Дыууæ мæйы дæргъы Уæрæсейы Федерацийы Хъахъхъæнынады министрады мобилон æфсæддон госпиталы службæгæнджытæ Хуссар Ирыстоны тох кодтой, нæ бæстæйы цы коронавирусы пандеми рапарахат, уый ныхмæ. Фæззæджы мæйты ацы инфекцион низ бацыд йæ тыхы æмæ нæ республикæйы медицинон уагдæттæ æмæ медперсоналæн фæзын рынчынтæн хос кæнын æмæ низы ныххуыдыг кæныны æвæджиаг хъуыддаг.
Банысан кæнын хъæуы уый, æмæ мобилон госпиталы æфсæддон дохтыртæ Хуссар Ирыстоны сæ уæвынадæй ацы æнæхайыры инфекцийæ схос кодтой 200 фылдæр пациентæн, сарæзтой дыууæ минæй фылдæр ПЦР иртасæнтæ, 1,6 мин лабораторон иртасæны, 1,5 мин адæймагæй фылдæрæн та бакодтой амбулаторон-консультативон æххуыс. Госпиталы радиацион, химион æмæ биологон æдасдзинады специалисттæ сдезинфекци кодтой нæ бæстæйы социалон æмæ æндæр инфраструктурон объектты.
Уæрæсейы Федерацийы Хуссар æфсæддон зылды пресс-службæ куыд фехъусын кодта, уымæ гæсгæ Уæрæсейы Федерацийы Хъахъхъæнынады министрады мобилон госпиталь Хуссар Ирыстоны цæрджытæн, инфекцион низы ныхмæ тох кæныны хъуыддаджы сæххæст кодта йæ æвæджиаг хæс æмæ майрæмбоны райсомæй араст сæ дислокацийы æдзухон бынатмæ – Мæскуыйы цур Алабиномæ. Ныгуылæн æфсæддон зылды госпиталы сæрмагонд сконд дыууæ мин километры дæрддзæгæн фæндагыл араст йæхи штатон техникæйы руаджы.
Мобилон госпиталы инфекцион хайады къухдариуæггæнæг, медицинон службæйы капитан Игорь Гришин куыд фехъусын кодта, уымæ гæсгæ мобилон госпиталы хуссарирыстойнаг æмбæстæгтæн уагътой вирус æмæ бактериты ныхмæ терапи, кодтой стоматикон æххуыс, тæнгъæдон æмæ витаминон терапи. Уымæй дарддæр ма æххæст цыд инструменталон сгарæнтæ: рентгенограммæ, кардиограммæ æмæ туджы иумæйамаг анализтæ. Гришины ныхæстæм гæсгæ, пациенттæн æххуыс кæныны хъуыддаджы сын æххæстбæрцæй æххуыс кодта бынæттон къухдариуæгад.
Бузныджы æмæ арфæйы ныхæстæ
Уæззау рæстæджы Хуссар Ирыстон æнкъары Уæрæсейы Федерацийы стыр æххуыс. Уы-мæн та æвдисæн уыдыстæм ныр дæр, ацы тæссаг æмæ мæлæт-хæссæг инфекцион низ куы рапарахат нæ бæстæйы, уæд. Бирæпрофилон медицинон центры рынчынтæн бынæттæ куы нал фаг кодта, раст уыцы рæстæг нæ бæстæйы къухдариуæгады бахатыдмæ гæсгæ нæм æххуысмæ фæзындысты уæрæсейаг æфсæддон мобилон госпиталы дохтыртæ.
Ацы æфсæддон дохтыртæ сæ æвæджиаг хæс куыд сæххæст кодтой, уымæн æвдисæн сты сæ пациенттæ. Райгондæй сын бузныджы ныхæстæ кæнынц сæ иузæрдион дохтыртæн, зæгъгæ сын дзыхы ныхасæй уæддæр бакæнæм нæ лæггады хай. Сæ уæздан ахаст æмæ æгæрон хъусдарды бын уадид сæфтысты тасы æнкъарæнтæ бирæ пациенттæн. Бæрæг куыд у, уымæ гæсгæ ацы низæн уыцы миниуæг дæр ис, æмæ ацы дохтыртæ æрмæст медицинон хос нæ кодтой сæ рынчынтæн, фæлæ-иу сæ хатт бахъуыд психологон æгъдауæй æххуыс кæнын дæр. Уымæ гæсгæ алы рынчын дæр райгондæй здæхт ацы быдырон госпиталæй йæ хæдзармæ.
Сæ цæст уарзы госпиталы колоннæйæн, цæмæй цы дард фæндагыл араст сты сæ фæрныг хæдзæрттæм, ууыл хъæлдзæг æмæ æнæфыдбылызæй сæ бинонтæм хæццæ кæнæт ирд мысинæгтимæ Хуссар Ирыстон æмæ нæ адæмæй.
Цыбыртæй госпиталы тыххæй
Скæсæн æфсæддон зылды мобилон госпиталы колоннæ Хуссар Ирыстонмæ æххуысмæ фæзынд ацы аз 27 октябры коронавирусон инфекцийæ рынчынтæн медицинон æххуыс бакæныны нысанæн. Уымæй дыккаг бон уæрæсейаг æфсæддонтæ нæ горæты стадионы райтынг кодтой госпиталь 100 бынатæн.
Хосгæнæн-диагностикон мадзæлттæ уадзыны нысанæн госпиталь ифтонг уыд рæуджыты вентиляцигæнæн аппараттæй, рынчынтæм уæлдай хъусдарыны монитортæй, рентгенографион æмæ УЗИ-йы аппараттæй, туджы анализатортæ æмæ ПЦР-лабораторийæ.
Мобилон бирæпрофилон госпиталь у быдырон медицинон дæлхай, кæцы стационарон уа-вæрты алыгъуызон рынчынтæн хос кæны, уыцы нымæцы инфекцион рынчынтæн дæр.
КЪÆБУЛТЫ Маринæ
Comments are closed, but trackbacks and pingbacks are open.