Рӕстӕг цӕуы, фӕлӕ нӕ адӕмӕй никуы ферох уыдзысты, гуырдзиаг лӕгмартӕ Хуссар Ирыстоны сабыруарзаг адӕмӕн цы хъизӕмӕрттӕ бавзарын кодтой, уыдон. Зын вӕййы адӕймагӕн уыцы бонтӕ ӕрӕмысын, уыдоныл цӕст ахӕссын, уымӕн ӕмӕ уыцы фыдбойнаг рӕстӕг нӕ адӕмӕн сты уæззау мысинӕгтӕ, зӕрдӕ кӕмӕй ныккӕрзы, ахӕм цаутӕ. Тъбеттаг хӕрзӕгъдау нӕлгоймаг Икъоты Никъалайы ӕдзухдӕр аивад ӕлвасы йӕхимӕ, дзӕвгар куыстытӕ бакодта нывкӕнынады аивады ӕмӕ уый тыххӕй буц у йӕхицӕй, йӕ радтӕг уарзон къуымӕн кӕй лӕггад кӕны. Уыимӕ ма Цхинвалы Тугъанты Махарбеджы номыл нывгӕнӕн ахуыргӕнӕндоны хъомыл кӕны сомбонӕн ӕвзонг курдиӕттӕ ӕмӕ ахӕм курдиатджын адӕймаг ныфсджынӕй каст размӕ, нӕ адӕмы рухс сомбоныл ӕууӕндгӕйӕ. Фӕлӕ алы хатт адӕймаджы фӕндтӕ зӕрдӕйы фӕндиаг кӕм ацӕуынц. Гуырдзы сусӕгӕргомӕй нӕ ныхмӕ хӕст куы расидтысты, ӕдзух нӕм куы бырстой, уӕд Икъойы фырт дӕр ӕрлӕууыд нӕ сагсур лӕппуты фарсмӕ ӕмӕ хъахъхъӕдта нӕ адӕмы фыдгултӕй. Хӕст уӕлдай тынгдӕр скарз 2008-ӕм азы августы мӕйы ӕмӕ дзы Никъала бирӕ ӕвирхъау цаутӕн уыд ӕвдисӕн.
Иу бон гуырдзиӕгты вертолет ӕрбадт Къостайыхъӕумæ хӕстӕг ӕмӕ дзы ӕргӕппытӕ кодтой 40 адӕймагмӕ ӕввахс. Уыцы рӕстӕджы Никъала ӕмӕ Хуыбиаты Зауыр хъахъхъӕдтой нӕ арӕнтӕ. Зауыр сӕ куы ауыдта, уӕд йӕ хъавд уыд, цӕмӕй дзы искӕйты фехстаид, фӕлӕ йӕ Икъойы фырт бакъуылымпы кодта. Уӕд ӕнӕмӕнг ӕрбафсӕрстаиккой Тъбеты хъӕумӕ ӕмӕ тынг разиан кодтаиккой цӕрджытӕн. Уыд ахӕм цаутӕ ӕмӕ-иу ӕхсӕвыгон радардтой прожектортӕ ӕмӕ мӕйдар ӕхсӕв дӕр зынд боны хуызӕн. Иутӕ ӕнхъӕл уыдысты, зӕгъгӕ, нӕм ӕххуысмӕ фӕзындысты Уӕрӕсейы ӕфсӕдтӕ, фӕлӕ афтæ нæ уыд. 7 августы куы ӕризӕр, уӕд сӕм бауад сыхӕгты сылгоймаг, иунӕгӕй нӕ уӕндын, зæгъгæ, ӕмӕ йын ӕмбалӕн акодта йе мкъайы. Уӕдмӕ телеуынынады Гуырдзыстоны президент М. Саакъашвили ӕрсидт ирон адӕммӕ, бирӕ сӕ кӕй уарзы ӕмӕ сӕ ныхмӕ хӕст кӕй нӕ расиддзӕн, уымӕ гӕсгӕ ут ӕвӕлмӕцгӕ, зӕгъгӕ. Фӕлӕ уыдон уыдысты мӕнг ныхӕстӕ – уый фӕстӕ ӕнахуыр гуыппытӕ, тыхджын ӕхстытӕ сытынг сты.
