Ӕвӕццӕгӕн, адӕймагады истори нӕма зоны, Беслӕны цы ӕвирхъау теракт ӕрцыд, ахӕм.
Цардбӕллон кӕстӕртӕ уыцы райсом тындзыдтой сӕ уарзон скъоламӕ. Мӕнӕ нырма сӕ ныййарджытимӕ ӕфсӕрмытӕгӕнгӕ фӕцӕуынц, ацы аз скъолайы къӕсӕрӕй фыццаг хатт йӕ къах чи бавӕрдзӕн, уыцы цардбӕллон фыццагкъласонтӕ. Уыдон ацы бон фыццаг хатт райстой сӕ хызынтӕ дзаг чингуытимӕ, фыццаг хатт азӕлдзӕн сӕ хъусты ахуырмӕ сидӕг фыццаг дзӕнгӕрӕг. Иннӕ ахӕм, се ‘нувыд хъомылгӕнджытӕ, ахуыр-хъомыладон куыст кӕимӕ кӕнынц, уыцы ахуыргӕнинӕгтӕм бакӕсын уыд. Уыдонӕн скъола рагӕй сси уарзон ӕмӕ та йӕм мӕнӕ ныр дӕр цинзӕрдӕйӕ ӕмӕ рухс сомбофны хорз ӕмӕ бӕллиццаг фӕндтыл хъуыдыгӕнгӕйӕ, ӕрбахызтысты сӕ уарзон хъомылады артдзӕстмӕ. Сӕ зӕр-дӕйы цин не ‘мбӕхсынц ӕмӕ адджын ӕмӕ зӕрдиаг ныхӕстӕн нал ис кӕрон дӕр.
Ахуыргӕнӕг. Уымӕн зынаргъ у скъолайы алы къуым, алы бынат дӕр. Афтӕ куынӕ уаид, уӕд ахуыргӕнӕг-хъомылгӕнӕджы професси нӕ равзӕрстаид йӕ сомбонӕн. Уарзы сывӕллӕтты, нӕ сомбоны цардаразджыты ӕмӕ сӕ хайджын кӕны зонындзинӕдтӕй. Зын у ахуыргӕнӕджы дӕсныйад, ӕдзух фыдӕбон хъуамӕ кӕнай, кӕстӕр фӕлтӕримӕ ӕдзухдӕр кусын хъӕуы. Фӕлӕ уый уыдӕттӕ мурмӕ дӕр нӕ дары, хур ыл ноджы тынгдӕр ракӕсы, йӕ ахуырдзауты раз куы ӕрлӕууы ӕмӕ сӕ йӕ хъарм ныхасӕй куы схотыхджын кӕны, уӕд. Стыр хъыгагӕн, сӕ иутӕн дӕр ӕмӕ иннӕтӕн дӕр сӕ рухс фӕндтӕ ӕмӕ бӕллицтӕ ӕрдӕгыл фескъуыдысты, кӕронмӕ сӕххӕст кӕнын сын сӕ нал бауагъта ӕгъатыр знаг.
Адӕймаг дын ницы кӕны, тых дӕм нӕ хӕссы, афтӕмӕй йӕм лӕбур ӕмӕ йӕ фыдӕбонӕй мар. Тӕвды сулӕфӕнтӕ нӕ уыд ӕмӕ уыйӕппӕт адӕмы иу ран ӕртӕ суткӕйы дар. Террористтӕн сӕ уӕнгты адӕймаджы зӕрдӕ нӕ тӕлфыд, ӕндӕра сӕм куынӕ хъардта ахст адӕмы утӕхсӕн, бынтондӕр сын куынӕ тӕригъӕд кодтой. Уый æнахуыр ӕгъатырдзинад уыд, ӕвӕццӕгӕн, хъӕддаг сырд дӕр афтӕ нӕ бакодтаид. 334 адӕймаджы арвыста фыдызнаг мӕлӕты къӕсӕрмӕ, уал цӕрынхъуагыл нал ракаст хур, нал сӕ батавта йӕ хъарм тынтӕй. 15 азы рацыд уӕды ӕвирхъау рӕстӕгӕй, фӕлӕ уыдоны тӕригъӕдӕй нӕ сур кӕнынц цӕссыгтӕ, нӕ рох кӕнынц зӕрдӕйӕ.
Хуыбиаты Никъала
Comments are closed, but trackbacks and pingbacks are open.