиаг агрессорты фæндыд, цæмæй ирон адæмы скуынæг кодтаиккой, нæ фыдæлты зæххæй нæ фæсурой. Фæлæ, табу Хуыцауæн, Уæрæсейы Федерацийы æххуысæй мах слæууыдыстæм нæ къахыл æмæ аразæм нæ республикæ. Стыр бузныджы ныхæстæ кæддæриддæр хъæуы зæгъын Стыр Уæрæсейæн сæ иузæрдион æххуысы тыххæй. Абон мах цы бæрæгбон нысан кæнæм, уый нын æцæг бæрæгбон у æмæ ноджыдæр арфæйаг ут, мæ зæрдæ уын зæгъы фидар æнæниздзинад æмæ фæрныгад», банысан кодта Цхуырбиан. Уый фæстæ сценæйыл сæ арæхстдзинад æвдыстой районы сфæлдыстадон коллективтæ æмæ эстрадон зарæггæнджытæ. Уыдон нымæцы Дзауæй рацæугæ популярон зарæггæнæг Тыбылты Леонид, кæцы сæххæст кодта адæмæн уарзон чи сты йæ уыцы зарджытæ «Хъæбатыр Цæргæс», «Фæззæг» æмæ æндæртæ. Концерты ма адæмы зæрдæтæ бахъæлдзæг кодтой зарæггæнджытæ Санахъоты Алан, Къæбысты Маир, Багаты Шота æмæ æндæртæ. Концертмæ æрбацæуджытæ сæ циндзинад æвдыстой дæргъвæтин æмдзæгъдæй. Уый фæстæ райдыдта бæрæгбонон фейерверк.

ЦХУЫРБАТЫ Ларисæ