Икъойы фырт фӕндаггӕрон цӕры ӕмӕ хорз хъуыста, тыхст адӕм сӕ рӕзты машинӕтыл куыд цыдысты ӕдасдӕр бынæттæм, уый. Фӕлӕ бирӕтӕн уый рӕствӕндаг нӕ уыд, знӕгтӕ сӕ размӕ бабадтысты ӕмӕ сӕ милмӕ систой. Сӕ тӕккӕ цур амардтой, лигъдӕтты чи фӕцӕй ласта, уыцы цардбӕллон ӕвзонг лӕппу Тадтаты Серги ӕмӕ машинӕйы чи уыд, уыцы иннӕ бӕлццӕтты дӕр. Адон дӕр сӕ фенхъӕлдтой Уӕрӕсейы ӕфсӕддонтӕ ӕмӕ сӕ размӕ рахызтысты, знаг та сын тӕригъӕд нӕ фӕкодта ӕмӕ сӕ уыцы бынаты ӕвирхъау мард акодтой. Сылгоймагӕн йе ‘фсӕр афаст ӕмӕ мӕ зӕрдӕ ныккӕрзыдта, афтӕмӕй йӕ куы федтон, уӕд, – зӕгъы Икъойы фырт. – Иу рӕстӕджы уынгӕй цъӕхаст, хъӕлӕба хъуысы, мӕ хъус адардтон уыцы бынатмӕ ӕмӕ уӕртӕ цалдӕр сылгоймаджы тарстгъуызӕй домынц ӕххуыс, сӕхи кӕм бааууон кӕной, ууыл уыд сӕ хъуырдухӕн. Фӕстӕдӕр ма сӕм ноджыдӕр ӕрбаиу цалдӕр сылгоймаджы. Дыгъуызты Димитрты хӕдзары ныккӕндмӕ сӕ бакодта ӕмӕ уым бамбӕхс-тысты. Хъуыддаг та уыд афтӕ: цы машинӕйыл бадтысты, уый цӕуылдӕр йӕхи скъуырдта ӕмӕ ӕвиппайд фӕфӕлдӕхт, дуар фегом ӕмӕ сылгоймӕгтӕ уырдыгӕй рахаудысты. «Икъойы фырт ма бафиппайдта уый дӕр, ӕмӕ-иу куыддӕр уынгмӕ адӕймаг рахызт, афтӕ та-иу ӕхстытӕн нал уыд кӕрон, нӕ зонын, кӕцӕй нӕм сӕ хъус дардтой. Ӕхсӕвы уӕддӕр рацыд, Гулитӕ кӕм цардысты, уырдӕм ӕмӕ йӕ хъустыл хъӕлӕба ауад, ӕввахсдӕр сӕм бацыд, фӕлӕ йӕ уыдон нӕ федтой. Байхъуыста сӕм ӕмӕ базыдта, уыдон гуырдзиӕгтӕ кӕй уыдысты ӕмӕ фӕстӕмӕ удаистӕй лидзын райдыдта. Фӕлӕ та мӕнӕ иу нӕлгоймаг ӕрцӕуы, уый уыд йӕ хъӕуккаг Гаглойты Илойы ӕмкъайы фыд. Уымӕн фӕзиан йе мкъай ӕмӕ цыдис Никъалайы ӕфсымӕр Руслантӕм, цӕмӕй йӕм фӕкастаиккой йе мкъайы бавӕрынмӕ. Фӕстӕмӕ рацӕугӕйӕ йыл амбӕлд Гулиты Ӕхсар, кӕсынц ӕмӕ хъӕуы астӕу ӕваст тынг бирӕ адӕм ӕмӕ машинӕтӕ. Сӕ хъӕр-хъӕлӕба дардмӕ хъуыст, уымӕн дӕр ницы уыд, фӕлӕ сӕ хотыхтӕ ӕвӕццӕгӕн схӕцыдысты ӕмӕ уыдон гуыппытӕй хъустӕ къуырма кодтой. Йӕ зӕрдӕ ахсайдта йӕ хӕдзармӕ ӕмӕ куыддӕрты цӕхӕрадоныл схъуызыд. Æрсабыр, йӕ хӕдзар ӕвыдӕй кӕй баззад, уый тыххӕй. Уӕддӕр мидӕмӕ бахызт, куыддӕр хӕдзары дуар бакодта, афтӕ дзы ауыдта 33 литруат кӕм цӕуы, ахӕм мигӕнӕн бензинӕй йедзагӕй. Тынг диссаг ӕм фӕкаст, уырдӕм куыд ӕрбафтыд ӕмӕ йӕ ӕдасдӕры тыххӕй бамбӕхста скъӕты.
Икъоты Никъалайӕн йӕ дыууӕ фырты дӕр нӕ адӕмы ӕнцойад хъахъхъӕдтой ӕмӕ уыдысты горӕты. Цасдӕр рӕстӕг сӕ ницы хабар хъуыст ӕмӕ ныййарджыты зӕрдӕ ахсайдта. 9 августы райсомæй тыххæйты æрæфтыд горӕтмӕ. Йӕ фырттӕй сӕ иу – Сӕрмӕт Хъайтарты уынджы нӕ лӕппутимӕ тох кодта знӕгты ныхмӕ. Кӕрӕдзи ауыдтой ӕмӕ йӕм йӕ фырт чиугӕ балыгъд, ноджы ӕхсызгондзинады малы аленк кодта фыд, йӕ иннӕ фырты дӕр сӕрӕгасӕй куы федта, уӕд. Уӕдмӕ айхъуыст, тагъд нӕм Уӕрӕсейы ӕфсӕдтӕ кӕй хъуамӕ фӕзыной…
Хуыбиаты Никъала
Comments are closed, but trackbacks and pingbacks are open.