Сæрдыгон Олимпион хъæзтытæ райдыдтой Советон Цæдисы сæйраг горæт Мæскуыйы 1980 азы 19 июлы æмæ фесты 3 августы. Ацы Олимпиадæ историйы баззад, куыд Скæсæн Европæйы территорийыл фыццаг, стæй ма фыццаг хатт уагъд цыдис социалистон бæстæйы. Олимпиадæйы ерысты иу хай уагъд цыдысты Советон Цæдисы æндæр горæтты дæр. Номхуындæй Таллины старт систа спорты иу хуыз, футболæй турниры развæлгъау æмæ иу цыппæрæм хайы хъæзтытæ та уыдысты Киев, Ленинград æмæ Минскы, æхсæнгарзæй æхсыны ерыстæй та спортсментæ сæ тыхтæ фæлвæрдтой «Динамо»-йы æхсæн бынаты.
1975-80-æм азты Мæскуыйы Олимпион хъæзтытæм бацæттæ кæныны фæлгæтты, Ленинград, Киев, Минск æмæ Таллины арæзт æмæ реконструкци æрцыдысты Олимпиадæ ауадзыны тыххæй 20 спортивон объекты. Уыдон ‘хсæн рахицæн хъæуы Сабырады проспекты спортивон комплекс «Олимпион», В.И. Ленины номыл централон стадион (ныртæккæ у «Лужникты» стадион), телецентр «Останкино», аэропорт Шереметьево-2, Кировы номыл стадион горæт Ленинграды, Киевы республикон стадион, Минскы «Динамо»-йы стадион, Таллины телемæсыг, парусон спорты Олимпион центр Таллины.
Олимпиадæйы спортсментæ сæ тыхтæ фæлвæрдтой спорты ахæм хуызтæй, куыд баскетбол, бокс, хъæбысхæст, велоспорт, волейбол, къухы пурти, дзюдо, бæхты спорт, рог атлетикæ, ленк кæнын, спортивон гимнастикæ, уæззау атлетикæ, футбол æмæ æндæртæ – æдæппæт 23 хуызы. Мæскуыйы Сæрдыгон Олимпиадæйы æдæппæт хайад райстой 80 бæстæйы спортсментæ, æмбулгæ та ракодтой хорзæхты 203 комплекты. Ацы Олимпиадæйы иттæг хорз фæстиуджытæ равдыстой Советон Цæдисы спортсментæ æмæ иууыл иумæ рамбылдтой 195 майданы, уыцы нымæцы 80 сыгъзæрины, 69 æвзист æмæ 46 та бронзæ майдантæ. Дыккаг бынатмæ рахызт Германы Демократон Республикæ, уыдонæн та сæ майданты нымæц æдæппæт уыд 126 æмæ 41 майданимæ æртыккаг призон бынат бацахста Болгарийы командæ. Ерысты иу бронзæ майдан рам-былдта Ливаны командæ æмæ баззад фæстаг бынаты.
Æрмæг бацæттæ кодта
ХУЫБИАТЫ Никъала
Comments are closed, but trackbacks and pingbacks are open.