Юстицийы министр Гаглойты Олег пресс-конференцийы куыд фехъусын кодта, афтæмæй абоны бонмæ Хуссар Ирыстоны регистраци æрцыдысты аст политикон партийы, уыдон нымæцы ис ног срегистрацигонд парти «За справедливость».
«Ивгъуыд азы нæм сырæзтис авд политикон партийы æмæ аст организацион комитеты, фæлæ съездтæ ауагътой æрмæстдæр æхсæз организацион комитеты. Ныртæккæ уыдон юстицийы министрадмæ балæвæрдтой æмбæлон документтæ æмæ сыл куыст цæуы. Æртæ срегистрацигонд политикон партийæ парти «За справедливость» æнæхъæнæй рацыд паддзахадон регистраци. Ныртæккæ æркаст цæуы ноджы дыууæ политикон парти «Ирыстоны ног фæлтæр» æмæ «Ирон»-ы фарстамæ», – банысан кодта министр Гаглойты Олег.
Йæ ныхæстæм гæсгæ ма ноджы æртæ политикон партийы: «Справедливая Осетия», «Иры фарн» æмæ «Партия развития» цæуынц фыццаг басгæрст. «Мах алы хатт дæр архайæм закъонмæ гæсгæ. Ныридæгæн æркаст цæуы æппæт документтæм дæр. Хъыгагæн, партитæ фæстиат кæнынц регистрацийы процесс. Министрадмæ сæ документтæ æрбахастой апрелы æмæ майы мæйы райдианы æмæ ныр тагъд кæнынц, цæмæй рæстæгыл райсой паддзахадон регистрици. Срегистрацигонд партитæ ныртæккæ сты аст: «Ныхас», «Адæмон парти», «Адæмы иудзинад», «Республикæ Хуссар Ирыстоны Коммунистон парти», «Иугонд Ирыстон», «Фыдыбæстæ», «Иудзинад», «Рæстдзинады тыххæй», уыдонæн се ‘ппæтæн дæр бар ис 2024 азы парламентон æвзæрстыты хайад райсынæн», – загъта Гаглойты Олег.
Хуссар Ирыстоны Юстицийы министр Гаглойты Олег радзырдта юстицийы ми-нистрты гом æмбырд «Международное взаимодействие министерств юстиции: новые форматы и горизонты»-йы йæ хайадисты тыххæй. Æмбырд уагъд цыд Петербурджы ХI-æм æхсæнадæмон юридикон форумы фæлгæтты. Хуссар Ирыстоны делегацийы сконды уыдысты æхсæз адæймаджы. «Форумы уынаффæ цыдис ахсджиаг фарстатыл. Уæрæсейы Федерацийы тæрхондоны приставты Федералон службæйы къухдариуæггæнæгимæ мах бадзырдтам æввахс рæстæджы «О сотрудничестве и взаимопомощи»-йы меморандумыл къухтæ æрфыссыны тыххæй. Ацы службæйы къухдариуæггæнæг иннæ мæйы фæнд кæны нæ республикæмæ æрцæуын æмæ уæд лæмбынæгдæр æрдзурдзыстæм, форумы цы фарстатыл дзырд цыдис, уыдоныл», – банысан кодта министр.
Министрты æмбырды дзырд цыдис бæстæты æхсæн документты банымадыл. Нæ республикæйæн уый у ахсджиаг фарст. Дзырд цæуы нæ паддзахадон органтæ цы документтæ дæттынц, уыдоныл. Ацы фарстайы фæдыл нæм бирæ адæм æрбацæуынц. Уæрæсейы арæх æрдомынц документты уæлæмхас легализаци æмæ ам дæр дзырд ууыл цæуы, цæмæй нын нæ документтæ исой æнæ легализацийæ. Документты банымады тыххæй уæрæсейаг коллегæтимæ дзырд рагæй цæуы. Мах фæнд кæнæм сразыдзинадыл къухтæ æрфыссын, кæнæ архайæг сразыдзинæдты фæлгæтты ссардзыстæм ацы фарст аскъуыддзаг кæныны механизм», – загъта министр.
Пресс-конференцийы рæстæджы юстицийы министр фехъусын кодта, зæгъгæ, амнисти расидыны тыххæй Хуссар Ирыстоны парламенты уынаффæ, развæлгъау бæрæггæнæнтæм гæсгæ, хауы фондз адæймагмæ. Йæ ныхæстæм гæсгæ æртæ адæймаджы сæрибар æрцæудзысты, дыууæйæн та цалдæр мæйы фæкъаддæр уыдзысты ахæстоны фæбадыны æмгъуыд. «Амнистийы фæдыл парламенты уынаффæ махмæ æрвыст æрцыд цалдæр боны размæ æмæ ныридæгæн иртæст цæуы», – загъта кæронбæттæны Гаглойты Олег.
КОКАЙТЫ Зæринæ
